Ras taż-żonqor

Il-Gvern ma jistax jibqa' ras taż-żonqor fuq il-Ponta taż-Żonqor.

Bħal kull espressjoni bil-Malti, din l-espressjoni ġejja mill-esperjenza tal-ġrajjiet tal-ħajja. Tingħad lil xi ħadd li ma jkun irid jisma’ b’xejn. Għalxejn wieħed jipprova jfiehem lill-persuna. Tgħid xi tgħid, il-persuna tibqa’ ssostni u tiġġustifika l-punt tagħha. Dan iseħħ forsi għaliex il-persuna tkun diġà ħadet id-deċiżjoni.

Ħafna drabi, din l-espressjoni hija komuni fuq fomm il-ġenituri. Imma mhux biss. Aktar ma jgħaddi ż-żmien u aktar ma jinħarġu stejjer bi rwejjaħ ta’ korruzzjoni u dellijiet ta’ intriċċi moħbija, is-soċjetà ċivili aktar qiegħda tuża din l-espressjoni għat-tmexxija ta’ pajjiżna. Ċittadin attiv li għalih mhux kollox jgħodd u mhux kollox jgħaddi, qiegħed isib lilu nnifsu jgħid din l-espressjoni – ras taż-żonqor – lil dan il-Gvern li tela’ bl-għajta li se jkun gvern li jisma’. Minn gvern li jisma’ nbidel fi gvern li jisma’minn ċerti ‘nies’ jew gruppi li għandhom interess wieħed: kif isiru sinjuri minn fuq dahar Malta. Iċ-ċittadin attiv qiegħed iħoss li l-Gvern qiegħed ikun rasu taż-żonqor.

Il-każ tal-Ponta taż-Żonqor f’Marsaskala huwa wieħed minn sensiela. Ġie eżatt wara l-każ tal-Cafè Premier. Hawn ukoll il-Gvern kellu ras taż-żonqor. Spiċċa li ma sema’minn ħadd. Daħħal f’moħħu li jħallas €4.2 miljun mit-taxxi tagħna. U hekk għamel. Hemm ‘stejjer’ oħra li jkomplu din il-kullana ta’ ras iebsa, bħalma huma l-iżvilupp fil-Qala, Għawdex, l-iżvilupp ta’ art għall-isparar fil-Mosta, u x-xiri ta’ parti mill-palazzin fil-Belt!

Quddiem dan kollu, nistaqsi: għaliex din l-ebusija tar-ras? Forsi l-Partit Laburista kellu jew għandu ftehim jew obbligi ma’ ċerti nies jew għaqdiet li saru qabel l-elezzjoni? Irid issa jżomm kelmtu magħhom? Jekk il-Partit Laburista jrid iżomm l-unur tal-kelma magħhom, għaliex mhux qiegħed iżomm l-unur tal-kelma magħna?

Ilkoll niftakru l-wegħda li se jkun gvern li jisma’ u kontabbli? Qabel l-elezzjoni, diversi żviluppaturi bdew juru interess qawwi li jixtru biċċiet ta’ art agrikola bl-irħis madwar din illokalità. Jekk tinbena din ‘l-università’, ikun hemm bżonn ukoll bini ieħor fil-viċinanzi biex jagħti sostenn. L-ebda żviluppatur ma jixtri art agrikola biex imur joqgħod jaħdimha! Jakkwistaha biex jiżviluppaha. Proprju għalhekk jissejjaħ żviluppatur u mhux bidwi! Issa lkoll nafu li art agrikola li tinbidel f’art ta’ żvilupp hija art li tiswa mitqlu deheb. F’ħakka t’għajn wieħed isir sinjur.

Nafu li dawn l-iżviluppaturi huma qrib il-Partit Laburista. Ħbieb tal-ħbieb! Xi wħud ilhom ‘ħbieb’minn żmien Lorry Sant!

Nistaqsi: Erġajna għal dak iż-żmien ta’ korruzzjoni? Dan jgħodd ukoll għall-proposti l-oħra f’Għawdex, fil-Mosta u fil-Belt? Il-fehma ta’ diversi – u kienu diversi – hija li din l-‘università Amerikana’ mhi Amerikana xejn ħlief fl-isem. Diversi sostnew li mhu se jkun hemm l-ebda ġid ekonomiku għan-nies tal-madwar.

Nammettu, jekk lanqas Smart City ma ġab gwadann ekonomiku dirett lir-residenti tax-Xgħajra, lanqas dan mhu se jġib! Diversi tkellmu fuq l-impatt soċjali li se jħallu 4,000 żagħżugħ/a fuq il-komunità. Staqsu lir-residenti f’Paceville, fis-Swieqi u f’San Ġiljan. Diversi wkoll staqsew x’jiġri jekk din l- ‘università’ ma taqbadx. Tinbidel f’appartamenti? Forsi għalhekk iridu li din tinbena quddiem il-baħar? Oħrajn semmew li biex verament dan l-iżviluppatur tal-lukandi jkun moqdi verament, l-istandards ta’ kwalità se jonqsu. Żgur li ħadd ma jemmen li dan sar b’kumbinazzjoni, kif sostna xi ħadd bravu.

Għal ħafna, l-akbar karba hija li ż-Żonqor huwa ODZ (zona barra mill-iżvilupp). Nemmen li l-ftit ODZ li baqa’ għandu jibqa’ ODZ. Mhux biss fiż-Żonqor, imma kull fejn huwa ODZ. L-ebda ODZ m’għandu jagħmel tajjeb biex jistagħna xi żviluppatur Malti jew xi barranin. Għaldaqstant, ilqajt bil-ferħ id-dikjarazzjoni tal-Kap tal-Partit Nazzjonalista Simon Busuttil meta qal li l-ODZ irid jibqa’ jkun protett u offra direzzjoni għall-ġejjieni. B’hekk nistgħu nerġgħu nkunu kredibbli!

Il-bieraħ is-soċjetà ċivili nġabret flimkien – aħna min aħna – biex semmgħet leħinha. Il-messaġġ kien u jibqa’ sempliċi. Il-Gvern ma jistax jibqa’ ras taż-żonqor fuq il-Ponta taż-Żonqor.

(Dan l-artiklu ġie ippublikat fuq il-gazzetta Il-Mument – 21 ta' Ġunju, 2015)