Forċina

Preżentement, għandna persuni u familji, l-aktar anzjani, li qed iħossu l-piż tal-ħajja.

Ninsabu fl-eqqel tal-festi li huma parti integrali mill-kalendarju kulturali, folkloristiku u reliġjuż tagħna. Parti ċentrali miċ-ċelebrazzjoni tal-festi hija l-purċissjoni bl-istatwa tal-patrun/a tal-lokalità. Fost dawk li jgħinu lir-reffiegħa jkun hemm erba’ persuni oħra li jżommu l-forċini. Dawn l-erba’ forċini jserrħu lir-reffiegħa. Permezz tagħhom, ir-reffiegħa jistgħu jieħdu ftit nifs u jserrħu spallejhom mill-għafsa tal-bastun u t-toqol tal-vara.

Fil-ħajja ninsabu lkoll mistiedna biex, kif il-forċina tagħti ftit mistrieħ lir-reffiegħa, hekk ukoll aħna nkunu ‘forċina’ għal xulxin. Mistiedna biex inkunu ta’ wens. Aħna donna reffiegħa. Qegħdin nerfgħu, mhux daqstant xi vara tal-injam jew tal-kartapesta, imma qegħdin nerfgħu l-piż tal-ħajja.

Kull wieħed u waħda minna għandna ċertu piż jagħfas fuq spallejna. Għal xi wħud il-piż tal-ħajja huwa faċli. Għal xi wħud il-ħajja hija salib tqil jagħfas fuq spallejhom.

Għal min għaddej minn mumenti diffiċli, żgur li l-ħajja hija waħda tqila. Min bħalissa jinsab fi proċess ta’ separazzjoni u firda minn uliedu, żgur li qiegħed iħoss il-piż tal-ħajja. Min tilef lil xi ħadd għażiż, żgur qiegħed f’mument ta’ diqa u jħoss it-toqol tas-solitudni u tal-firda. Għal min għandu xi vizzju, il-ħajja mhix faċli. Min għandu xi diżabbiltà jew irċieva l-aħbar li marid b’mod terminali, jaf x’qiegħed nipprova ngħid.

Huwa f’dawn il-mumenti li aħna msejħin biex inkunu ta’ faraġ u għajnuna. Huwa f’mumenti bħal dawn li nuru l-wiċċ tal-umanità tagħna. Ma nistgħux nibqgħu indifferenti. F’pajjiż li aktar ma jmur, aktar qiegħed isir pajjiż egoistiku, il-valur tal-appoġġ u s-sostenn sar aktar urġenti. Niftakru li legoiżmu ma jwassal għal imkien. Għaldaqstant, flimkien nistgħu nagħmlu differenza.

Dan l-appoġġ ma għandux jieqaf fuq livell personali imma anke fuq livell ta’ politika. Il-politika ġenwina hija dik il-politika li trid isservi wkoll ta’ ‘forċina’ lil dawk li fis-soċjetà huma taħt il-piż tal-ħajja. Il-politika trid toħloq strutturi, skemi u linizjattivi li jagħtu serħan lil dawk li huma l-aktar vulnerabbli. B’hekk, ħadd ma jibqa’ lura. Il-politika mhix biex wieħed joqgħod jitgħajjar u jiġġieled qisu kelb ma’ qattus. Din hija politika skaduta.

Il-politika ġenwina hija dik soċjali, jiġifieri politika li taħseb fl-oħrajn. Din hija l-politika li taħdem biex ikun hemm soċjetà aktar ġusta u umana. Preżentement, għandna persuni u familji, l-aktar anzjani, li qed iħossu l-piż tal-ħajja. Ir-rapport li ħareġ dan l-aħħar mill-Caritas juri dan biċ-ċar.

F’dan ir-rapport ħareġ li l-prezz tal-ikel żdied bi kważi 16% fl-aħħar f’sentejn. Mhux biss. Ħareġ li anke l-għoli tal-kirjiet privati qed ikun ta’ piż, b’mod partikulari għal dawk ta’ dħul baxx, fosthom l-anzjani. Għalkemm l-ekonomija hija importanti, kull programm ekonomiku jrid ikun għas-servizz tal-persuna u mhux il-persuna għas-servizz tal-ekonomija. Meta l-persuna tibqa’ ċ-ċentru ta’ kull inizjattiva ekonomika, tinbena soċjetà b’saħħitha. Dak il-politiku li ma għandux dan il-valur u din l-intenzjoni, ikun daħal għall-politika mhux daqstant biex iservi imma biex jisserva. Jien u l-kollegi sħabi dħalna fil-politika mhux biex noqogħdu nillitigaw mal-Partit Laburista, imma biex nagħmlu d-differenza fis-soċjetà tagħna. Matul id-diversi żjarat li għamilt fl-aħħar xhur, dan ħareġ biċ-ċar. Diversi jinsabu ‘għajjenin’ mill-politiċi taż-żewġ naħat għax dawn donnhom dejjem imqabbdin ma’ xulxin. Għalkemm forsi din hija impressjoni li mhix daqstant reali, huwa minnu li xi wħud donnhom jinsabu fil-politika biex joqogħdu jmieru lil xulxin kontinwament. Jien ma għandix ħin għal dan. Il-ħin tiegħi nixtieq nużah aħjar.

Nixtieq ngħaddih ngħin biex tinbena soċjetà li tagħti appoġġ u serħan lil dawk li jinsabu għaddejjin minn mumenti diffiċli.

F’kull responsabbiltà li kelli, dejjem hekk għamilt fil-limitazzjonijiet umani tiegħi. U hekk qiegħed nagħmel bħala Viċi Sindku f’San Ġiljan. U hekk se nibqa’ nagħmel bħala kandidat għall-elezzjoni ġenerali li jmiss. Ċert li m’iniex waħdi f’dan.

Diversi kollegi deputati u kandidati sħabi għandhom huma wkoll din il-ħeġġa biex ikunu ‘forċina’ għall-oħrajn. Inħeġġeġ lil dawk li qed jogħtru taħt il-piż tal-ħajja biex ifittxu l-għajnuna. Jalla lkoll kemm aħna nkunu ‘forċina’ għal xulxin f’din il-‘purċissjoni tal-ħajja’.

Jekk nagħmlu dan, is-soċjetà tagħna tkun aħjar milli hi.

(Dan l-artiklu ġie ippublikat fuq il-gazzetta Il-Mument – 14 ta' Awwissu, 2016)