'Tra il dire e il fare'

Kien għaqli għall-PN li dan l-aħħar ressaq proposta għall-ħarsien tal-art pubblika fil-Parlament.

Bit-Taljan hemm espressjoni li tgħid: “Tra il dire e il fare c’è di mezzo un mare”. Bejn dak li tgħid u dak li tagħmel, hemm baħar jaqsam. Espressjoni profonda. Tikxef li l-kelma mhix biżżejjed. Il-kliem iqanqal imma huwa l-eżempju li jkaxkar, jgħid il-Malti. Nista’ ngħid li jien kapaċi nsajjar, imbagħad m’iniex kapaċi naqli bajda! Nista’ ngħid li jien espert fil-karozzi, imbagħad ma nafx lanqas inbiddel tajer imniżżel!

Bil-kliem nista’ ngħid ħafna ħwejjeġ sabiħ. Bil-kliem nista’ noħlom. Bil-kliem nista’ nwiegħed ħafna proġetti kbar. Bil-kliem nista’ ndewweb u ‘nġennen’ lil kulħadd warajja! Verament li l-kliem huwa rħis. Imma l-esperjenza tal-ħajja turina lkoll li bejn il-kliem u l-fatti hemm baħar jikkumbatti. Fil-ħajja reali huma l-fatti li fl-aħħar mill-aħħar jgħoddu.

Dan li qiegħed ngħid mhuwiex maħsub għall-ħajja personali jew familjari ta’ xi ħadd, b’mod partikulari ta’ xi politiku. Nemmen bis-sħiħ li l-ħajja personali u familjari, anke tal-politiku, huma santwarju privat li ħadd ma għandu jidħol biex joqgħod jissindika... sintendi sakemm dan ma jkunx kontra l-liġi ċivili ta’ pajjiżna. Il-ħajja personali għandha tkun imħarsa dejjem u f’kull ħin. Dak li qiegħed ngħid huwa lil hinn minn dan. Huwa dwar il-mod kif nagħmlu l-politika. Il-politika mibnija fuq kliem imqanqal trid twassal għall-fatti. Politika mingħajr azzjoni hija vojta.

Politika mingħajr fatti hija politika fiergħa mibnija fuq kampanja ta’ marketing . Politika mingħajr azzjoni hija politika mingħajr kredibbiltà. Forsi għalhekk diversi ċittadini qegħdin jitilfu t-tama fil-politiċi u fis-sistema politika? Tra il dire e il fare ... Bħala kandidat ġdid faċli ħafna li biex niġbed l-attenzjoni, insib ruħi ngħid ħafna kliem fieragħ jew inkella nwiegħed kollox lil kulħadd! Il-kliem huwa bħal ċirasa. Dan jgħodd ukoll għall-Partit. Bħala Partit li jinsab fl-Oppożizzjoni, faċli ħafna li nieħdu pożizzjonijiet popolari, niktbu policies u ‘nwiegħdu’ ħwejjeġ li meta jerġa’ jkollna r-responsabbiltà tat-tmexxija nsibu li bejn il-kliem u l-fatti hemm baħar jaqsam.

Fil-passat tgerfixna fi kliemna stess! Tra il dire e il fare… Żewġ wegħdiet li bħalissa qed isiru mill-partit tagħna huma li rridu nkunu partit viċin in-nies u li l-futur tal-partit huwa lambjent. Żewġ wegħdiet mibnija fuq ix-xewqat ta’ ħafna, fosthom tiegħi. Imma l-kliem mhux biżżejjed. Iż-żewġ kelmiet għandhom konsegwenzi kbar. Iż-żewġ kelmiet jagħtu direzzjoni u identità profonda. Li tkun viċin in-nies huwa sabiħ imma dan ifisser li l-Partit irid dejjem ikun fuq in-naħa tan-nies u jwieżen lil dawk li mhumiex qegħdin jgħixu ta’ nies minħabba d-diversi vulnerabbiltajiet li għandhom. Lesti li nkunu dejjem fuq in-naħa tal-poplu? Tra il dire e il fare… Li nemmnu li l-futur tal-Partit huwa l-ambjent hija l-għażla naturali u loġika tagħna. Imma jekk tassew nemmnu f’dan, allura ma nistgħux ’il quddiem nilagħbu bl-ambjent u nbiddlu r-regoli skont il-konvenjenzi ta’ xi wħud. ODZ irid jibqa’ ODZ! Ifisser li l-ambjent jiġi qabel kull gwadann ekonomiku.

Ifisser li nħarsu l-ftit spazji miftuħa li baqa’. Ilkoll nafu li meta konna fil-Gvern, dan ma kienx dejjem. Id-dellijiet tal-passat għadhom jiġru magħna!

Kien għaqli għall-Partit Nazzjonalista li dan l-aħħar ressaq proposta għall-ħarsien tal-art pubblika fil-Parlament. Kien aktar għaqli Simon Busuttil li filwaqt li qal li nitgħallmu mill-iżbalji tal-passat, naħdmu biex inħarsu dak li baqa’ fl-ODZ. Jista’ jkollna kredibbiltà jekk inżommu l-konsistenza. Minn issa għall-quddiem. Proprju huwa hawn fejn il-Gvern Laburista qed ibati. Ir-riżultati tal-Kunsilli Lokali wrew dan. Il-kwistjoni tal-Ponta taż-Żonqor ikkonfermat dan. Qabel l-elezzjoni, il-Partit Laburista rebaħ il-qlub u l-imħuħ ta’ ħafna bi kliem sabiħ. Iżda wara sentejn fit-tmexxija fiex qiegħed il-Partit Laburista?

Il-Gvern Laburista tkellem fuq power station f’sentejn. Il-fatti juru mod ieħor. Il-Gvern Laburista tkellem fuq meritokrazija. Il-fatti juru mod ieħor. Il-Gvern Laburista tkellem fuq trasparenza. Il-fatti juru mod ieħor. Il-Gvern Laburista tkellem fuq kontabbiltà. Il-fatti juru mod ieħor. Il-Gvern Laburista tkellem fuq housing dinjituż. Il-fatti juru mod ieħor. Għalkemm huwa minnu li l-Gvern Laburista wettaq wegħdi oħrajn, fosthom id-drittijiet ċivili, l-ikbar wegħda li qal b’tant pompa, li kien se jħaddan politika ġdida ta’ tmexxija x’sar minnha?

Tra il dire e il fare…

(Dan l-artiklu ġie ippublikat fuq il-gazzetta Il-Mument – 14 ta' Ġunju, 2015)