“5 min-nies iddedikati biex inaddfu 24 siegħa f’Paceville”
Ma jistax ikun li San Ġiljan isir qisu Paceville bħalma l-Belt Valletta ma tistax issir qisha Paceville.
Minn Gavin Muscat
Is-Sindku ta’ San Ġiljan Albert Buttigieg qal li hemm ħames persuni biss iddedikati biex inaddfu ż-żona ta’ Paceville u staqsa jekk hux qed isir biżżejjed biex iż-żona toffri turiżmu tal-ogħla kwalità.
Dan intqal fuq il-programm Andrew Azzopardi on 103 li pparteċipaw fih Moira Delia, li hija residenti f’San Ġiljan, il-President tal-General Retailers and Traders Union Philip Fenech, is-Supretendent Melvyn Camilleri u l-eks Deputat Nazzjonalista u soċjologu Clyde Puli.
Buttigieg qal li l-problema ta’ infurzar u sigurtà f’Paceville ilha ġejja u li ta’ spiss jirċievi ilmenti minn anzjani u persuni li jgħixu fil-lokalità u ma jkunx jistgħu jorqdu minħabba l-klabbs fil-qrib.
Hu staqsa jekk il-pajjiż innifsu huwiex qed joffri turiżmu ta’ kwalità u li hemm turisti li sakemm jaslu fil-lukanda ta’ ħames stilel ikollhom jimxu qalb toroq mimlijin żibel.
“Ma jistax ikun li San Ġiljan isir qisu Paceville bħalma l-Belt Valletta ma tistax issir qisha Paceville,” sostna s-Sindku Nazzjonalista b’referenza għall-Avviż Legali kontroversjali li estenda l-ħinijiet tad-daqq tal-mużika f’disa’ toroq sas-1am.
Hu tkellem ukoll dwar il-bye-law f’San Ġiljan li tipprojbixxi l-konsum tal-alkoħol fil-fliexken u t-tazzi tal-ħġieġ u staqsa kemm ġew arrestati persuni li kisru din il-bye-law. Buttigieg sostna li l-problema mhijiex il-konsum tal-alkoħol imma n-nuqqas ta’ infurzar mill-awtoritajiet biex il-lokalità tkun sigura.
“Rari nara Pulizija fit-toroq ta’ San Ġiljan” – Moira Delia
Delia qalet li meta tmur timxi filgħodu f’San Ġiljan, rari tara pulizija jimxu fit-triq u jissorveljaw iż-żona.
Hi sostniet li kulħadd iħossu sigur meta jaf li hemm il-Pulizija fit-triq, speċjalment fl-aktar ħinijiet perikolużi imma saqsiet għalfejn m’hemmx infurzar biżżejjed fil-lokalità.
“Għalfejn ikolli nqum u nċempel lill-Pulizija u ma jsir xejn?” saqsiet l-attivista.
Rigward il-ħmieġ fil-lokalità, hi qalet li dan huwa inaċċettabbli u li dan jaffettwa ħafna lit-turisti li jżuru Malta u jesperjenzaw l-ammont kbir ta’ żibel fit-toroq.
“Żdiedu l-patrols f’Paceville u fil-lokalitajiet fil-qrib” – Supretendent Camilleri
Is-Supretendent Melvyn Camilleri qal li hemm ċertu element ta’ moral panic meta tinqala’ ġlieda f’Paceville jew postijiet oħra.
Hu spjega li l-infurzar minn naħa tal-bouncers jieqaf hekk kif jidħlu l-Pulizija li mal-ewwel imorru fuq il-post meta jirċievu rapport ta’ ġlieda jew inċident f’Paceville.
Madanakollu, hu ammetta li l-Pulizija ma kinitx qed tlaħħaq mad-domanda ta’ Paceville u li issa ġiet varata taqsima apposta biex jindirizza dan in-nuqqas. Semma’ wkoll it-Taqsima tal-Kavallerijja f’Paceville u l-patrols bil-klieb tal-Pulizija li jduru t-toroq taż-żona u jinforzaw fejn hemm bżonn.
Infatti, Camilleri qal li l-Pulizija bdiet tifrex dawn ir-rondi lil’ hinn minn Paceville biss u li bdiet tinkludi s-Swieqi, San Ġiljan kollu u anke Pembroke.
“Ma nistgħux nistennew li l-Pulizija tkun kullimkien” – Philip Fenech
Fenech qal li huwa impossibbli li l-Pulizija tkun kullimkien f’Paceville meta jkun hemm bżonnha u li anke kieku setgħet tagħmel dan, il-persuni li jmorru Paceville ma jkunux iridu kważi “police state”.
Mistoqsi dwar il-ġlieda quddiem il-klabb Havana f’Paceville, Fenech qal li l-Pulizija kienet preżenti għal din il-ġlieda u li mhuwiex minnu li ma kinitx taf bil-ġlieda.
Hu saħaq li anke kieku ħadd ma jikkonsma l-alkoħol, xorta se jinqala’ ġlied f’Paceville u inċidenti bħal dawn u għalhekk huwa importanti li jkun hemm infurzar adegwat.
Dwar l-ilmenti ta’ Moira Delia fuq l-ammont assurd ta’ żibel f’Paceville, Fenech qabel li hemm bżonn aktar inizjattiva għaliex il-bins fil-lokalità jimtlew mal-ewwel meta jkun hemm ammont sostanzjali ta’ nies.
Spjega li kien intlaħaq qbil biex tibda topera vettura li tnaddaf it-toroq ta’ Paceville minflok ma jkun hemm bżonn powerwashing kontinwu imma li kien hemm bżonn waħda iżgħar biex tidħol fl-irkejjen tat-toroq.
(Dan l-artiklu ġie ippublikat fuq newsbook.com.mt – 7 ta' Lulju, 2022)