Impressjonijiet ħżiena

Mhux kull ma jleqq huwa deheb. Din hija espressjoni Maltija. Din l-espressjoni tfisser li mhux dak kollu li jidher sabiħ u jleqq minn barra, huwa hekk fir-realtà.

Photo: Shutterstock.com

L-esperjenza mhux l-ewwel darba turina li hemm differenza bejn dak li jidher u bejn dak li huwa reali.

Dan jista’ jgħodd ħafna ghall-Gvern Laburista.

Għalkemm jidher li huwa Gvem li jispira ruħu minn valuri u politika soċjalista/lemin, fir-realtà I-Partit Laburista sar aktar partit kapitalist u xellugi f’diversi temi, bħal pereżempju fuq it-temi tal-kostruzzioni, negozju, immigrazzioni, governanza, faqar u temi oħrajn.

Illum il-Partit Laburista sar kollox għajr Partit Laburista! Fir-realtà juża lil ħaddiem u lill-persuni vulnerabbli biex tal-qalba jkomplu jitħanżru u jiffangaw. Il-lista hija twila li tikkonferma dan.

Ilkoll niftakru wkoll diversi slogans u kliem sabiħ bħalma huwa: trasparenza, meritokrazija akkontabbiltà u tolleranza żero għall-korruzzioni.

Kull min juża moħħu u ma jitmexxiex minn imnieħru jaf sew li dawn kienu/huma kliem fieragħ u bogħod mill-verità. Ir-realtà turi li f’pajjiżna ma hawnx transparenza, meritokrazija, akkontabbiltà u mgħarrqa fil-korruzzioni! L-aħħar rapport tal-World Corruption Index ipoġġina kważi fl-aħħar post!

Diversi drabi, il-Gvern Laburista jagħti l-impressioni li Malta miexja fuq ir-rubini, li kollox huwa sejjer tajjeb u kulħadd huwa sinjur żgħir. Għalkemm ma għandi l-ebda problema nistqarr li hemm numru ta’ persuni u anke setturi li sejrin tajbin (ironikament, setturi li ġew imdaħħla mill-PN fil-Gvern bħalma huma igaming u servizzi finanzjarji), imma ir-realtà hija xi ftit differenti.

Hawn min qiegħed ibati

Irridu nkunu onesti biżżejjed li filwaqt li nagħrfu li l-ekonomija u xi ċertu setturi sejrin tajbin, hemm ukoll persuni li ’l hinn minn dan qegħdin ibatu u għandu nuqqas ta’ kwalità ta’ ħajja.

Dan ħareġ ċar minn studju riċenti, ‘Beyond Measurement: Insights for Wellbeing Policy in Malta’. Dan id-dokument kien maħruġ mill-Fondazzjoni Well-being bl-għajnuna ta’ NSO u l-Università ta’ Malta. F’dan ir-rapport filwaqt li jinnota li hemm ekonomija jew aħjar GDP li huwa b’saħħtu, jsib li:

• Hawn 8,079 minn ċittadini tagħna li jaqilgħu inqas minn 10,000 euro fis-sena;

• Hawn 40,900 li jinsabu fil-faqar materjali;

• 19,015 ċittadin Malti li jinsab marid jew inkella ma jħossux tajjeb;

• 42,069 ċittadini li jgħixu fid-djar mudlama, bl-umdu jew b’saqaf iqattar;

• 143,784 ċittadin Malti li qegħdin jgħixu fi storbju kontinwu; u

• 8,323 persuni li jħossuhom fi stat ta’ miżerja b’mod emozzjonali.

Bħala politiku huwa fir-responsabbiltà tiegħi li nitkellem fuq din Malta u fuq dawn il-Maltin!

Bħala politiku wkoll irid ikolli l-kuraġġ li filwaqt li ngħid ‘prosit’ Iill-Gvern tal-ħidma tiegħu imma ma nistgħux nagħlqu għajnejna għal din ir-realtà! Wara kull ċifra, m’hemmx biss numru imma persuna/familji tad-demm u I-laħam li qegħdin ibatu.

Dan ifisser li ridu nsibu riga aktar wiesgħa biex inkejlu I-ġid u I-progress tal-pajjiż biex verament tkun stampa vera u ġusta!

Għal diversi snin, ir-riga li ntużat biex tkejjel il-progress nazzjonali kienet riga ta’ GDP – GROSS DOMESTIC PRODUCT. Il-ħsieb huwa li aktar ma l-pajjiż ikollu ġid, aktar ikun hemm flus fil-but taċ-ċittadini.

Riga li tibqa’ tintuża

Filwaqt li l-GDP hija riga li għandha tibqa’ tintuża, nemmen li rridu nagħmlu pass ieħor u nintebħu li hemm rigi oħra ta’ kif wieħed ikejjel il-livell tal-għajxien taċ-cittadini.

Nieħu gost ninnota li dan l-aħħar il-Gvern se jkun qiegħed juża rigi oħrajn biex ikejjel il-ġid fil-pajjiż.

Għalkemm il-flus huma importanti u neċessarji biex joffru livell aħjar ta’ għajxien imma mhumiex kollox. Forsi għal soċjetà materjalista, li aktar ma għandha aktar trid, din forsi tinstema’ stramba.

Imma x’jiswa li jkolli I-ġid kollu tad-dinja mbagħad imdejjaq bija nnifsi? X’jiswa li għandi I-flus imma ma għandix min iħobbni u jaċċettani kif jien? X’jiswa li għandi karozza lussuża imma mwaħħal siegħa fit-traffiku? X’jiswa li għandi I-liġijiet kollha imma xorta hawn min qed jissawwat jew jiġi diskriminat? X’jiswa li għandi xogħol imma ma għandix job satisfaction!

Fil-gosor: X’jiswa li I-pajjiż għandu GDP tajjeb imma mbagħad huwa mifrud, nervuż u mingħajr valuri?

Għalhekk irridu mmoru ’I hinn mir-riga ta’ GDP u naraw fatturi/indikaturi oħra bħalma huma SDGs – SUSTAINABLE DEVELOPMENT GOALS. X’inhuma dawn?

Dawn huma indikaturi li juru l-well-being tal-persuna, jiġifieri mhux biss jittieħed I-aspett finanzjarju imma anke l-fattur tas-saħħa tal-persuna, il-kuntentizza, l-edukazzjoni r-relazzjonijiet mal-familja/ħbieb, il-work-life balance u I-ambjent fost oħrajn.

Fil-qosor: naraw il-ġid tal-persuna/well-being tal-persuna b’mod olistiku.

Konkluzjoni

Filwaqt li I-GDP huwa riga tajba u li għandha tibqa’ tintuża, imma nkunu diżonesti li nużaw biss din ir-riga biex naraw il-progress ta’ nazzjon. II-GDP waħdu jagħtina stampa li kollox ileqq imma fir-realtà din mhix l-istorja għal diversi persuni!

Hija r-responsabbiltà tal-klassi politika li ma tħalli lil ħadd jibqa’ lura!

(Dan l-artiklu ġie ippublikat fuq il-gazzetta Il-Mument – 4 ta' Mejju, 2025)