Xemgħat quddiem San Mikiel

Simon Busuttil quddiem sitwazzjoni fejn negozjant partikulari pprova 'jixtri' s-silenzju tiegħu, wera sens qawwi ta' onestà u tmexxija.

Il-Kappillian kellu kurżità kbira. Ta’ kuljum, waħda xwejħa kienet tiġi fil-knisja tixgħel żewġ xemgħat quddiem l-istatwa tal-Arkanġlu San Mikiel b’saqajh fuq ras ix-xitan. Darba minnhom, il-Kappillan staqsa lix-xwejħa għala tiġi tixgħel żewġ xemgħat u mhux waħda. Ix-xwejħa weġbitu: “Sur Kappillian, nixgħel żewġ xemgħat għax fil-ħajja ma tafx lil min tiġi bżonn, jekk hux lil San Mikiel jew lil ta’ taħtu.”

Diversi persuni jirraġunaw b’dan il-mod. Diversi negozjanti huma tal-fehma li tajjeb li jżommu relazzjoni tajba maż-żewġ partiti prinċipali. Għal dawn in-negozjanti huwa importanti li jkollhom bieb miftuħ maż-żewġ naħat. Fil-fehma tagħhom, daqqa jkollu bżonn lil wieħed u ħames snin wara jkollhom bżonn lill-ieħor. Għaldaqstant, huma diversi n-negozjanti li jispiċċaw ‘jixegħlu xemgħa’ liż-żewġ naħat.

Huwa fatt magħruf minn kulħadd li ż-żewġ partiti politiċi jirċievu d-donazzjonijiet mhux biss mingħand iċ-ċittadini imma anke mingħand negozjanti u kumpaniji kbar. Din hija sistema li ma tinsabx biss fostna imma sseħħ f’demokraziji oħra ’l bogħod minn xtutna.

Għalkemm wieħed irid jistqarr li huma diversi dawk in-negozjanti onesti li meta jagħtu d-donazzjonijiet liż-żewġ partiti poltiċi, ma jistennew xejn lura, hemm oħrajn li meta ‘jixegħlu xemgħa’, jagħmlu dan biex it-talba tagħhom tintlaqa’ fil-mument tajjeb. Għal dawn in-negozjanti partikulari, l-għotja tagħhom mhix donazzjoni imma investiment. L-għan aħħari tagħhom wara kull donazzjoni huwa li permezz tal-għotjiet tagħhom huma jistgħu b’xi mod ikollhom effett fuq il-partit li jkun fil-Gvern.

Nistqarr bla tlaqliq li għalkemm din hija s-sistema li s’issa kellna, diversi drabi sibt lili nnifsi nistqarr li ma naqbilx magħna. Nemmen li din is-sistema hija miftuħa ħafna għal rikatt, pjaċiri, klijenteliżmu, bdil ta’ policies u għal korruzzjoni. Eżempji ta’ dan kellna ħafna fl-aħħar erba’ snin. Matul dan iż-żmien il-Partit Laburista deher ċar li huwa obbligat lejn negozjanti partikulari. Il-masterplan ta’ Paceville, l-għotja tal-art tal-ITS, l-iżvilupp fl-Imrieħel, fiż-Żonqor, il-proġett ta’ Townsquare, id-diversi permessi maħruġa juru biċ-ċar li negozjanti partikulari kienu se jinqdew mill-koxxa. ‘Ix-xemgħa’ li xegħlu qabel l-elezzjoni fir-raba’ sular ħallet il-frott mixtieq.

Din hija sistema li tkompli tnawwar il-fiduċja li l-poplu għandu lejn il-partiti politiċi. Sfortunatament, huma diversi ċ-ċittadini li għandhom din l-isfiduċja fil-partiti poltiċi. Il-biża’ tagħhom hu li ż-żewġ partiti politiċi huma ‘viċin’ ħafna ta’ dawn in-negozjanti li jagħmlu minn kollox biex jikkontrollaw liż-żewġ partiti. Dak li ġara din il-ġimgħa jikkonferma dawn il-biżgħat! Imma filwaqt li l-Partit Laburista qiegħed jipprova jaqdi lil dawn in-negozjanti, Simon Busuttil quddiem sitwazzjoni fejn negozjant partikulari pprova ‘jixtri’ s-silenzju tiegħu, wera sens qawwi ta’ onestà u tmexxija. Fid-dawl li Simon Busuttil talab li l-Awditur Ġenerali jinvestiga kif art kbira fl-lokalità li tiswa mitqlu deheb spiċċat tingħata bi 15-il miljun biss (li minnhom se jħallas biss 5 miljuni, u dan meta fil-masterplan ippubblikat mill-istess Awtorità tal-Ippjanar din l-art kienet stmata ’l fuq minn 200 miljun), in-negozjant partikulari spiċċa jara aħmar! Għalkemm dan in-negozjant ipprova mhux biss jitfa’ ddubju imma jġib lill-PN finanzjarjament dahru mal-ħajt, pront Simon Busuttil qallu li mhux se jirnexxilu. Simon Busuttil wera għal darba oħra biċ-ċar id-determinazzjoni tiegħu li jnaddaf il-politika. Mingħajr tlaqliq, stqarr li mhu se jkun ‘fil-but’ ta’ ħadd!

Ċerti politiċi donnhom huma biss pupazzi. Din hija manipulazzjoni tad-demokrazija. Din hija l-vera theddida għad-demokrazija. Dan għaliex flok l-awtorità qiegħda f’idejn minn aħna nagħżlu li jmexxina, fir-realtà huma dawn in-negozjanti li qegħdin imexxu skont l-interessi kummerċjali tagħhom! Quddiem din is-sitwazzjoni kien għaqli li Simon Busuttil iwaqqaf kummissjoni biex tara s-sistema ta’ finanzjament tal-partiti. Waqt li l-Partit Laburista għadu s’issa lanqas ma rreġistra d-dħul tiegħu mal-Kummissjoni Elettorali, Simon Busuttil qiegħed ikun proattiv quddiem problema serja. Iż-żewġ partiti politiċi, jekk verament jemmnu li qegħdin hemm biex jaqdu lis-soċjetà bl-onestà u bl-integrità, iżommu ’l bogħod minn ċerti negozjanti. Huwa aħjar li wieħed jitlef l-elezzjoni milli jitlef il-ġenwinità tiegħu. Aħjar li l-partit joqgħod fl-Oppożizzjoni milli jispiċċa jipprostitwixxi lilu nnifsu.

L-istorja tal-Kappillan u x-xwejħa ma tispiċċax hawn. Meta x-xwejħa qaltlu għaliex kienet tixgħel żewġ xemgħat, fil-pront il-Kappillan weġibha: “Ma tistax taqdi żewġ sidien. Jew tħobb lil wieħed jew lill-ieħor. Qatt ma tista’ taqdi lit-tnejn flimkien.” Huwa parir li tajjeb li wieħed jieħdu bis-serjetà.

(Dan l-artiklu ġie ippublikat fuq il-gazzetta Il-Mument – 12 ta' Marzu, 2017)