Meta l-persuni jiġu l-ewwel (1)

Ħidma politika li mhix mibnija daqstant dwari, dwar l-ambizzjonijiet jew il-proġetti tiegħi jew inkella x'nista' nakkwista, imma hija dwarna u dwar id-diffikultajiet u l-aspirazzjonijiet tagħna lkoll.

Il-politika għalija

Għalkemm diversi drabi, meta wieħed isemmi l-kelma ‘politika’, jiġu f ’moħħu stejjer ta’ politika żbaljata, jiena nagħżel li nżomm li l-politika hija waħda minn diversi mezzi kif fis-soċjetà wieħed jista’ jagħmel differenza pożittiva b’tali mod li jkollna soċjetà bi kwalità ta’ ħajja aħjar.

Għalkemm nistqarr li l-involviment tiegħi fil-politika mhux se jkun xi passiġġata, nemmen li fl-aħħar 30 sena dejjem għażilt li nħares lejn l-awtorità bħala mezz ta’ servizz lejn l-oħrajn. Fid-diversi rwoli u responsabbiltajiet li kelli matul is-snin u bil-limitazzjonijiet kollha tiegħi, dejjem ippruvajt nagħti

sehmi bl-aħjar mod li stajt.

Għaldaqstant, f ’dan il-kuntest nixtieq insemmi fil-qosor xi punti fundamentali ta’ xi tfisser il-politika

għalija u x’inhuma l-valuri li fl-opinjoni tiegħi għandhom idawru l-politika. B’hekk wieħed ikun jaf

kif naħsibha u x’jistenna minni.

Għalija l-politika tfisser:

Għotja ta’ servizz u impenn sħiħ lis-soċjetà f’servizz lill-oħrajn. Dan huwa l-għan ewlieni li għandu jibqa’ dejjem preżenti fil-qalb u fil-moħħ ta’ kull politiku. Xejn aktar, xejn inqas. Permezz ta’ dan l-impenn, is-soċjetà tista’ tkun aktar ġusta, aktar umana u inklużiva biex l-ebda persuna ma tibqa’ lura.

Impenn soċjali fejn il-persuna hija fiċ-ċentru tal-ħsieb politiku. Is-soċjetà turi l-kwalità taċ-ċiviltà tagħha meta tħaddem politika b’kuxjenza soċjali. Politika soċjali ġusta tfisser meta l-persuna ma tkunx għas-servizz tal-ekonomija u l-profitt imma huma l-ekonomija u l-profitt li huma għas-servizz tal-persuna. Soċjetà li ma tiħux ħsieb persuni vulnerabli hija soċjetà li tilfet il-ġewwieni tagħha.

Solidarjetà. Wieħed mill-għanijiet tal-politika huwa li twassal, li twieżen lil dawk li waqgħu lura fil-ħajja. Għalkemm sfortunatament dejjem se jibqa’ jkun hawn persuni li, għal raġuni jew oħra, se jaqgħu lura u xi wħud minnhom għandhom ‘faqar strutturali’, il-politika soċjali vera trid toffri mhux biss il-‘ħuta’ imma anke l-‘qasba’. Is-solidarjetà tilħaq verament il-milja tagħha meta toffri l-kapaċità li wieħed iqum verament fuq riġlejh – dak li bl-Ingliż jissejjaħ empowerment. Il-politiċi ma jistgħux ‘jużaw’ lil persuni vulnerabbli biex jidhru huma ġenerużi! Il-politiċi ma jistgħux iżommu l-batut lura biex dan jibqa’ jiddependi fuqhom. Is-solidarjetà mhijiex pjaċir imma dmir. Is-solidarjetà mhijiex klijenteliżmu imma dinjità. Is-solidarjetà vera tagħti d-dinjità u mhux twassal għal dipendenza.

Tisma’ lil kull ċittadin għax kull ċittadin għandu valur. Il-politika trid issib il-ħin u tieħu attitudni li tisma’ s-suġġerimenti, id-diffikultajiet, l-opinjonijiet, l-istejjer u l-aspirazzjonijiet ta’ kulħadd. Kull ċittadin għandu ‘l-istorja’ tiegħu xi jgħid. Meta l-politika tieqaf tisma’, tispiċċa tingħalaq fiha nnifisha u tispiċċa politika rettorika tal-ftit.

Preżenza fost iċ-ċittadini. Jekk il-politika trid tagħmel sens liċ-ċittadini, il-politiku jibqa’ viċin u jkun jaf sew il-polz taċ-ċittadin. Dan ma jfissirx li l-politika tispiċċa tkun populista, kif xi drabi sfortunatament jiġri. Jekk iseħħ dan, allura nispiċċaw qisna qasba li tixxejjer ma’ kull riħ. Politika viċin in-nies tfisser politika li tkun ispirata mill-ħajja, ispirazzjoni u l-ġrajjiet ta’ kuljum bil-għan li għada jkun aħjar mil-lum.

Mixja li wieħed irid jaħdem kontinwament ma’ oħrajn biex jakkwista l-fiduċja ta’ sħabu ċ-ċittadini. L-istorja turina biċ-ċar li l-poplu jtellagħna u huwa l-poplu li jniżżilna! Għaldaqstant wieħed irid jirrispetta l-intelliġenza ta’ kull ċittadin. Il-fiduċja ma tiġix bi dritt imma b’ħidma serja, umli u kontinwa.

Ħidma politika li mhix mibnija daqstant dwari, dwar l-ambizzjonijiet jew il-proġetti tiegħi jew inkella x’nista’ nakkwista, imma hija DWARNA u dwar id-diffikultajiet u l-aspirazzjonijiet tagħna lkoll. Il-mentalità ta’ AĦNA trid tkun akbar mill-mentalità tal-JIEN.

(Dan l-artiklu ġie ippublikat fuq il-gazzetta Il-Mument – 15 ta' Frar, 2015)