Naqbel u ma naqbilx

Politika onestà hija l-qofol ta' kull diskors ta' Simon Busuttil. Simon qiegħed jinsisti li dak li finalment se jagħmel differenza bejn iż-żewġ partiti hu l-onestà fit-tmexxija.

Jien, flimkien ma’ oħrajn, ningħaqad miegħu

Għalija l-politika onesta tfisser meta jkollna l-kuraġġ ngħidu l-verit., li wieħed ma jibżax jgħid fejn sejjer tajjeb u lanqas jiddejjaq isemmi dak li mhuwiex. Din hija politika matura u kuraġġuża. Minn diversi żjarat li qiegħed nagħmel bħala kandidat għall-elezzjoni ġenerali, dan huwa messaġġ li spiss nirċievi. Ix-xewqa ta’ diversi li jkollna politika u politiċi li jgħidu l-affarijiet kif verament huma. Il-poplu huwa mxennaq għal politika oġġettiva. Għaldaqstant, għaliex nemmen f’dan it-tip ta’ politika, nistqarr li fil-Baġit hemm inizjattivi tajbin u oħrajn li mhumiex.

Punti li naqbel dwarhom

Naqbel ma’ tkomplija ta’ tnaqqis ta’ taxxi għal dawk ilpersuni li jinsabu fuq il-paga minima u fil-faxxa t’isfel tas-soċjetà.

Naqbel ma’ in work benefits imħabbra. Naqbel malmiżura ta’ investiment f’enerġija alternattiva. Naqbel mal-isforz biex jieqaf l-isfruttament tal-immigranti irregolari. Naqbel mal-ftuħ ta’ tliet ċentri tat-tfal għal matul il-jum. Naqbel li l-proċess ta’ litigazzjoni bejn il-werrieta miġġielda jonqos. Naqbel mat-tnaqqis ta’ 7% VAT fuq attivit. sportiva. Naqbel mal-bini ġdid l-Istitut Turistiku u ta’ skola. Naqbel ukoll mal-proposta tal-UĦM, imsejħa ‘Job Plus’.

Bħala kunsillier f’San Ġiljan naqbel fil-prinċipju wkoll mal-miżura li kull turist, jagħti kontribuzzjoni ta’ 50ċ għal kull lejl. B’hekk ikunu jistgħu jsiru xogħlijiet ta’ tisbiħ fizzoni turistiċi. Ironikament, din hija proposta li kont għamilt matul il-kampanja għall-elezzjoni tal-Kunsilli Lokali.

Punti li ma naqbilx dwarhom

Naqbel ma’ Simon Busuttil meta jgħid li l-Bagit jagħti ‘ftit għalik u ħafna għalihom’. Kif nista’ ma naqbilx meta naqra lista sħiħa ta’ persuni li qegħdin jirċievu eluf ta’ ħlasijiet u karigi, waqt li aħna ningħataw €1.75 żieda fil-ġimgħa? Nista’ naqbel meta l-pensjonanti, li huma fuq il-pensjoni minima, b’dan il-Baġit se jieħdu biss żieda bejn €4.14 u €8.92 meta l-ekonomija sejra tajjeb? Nista’ naqbel meta min għandu pensjoni mhux kontributorja se jieħu biss l-għoli tal-ħajja? Nista’ naqbel meta naqra li żiedu 2,500 anzjan f’riskju ta’ faqar u esklużjoni soċjali? Nista’ naqbel mal-proposta li l-Gvern iħallas nofs il-paga minima ta’ carer lil dawk l-anzjani li huma fil-waiting list għal dar tal-anzjani imma mbagħad iridu jinqatgħu minn fuq il-waiting list? Nista’ naqbel li persuni b’diżabbiltà kienu se jingħataw €5.16 żieda fil-ġimgħa u issa din tneħħiet? Nista’ naqbel li l-istudenti Għawdxin kienu se jingħataw €800 u spiċċaw bi €300? Nista’ naqbel meta nisma’ li Malta għandha l-ogħla rata ta’ għoli tal-ħajja u talikel fl-UE? Jista’ wiehed jaqbel meta dawk li twieldu wara l-1968 se jkollhom iħallsu 41 sena bolla minflok 40 sena? Dan huwa mod diżonest kif wieħed jgħolli l-età tal-irtirar? Tista’ taqbel meta taqra li hawn 100,000 persuna f’riskju ta’ faqar? Is-sena li għaddiet in-nies waqgħu lura fil-kontijiet tagħhom, inkluż fis-self tal-banek, u dawn żdiedu b’14,000. Żgur li Sai Mizzi u oħrajn mhumiex f’din il-kategorija! Nista’ naqbel meta r-rata tal-qgħad hija manipulata? Il-Gvern daħħal jaħdmu miegħu 5,500 u neħħa 1,353 persuna mir-reġistru. Issa, il-Community Work Scheme se tingħata lil kumpanija privata. Dawk li se jidħlu f’din l-iskema se jinqatgħu mir-reġistru għaliex huma ma’ din il-kumpanija?

Lanqas ma nista’ naqbel li l-Gvern kien qed jixtri l-elettriku b’6ċ3 għal kull unit meta lilna jitlobna 10ċ5 għal kull unit! Lanqas ma naqbel sa barra fuq it-tneħħija tal-bolla ta’ 5% għal dawk li jixtru l-ewwel proprjet.. Dan jista’ jkompli jgħolli l-prezz mitlub mis-sidien. L-aħħar stħarriġ jindika prezzijiet għolja għall-first time buyers. Kien ikun aktar għaqli kieku l-Gvern żamm l-iskema preċedenti fejn kien jagħti sussidju fuq l-interessi ta’ self għal tmien snin. B’hekk wieħed seta’ jiffranka mhux €5,000 imma €14,000!

Lanqas ma naqbel sa barra li jkun hemm hub għal persuni b’diżabbiltà. Għalkemm nifhem l-intenzjoni, din mhix se sservi biex dawn jintegraw fis-soċjetà. Jalla ma jispiċċawx bħal xi ghetto! Ma naqbilx lanqas li jinbnew aktar appartamenti soċjali. Mhux għaliex ma hawnx bżonn. B’aktar binjiet soċjali hemm ir-riskju li jkun hemm ‘ghettoization’ ta’ persuni bi problemi soċjali. Kien ikun ferm għaqli kieku l-Gvern jagħti inċentivi biex dawn jikru jew jixtru mill-privat.

Imma l-aktar ħaġa li ma naqbilx magħha f’dan il-Baġit hija li hemm faqar ta’ viżjoni u direzzjoni ċara. Pereżempju, ma hemmx viżjoni sostenibbli kif persuni se joħorġu mill-faqar! Ma hemmx viżjoni kif se negħlbu l-illitteriżmu u n-nuqqas ta’ attendenza skolastika – żewġ fatturi li jwasslu għall-faqar. M’hemmx viżjoni fuq l-edukazzjoni fil-livelli kollha. B’għoti ta’ tablets biss, ma naslux!

M’hemmx direzzjoni kif se nsolvu l-problema tat-traffiku u t-trasport pubbliku li saru l-akbar problema nazzjonali. Fil-Baġit hemm biss li se ssir konsultazzjoni! M’hemm l-ebda viżjoni kif se jġibu aktar investiment u noħolqu niċeċ ġodda ta’ investiment f’Malta u f’Għawdex ħlief il-bejgħ tal-passaporti! M’hemm l-ebda viżjoni fuq il-biedja u s-sajd – żewġ setturi dgħajfa. M’hemm l-ebda viżjoni fuq il-ħtieġa ta’ żvilupp ambjentali sostenibbli u l-kwistjoni tal-ODZ.

“Aħna nistgħu nagħmlu aħjar, ferm aħjar, minn dan il-Gvern.” Hekk stqarr Simon fl-aħħar tad-diskors tiegħu fil-Bagit. Kif tista’ ma taqbilx?!

(Dan l-artiklu ġie ippublikat fuq il-gazzetta Il-Mument – 25 ta' Ottubru, 2015)