Saqajn tat-tafal

Il-Gvern bena s-suċċess fuq l-inġustizzji, il-qerq u l-ingann.

Kien hemm re li matul il-lejl ħolom li ra statwa kbira, sabiħa u li tpaxxi l-għajnejn. Imma r-re induna li din kienet magħmula minn diversi elementi. Ma setax jifhem kif filwaqt li l-istatwa kienet magħmula mid-deheb, il-fidda u l-bronż, saqajha kienu tat-tafal. Għaldaqstant, dik l-istatwa spiċċat titfarrak mal-art. Ir-re qam maħsud. Mar dritt jitlob lil xi ħadd jgħinu jifhem din il-ħolma stramba.

It-tweġiba li ngħata kienet li għalkemm is-saltna tiegħu kienet kbira, qawwija u sinjura, il-pedamenti tagħha kienu dgħajfin. U fil-fatt hekk ġara. Għaliex għalkemm din is-saltna kienet qawwija, il-pedamenti kienu mibnija fuq il-qerq, l-arroganza, il-vjolenza u l-korruzzjoni.

Għaliex qiegħed insemmi din l-istorja li tinsab fit-Testment il-Qadim fil-ktieb imsejjaħ ‘il-Ktieb ta’ Danjel’? Hija storja attwali. Min fil-ħajja jaħseb li huwa b’saħħtu u li ħadd ma jista’ għalih, u jibni kollox fuq ħwejjeġ u valuri dgħajfin, jispiċċa ħażin.

Il-Partit Laburista ta’ Joseph Muscat, qiegħed jiġrilu l-istess. Muscat ried jerġa’ jibni l-Partit bħala partit kbir u b’saħħtu. Hekk għamel qabel l-elezzjoni. Għaliex il-Partit Laburista, immexxi minn Joseph Muscat, ried jirbaħ l-elezzjoni għal kwalunkwe raġuni, għamel diversi wegħdi ma’ kulħadd. Ir-riżultat tal-elezzjoni kulħadd jaf x’kien. Il-Partit Laburista ħa saħħa kbira. Imma dan id-distakk se jkun il-waqgħa tiegħu! Dan id-distakk ġiegħel lill-Partit Laburista jħoss li ħadd ma jista’ għalih u li jista’ jagħmel li jrid. Biżżejjed wieħed jara kif ġab u qiegħed iġib ruħu fit-tmexxija ta’ pajjiżna.

F’dawn it-tliet snin, il-Partit Laburista ftaħar kemm sar ġid u progress. Biżżejjed wieħed isegwi d-diskorsi kollha tal-Prim Ministru li jiftaħar li Malta qatt daqs illum ma rat daqshekk ġid u progress. Min f’pajjiżna ma jindunax li x-xemx ma telgħetx tliet snin ilu imma li d-diversi riżultati mħabbra huma wkoll frott ta’ ħidma li saret minn tmexxija Nazzjonalista?

Għalkemm il-Gvern Laburista jinsab f’dillirju kbir, ftit qiegħed jinduna li dan huwa mibni fuq it-tafal. Aktar ma jgħaddi ż-żmien, aktar qiegħed jidher li dan il-Gvern huwa dgħajjef. Mhuwiex dgħajjef daqstant fis-saħħa parlamentari, imma dgħajjef għaliex bena u qiegħed jibni kollox fuq il-qerq, l-ingann, l-inġustizzji, laggressività, iċ-ċensura, l-iskandli u l-korruzzjoni.

Il-Gvern bena s-suċċess fuq l-inġustizzji. Ilkoll nafu kemm persuni li kienu jaħdmu mal-Gvern jew ma’ entitajiet pubbliċi spiċċaw tilfu posthom jew ħadu transfer sempliċement biex jagħmlu post għal tal-qalba Laburista. Ilkoll nafu persuni li kienu kompetenti u kwalifikati f’xogħolhom u spiċċaw ħadulhom posthom persuni mingħajr l-ebda kwalifika jew esperjenza. Ilkoll smajna bi stejjer ta’ persuni li ħadu transfers vendikattivi.

Biżżejjed insemmu dak li ġara fl-Armata u fil-Pulizija, fost oħrajn. Il-Gvern bena s-suċċess tiegħu fuq il-qerq u l-ingann. Ilkoll kemm aħna niftakru dak il-kliem sabiħ dwar meritokrazija, kontabbiltà u trasparenza. Ilkoll niftakru l-kliem dwar kif wieħed jista’ma jaqbilx mal-Gvern imma xorta jista’ jkompli jaħdem miegħu. Ilkoll niftakru l-wegħda li ‘Malta hija tagħna lkoll’ u għaldaqstant mhux lil min taf se jkun jgħodd imma kemm taf. Ilkoll niftakru l-famuża ‘shame on you’. Ilkoll niftakru tant wegħdi u kliem ieħor kollu zokkor.

Il-Gvern Laburista bena fuq l-ingann tal-istampa u l-marketing. Ilkoll nafu li mhux kulma jidher huwa fil-verità fatt. Jidher ċar li għalkemm il-Prim Ministru huwa salesman tajjeb, naqas milli jkun statesman.

Imma mhux biss. Dan il-Gvern jinsab imxekkel minn diversi stejjer ta’ skandli. Iżda qatt daqs illum ma kellna skandlu daqshekk kbir li juri xibka sistematika ta’ korruzzjoni. L-iskandlu li mhux biss qiegħed iħammeġ wiċċ il-Prim Ministru, Konrad Mizzi u Keith Schembri, imma qiegħed iħammeġ lill-Partit Laburista u lil pajjiżna. Huwa skandlu li juri li verament il-Gvern Laburista huwa gvern immexxi minn xibka ta’ ħażen u qerq.

Dawn l-istejjer ta’ korruzzjoni qegħdin ‘jaqtgħu saqajn il- Gvern’. Huwa gvern li tilef kull awtorità morali, kull rispett lejh innifsu. Huwa gvern li jinsab fi kriżi enormi. Huwa gvern li qiegħed ‘iħaffer il-qabar’ tiegħu stess.Aktar ma jdum ma jieħu l-passi meħtieġa, aktar tikber il-problema ta’ insigurtà ta’ dan il-Gvern.

Nistieden lil dawk ta’ rieda tajba u onesti biex isemmgħu leħinhom illum wara nofsinhar. Kif fl-imgħoddi nġbarna fit-triq Tal-Barrani biex niddefendu l-libertà f’pajjiżna, hekk issa pajjiżna qiegħed isejħilna biex ninġabru l-Belt biex mill-ġdid insemmgħu leħinna.

Għalkemm l-istatwa kellha rasha tad-deheb, saqajha kienu tattafal. Minħabba f’hekk, spiċċat titfarrak. Hekk jidher li se jiġrilu dan il-Gvern Laburista. ‘Saqajh’ huma dgħajfin. ‘Saqajn tat-tafal’ ma jżommux gvern fit-tul!

(Dan l-artiklu ġie ippublikat fuq il-gazzetta Il-Mument – 10 ta' April, 2016)