Abjad u Iswed

Dan mhux qiegħed ngħidu minn rasi imma wara 30 sena lil ili naħdem fil-qasam soċjali u wara snin naħdem ma' min huwa mġarrab mid-droga.

Dan l-aħħar il-Prim Ministru qal li huwa jaqbel li tiġi llegalizza l-marijuna, jigifieri l-ħaxixa għal skop ta’ rikreazzjoni. Mingħajr titwir mal-lewża, nistqarr li personalment ma naqbilx.

Dan mhux qed ngħidu minn rasi imma wara 30 sena li ili naħdem fil-qasam soċjali u wara snin naħdem ma’ min huwa mġarrab mid-droga.

Hawn qbil bejn kull min jaħdem fost dan il-qasam li l-persuna li tabbuża mid-droga hija persuna li għandha bżonn l-għajnuna u mhux il-kastig. Il-problema ta’ abbuż ta’ droga hija problema ta’ saħħa fis-sens wiesa’ tal-kelma. Min jabbuża mid-droga jagħmel dan għaliex għandu problemi AKBAR fil-ħajja tiegħu fejn labbuż tad-droga hija biss l-effett ta’ ‘weġgħat’ oħra.

Hemm qbil li persuna li tabbuża mid-droga l-ewwel għandha titressaq għal għajnuna u għas-sapport minflok għal kastig. Għaldaqsant irridu nitkellmu fuq id-dekriminaliazzjoni tal-persuna li jabbuża mid-droga.

Issa, il-Gvern Laburista jrid jagħmel pass ieħor. Bħala ġenitur, edukatur u anke bħala politiku ġdid ma nistax naqbel.

Kull tip ta’ droga hija ħażina u għandha tibqa’ illegali. Id-droga hija kollha droga! Kull droga twassal lil persuna fir-irdum tal-ħajja. Is-soċjetà għażlet li l-abbuż tad-droga jkun illegali għaliex dan l-abbuż jagħmel ħsara lill-persuna u lis-soċjetà kollha.

Għaldaqstant il-messaġġ għandu jibqa’ wieħed ċar: l-abbuż ta’ kull droga, inkluz dak tal-kannabis, huwa ta’ ħsara u għandu jibqa’ att illegali.

Jekk il-messaġġ ma jibqax wieħed ċar allura nistgħu nkunu qegħdin inwasslu messaġġ perikoluż: li wieħed jista’ jieħu ddroga, inkluz il-kannabis, u ma jkun qiegħed jagħmel xejn ħazin u ta’ ħsara.

Għalkemm mhux kull abbuż tad-droga jħalli l-istess effetti u konsegwenzi fuq il-persuna u s-soċjet., tajjeb li wieħed jifhem li dawk id-drogi hekk msejħa ‘soft drugs’ jistgħu jkunu meqjusa bħala gate way drugs li jwasslu għal drogi aktar qawwija, nuqqas ta’ saħħa mentali u stil ta’ ħajja negattiva għall-persuna u għas-soċjetà kollha. Diversi operaturi li ilhom jaħdmu fil-qasam soċjali jsostnu li hemmx abbuż ta’ drogi msejħa ‘soft’ u ‘hard’, imma hemm biss abbuż tad-drogi. Għalkemm mhux kull min pejjep il-ħaxixa spiċċa fil-vizzju tad-droga kbar bħala kokaina u eroina IMMA jidher ċar li dawk li għandhom il-vizzju tad-droga tal-kokaina/eroina lkoll bdew mill-ħaxixa! Dan mhux qiegħed ngħidu jiena, imma dawk stess li ġarrbu jew qegħdin iġarrbu din l-esperjenza!

Mhux dan biss. Nagħmel referenza għall-istudju xjentifiku tal-Kap tal-Psikjatrija f’Malta, Dr. Anton Grech. Dr. Grech wera biċċar li hemm rabta sħiħa u serja bejn użu tal-kannabis - anke dak soċjali – u l-mard mentali serju.

Diversi jsostnu li l-ikbar problema li pajjizna għandu mhix iddroga imma l-abbuż tal-alkaħol. Għalkemm naqbel li l-abbuż talalkoħol huwa l-akbar problema fil-pajjiż imma bħala ġenituri nistaqsi : “Meta diġ. fil-pajjiż għandha sustanza li hija ta’ ħsara (għalkemm legali għal min huwa ’il fuq minn 17-il sena), ikun għaqli li l-pajjiż jkollu problema oħra? Staqsi lil imġarrab, f’dan il-każ, il-ġenituri!

Il-fehma ta’ dawk li jgħidu li tajjeb li legalizzaw din is-sustanza biex b’hekk inkunu nistgħu nikkontrollaw is-suq, hi ’l bogħod mir-realtà. Min jaħdem f’dan il-qasam u min għadda minn din lesperjenza jaf sew li dejjem se jibqa’ is-suq iswed – anke jekk ikun hemm enforcement qawwi. Sfortunatament, dan naraw jiġri fil-qasam tal-alkoħol u anke tas-sigaretti. Għalkemm huwa suq regolizzat imma s-suq iswed huwa fostna u wieħed kbir u qawwi.

Bħala Sindku f’San Ġiljan nixtieq ukoll niġbet l-attenzjoni li filwaqt li diġà aħna għandha problema kbira taż-żgħażagħ fis-sakra, issa se jkollna wkoll żgħażagħ li huma mdamdim bil-ħaxixa fit-toroq tagħna? Dan se jfisser li se ikollna turisti tal-ħaxixa li jiġu apposta biex jindamdmu? Hija ironika li l-Kunsill u s- Sindku Famke Halsena ġewwa Amsterdam iridu ma jħallux aktar ikun hemm turiżmu għad-droga. Skont l-istess Sindku, it-turisiti għandhom jiġu għas-sbuħija tal-belt u mhux għad-droga!!

Il-messaġġ li qed jitwassal hija li l-kannabis mhix xi ħaġa kbira (no big deal) u għaldaqsant mhemmx għalfejn nagħmlu storja! Dan se jwassal biex tissaħħaħ il-mentalità. li l-kannabis mhix ta’ ħsara u żied il-kultura ta’ xejn mhu xejn u ‘jiena ħadd ma jindaħali’. Jekk ser nagħmlu dan, allura se nġibu l-ġebla fuq saqajna u fuq saqajna uliedna.

Hija aktar ironika għal Gvern li filwaqt li qiegħed jitkellem li jrid illegaliza d-droga (u qiegħed jagħmel dan biex jakwista ċertu voti), fl-istess waqt qiegħed joħroġ ammonti kbar ta’ flus mhux biss f’għajnunjiet lil dawk li jinsabu jfittxu l-għajnuna ġewwa s-Sedqa u l-Caritas imma wkoll qiegħed jibni dar terapewtika biex tilqa lil vittmi tad-droga!! X’ironija!

Nispera li min għandu jitkellem ma jibzax jagħmel dan. Nemmen li dħalna fil-politika mhux biex nidhru sbieħ imma biex l-abjad nibqgħu nsejjħulu abjad u l-iswed jibqa’ jissejjaħ iswed.

(Dan l-artiklu ġie ippublikat fuq il-gazzetta Il-Mument – 31 ta' Jannar, 2021)