Rix

Il-PN jista' jieħu l-ħajja mill-ġdid meta jiġbor lil kullħadd. L-importanti li għandna lkoll għan wieħed: il-ġid ta' Malta.

Nistqarr li l-espressjonijiet Maltin għandhom ċertu profondità ta’ ħsieb, li huwa mibni fuq l-esperjenza tal-ħajja matul iż-żminijiet. Waħda minn dawn l-espressjonijiet hija li wieħed ‘jifraħ b’rix ħaddieħor’. Din l-espressjoni tirreferi b’mod partikolari għal meta wieħed jispiċċa juża ssabiħ ta’ ħaddieħor biex jidher sabiħ hu. Għaldaqstant, din l-espressjoni tintuża għal meta wieħed jieħu l-merti ta’ xi ħaġa li m’għandux jieħu.

Fl-aħħar erba’ snin, kienu d-diversi drabi li Joseph Muscat u l-Gvern Laburista spiċċaw jifirħu b’rix ħaddieħor. Għalkemm is-sabiħ u l-ikrah ta’ pajjiżna mhuma monopolju ta’ ħadd, u kull Gvern għandu jkompli jibni fuq dak ta’ qablu, ilkoll nafu li diversi proġetti kbar jafu l-oriġini talħsieb u l-impenn finanzjarju tagħhom lill-amministrazzjoni preċidenti.

Ilkoll nafu li diversi proġetti ta’ ċertu livell, bħar-restawr tas-swar tal-Belt, ir-reġenerazzjoni taċ-Ċittadella u l-inħawi tal-Imdina, il-port taċ-Ċirkewwa, il-bini tal-MCAST, Triq il- Kosta u tal-Kappara, il-bini ta’ Bieb il-Belt, l-interconnector, il-Presidenza Maltija u l-Belt Kapitali bħala Belt tal-Kultura huma fost sensiela sħiħa ta’ proġetti li saru u kienu maħsuba tul l-amministrazzjoni Nazzjonalista.

Diversi minn dawn il-proġetti għalkemm bdew tul l-amministrazzjoni ta’ Lawrence Gonzi, kellhom jitkomplew mill-Gvern Laburista. L-ironija tal-ħajja hija li diversi minn dawn il-proġetti li Joseph Muscat u l-Partit Laburista kienu tant ikkritikaw, spiċċaw biex huma kellhom l-unur li jaqtgħu ż-żigarella! U biex l-ironija tal-ħajja tkun akbar, ilmaġġoranza ta’ dawn il-proġetti kienu finanzjati mill-Unjoni Ewropea, li Joseph u sħabu tant kienu kontra, u ħadmu qatigħ biex aħna nivvutaw ‘le’ għall-Ewropa! U issa? Issa, Joseph Muscat u sħabu qegħdin jiddandnu b’dawn il-proġetti, u kważi kważi donnhom iridu jwasslu l-messaġġ li dawn saru grazzi għall-viżjoni u l-ħidma tagħhom, u li allaħares ma kinux huma!

Dan huwa ingann politiku ieħor ta’ Joseph Muscat u l-Gvern tiegħu!

Dan ħareġ bid-dieher fil-ftuħ tal-ċelebrazzjonijiet tal-Belt Valletta bħala Belt tal-Kultura. Għalkemm matul id-diskorsi tal-okkażjoni, il-Prim Ministru semma lil Lawrence Gonzi, inħoss li dan semmieh b’mod sekondarju u fuq fuq. B’hekk, ħadd ma jista’ jgħid xejn! Kien ikun hemm aktar irġulija politika li wieħed kien jistqarr li dak li konna qegħdin niċċelebraw kien mhux biss grazzi għall-viżjoni u l-impenn tal-Gvern ta’ Lawrence Gonzi, imma wkoll għall-impenn u l-viżjoni ta’ Eddie Fenech Adami li ħadem kontra kull kurrent biex nissieħbu fl-UE.

Qiegħed insemmi dan kollu għax filwaqt li nagħmlu tajjeb li nagħrfu li l-amministrazzjonijiet Nazzjonalisti wettqu ċerti żbalji żgħar u kbar, tajjeb li nibqgħu nagħrfu t-tant tajjeb u ġid li wettaqna matul iż-żminijiet ta’ tmexxija! Nagħmlu tajjeb li niftakru li l-gvernijiet Nazzjonalisti, fir-realtà, wettqu aktar ġid u tajjeb milli ħsara u deni! Ikun żball kbir għalina lkoll meta nispiċċaw nemmnu l-propoganda Laburista li tipprova tnessi t-tajjeb li wettaqna, u tfakkarna biss fid-deni u l-ħsara li forsi wettaqna!

Tajjeb li niftakru, li għalkemm huwa minnu li bħalissa pajjiżna ekonomikament sejjer tajjeb (għalkemm dan ma jgħoddx għal kulħadd), dan il-ġid huwa frott ta’ deċiżjonijiet iebsa li ħadu Lawrence Gonzi u t-tim tiegħu! Min jirraġuna, jaf li Joseph Muscat kompla jibni fuq is-sodda mifruxa li sab! Meta wieħed jisma’ li bħalissa ninsabu ‘fl-aqwa żżmien’, fiż-żminijiet l-oħra konna wkoll fl-aqwa żmien.

Niftakru li filwaqt li pajjiżi oħra bħalma huma l-Portugall u l-Greċja kienu għarkupptejhom fl-art, Malta baqgħet sejra relattivament tajjeb. U dan ma sarx b’ċans, imma kien frott ta’ għaqal fit-tmexxija!

Dan kollu għandu, allura, jimliena b’kuraġġ għall-quddiem. Dan għandu jsaħħaħ l-istima tagħna fit-tajjeb tagħna. Kif fl-imgħoddi kellna politiċi u mexxejja li kienu kapaċi, hekk issa aħna kapaċi li jkollna politiċi Nazzjonalisti li jistgħu jagħmlulna unur mill-ġdid. Il-passat ġlorjuż tal-Parit għandu jagħtina fiduċja li nemmnu fina nfusna. Inħoss li dan huwa punt li bħalissa huwa ferm bżonjuż: li nemmnu fina nfusna!

Huwa kollu minnu li wara żewġ telfiet elettorali u wara l-elezzjonijiet interni, li ħarġu l-aspetti negattivi tagħna (niftakru li kull partit għandu l-aspetti u l-mumenti koroh tiegħu), wasal iż-żmien li nerġgħu nemmnu fil-kapaċitajiet tagħna. Wasal iż-żmien li nemmnu li r-‘rix’ tagħna huwa sabiħ ukoll.

Biex iseħħ dan, inħoss li għandna bżonn nilqgħu lil kulħadd. Il-PN jista’ jieħu l-ħajja mill-ġdid meta jiġbor lil kulħadd. Ħadd m’għandu jitwarrab għaliex forsi għandu ħsibijiet differenti. L-importanti li għandna lkoll għan wieħed: il-ġid ta’ Malta. Meta l-Partit jiġbor lil kulħadd, allura hemm minjiera sħiħa ta’ talenti, kapaċitajiet u esperjenzi li jistgħu jgħinu mhux daqstant lill-Partit imma lill-pajjiż.

Nifhmu li huwa ta’ ġid għal pajjiżna li jkollna Oppożizzjoni b’saħħitha. L-għan m’għandux jieqaf biss fuq rebħ elettorali, imma permezz tal-awtorità mogħtija mill-maġġoranza taċ-ċittadini, il-Partit jista’ jerġa’ jwettaq proġetti u ħidma aħħarija għall-ġid tal-poplu kollu!

(Dan l-artiklu ġie ippublikat fuq il-gazzetta Il-Mument – 28 ta' Jannar, 2017)