Djar tal-ħġieġ

Simon Busuttil, b'differenza għall-Prim Ministru, ħa minnufih il-passi. Hu stqarr ukoll li lest li jkompli jieħu dawk il-passi meħtieġa. Ħadd mhu 'l fuq mil-liġi tal-integrità politika. Din hija l-politika li qed tagħmel u se tkompli tagġmel differenza bejn il-Partit Laburista u dak Nazzjonalista.

F'dawn is-sentejn u nofs tat-tmexxija Laburista, kellna sensiela ta’ skandli. Biżżejjed insemmu l-iskandli ta’ Cafè Premier, l-iskandlu tal-eks- Ministru Manuel Mallia jew ta' Strada Zekka. Wieħed ma jistax ma jsemmix lanqas diversi ħatriet u psewdo kunsulenzi lil tal-qalba, kollha b’pagi u perkaċċi skandalużi. L-aħħar skandlu li qiegħed jifni lit-tmexxija Laburista ġej mill-ħruġ tal-visas mogħtija minn eks-Ambaxxatur fl-Alġerija. Wara l-iskandli tal-ħruġ tal-visas Libjani u ntriċċi li jidher li kien imdaħħal sew fihom Joe Sammut, eks-teżorier tal-Partit Laburistta, issa jmiss l-visas mill-Alġerija. Donnu l-Gvern Laburista ma jistax jieħu r-ruħ mill-iskandli. Wieħed wara l-ieħor. Wieħed isbaħ mill-ieħor. Wieħed inessi lill-ieħor. Quddiem dan kollu, il-Prim Ministru jidher li waqa’ fil-muta. Editorjal fuq gazzetta lokali laqgħat il-musmar fuq rasu meta staqsa fejn huwa u x’se jagħmel il-Prim Ministru quddiem laħħar skandli?

F’dan il-kuntest kollu, il-ġimgħa li għaddiet tħabbar il-każ sfortunat ta’ Joe Cassar. Qiegħed nuża l-kelma ‘sfortunat’ għaliex ħadd ma jieħu gost jisma’ b’dawn l-istejjer, aktar u aktar meta l-persuna nvoluta hija meqjusa u miżmuma bi stima. Ninsab ċert li l-Joe Cassar huwa kapaċi jiddefendi lilu nnisfu. Il-verità teħlisna. Imma huwa importanti li nibqgħu nsostnu li l-abjad jibqa’ abjad u l-iswed jibqa’ iswed. Jekk dak li ntqal huwa minnu, allura hemm prezz x’wieħed irid iħallas. Din hija l-politika onesta. Politika ta’ integrità. Politika nadifa. Politika ta’ standards. Simon Busuttil, b’differenza għall-Prim Ministru, ħa minnufih il-passi meħtieġa. Hu stqarr ukoll li lest li jkompli jieħu dawk il-passi meħtieġa. Ħadd mhu ‘l fuq mil-liġi tal-integrità politika. Din hija l-politika li qed tagħmel u se tkompli tagħmel differenza bejn il-Partit Laburista u dak Nazzjonalista.

Li niskanta u nibqa’ nitnixxef huwa li, filwaqt li l-Partit Laburista jagħżel li jagħmel ‘storja’ fuq dan il-każ,

idawwar l-attenzjoni tal-media kollha tiegħu (forsi l-poplu ma jibqax jiffukat fuq l-iskandli fi ħdanu?) u jibgħat lill-Ministru Cardona biex waqt konferenza stampa jagħti lecture fuq onestà politika lill-Partit Nazzjonalista, l-istess Partit jagħżel li jinsa li fi ħdanu hemm ferm u ferm aktar skandli serji. Il-Partit Laburista jagħżel li jkun selettiv.

Donnhom ċerti persuni wkoll huma selettivi meta jagħzlu biex ikkummentaw. Għalkemm dak li huwa ħażin jibqa’ ħażin u qatt ma għandu jkun ġustifikat imma bejn każ u ieħor hemm miljuni ta’ ewro differenza. Għaldaqstant jekk wieħed jagħżel jikkumenta fuq il-każ ta’ Cassar, għandu jkun biżżejjed kredibbli u konsistenti u jgħaddi l-istess kummenti fuq skandli oħrajn. Dak li jgħodd għal wieħed, għandu jgħodd għal ħaddieħor.

Imma donnu li l-Partit Laburista u dawk li jagħżlu li jikkummentaw jippreferu jagħżlu li ma jkunux kredibbli. Il-Partit Laburista jagħżel li jara biss it-tibna f’għajnejn ħaddiehor u jinsa t-travu li hemm f’għajnejh. Il-Partit Laburista donnu jagħżel li jitfa' l-ġebel meta huwa nnifsu jinsab jgħix f’dar tal-ħġieġ. Diversi Ministri u ‘ħbieb tal-ħbieb’ jinsabu jgħixu fid-‘djar tal-ħġieġ’. Biżżejjed wieħed isemmi lil Michael Falzon u r-rapport imħejji mill-Awditur imqabbad mill-istess Gvern. Dan ir-rapport sab li l-artijiet mogħtija lil Gaffarena bħala kumpens għal xiri tal-Palazzino fil-Belt ġew valutati ferm aktar milli dak mistenni. Biżżejjed li wiehed isemmi lil Ian Borg u li dan qiegħed jiġi investigat mill-Kumissjoni kontra l-Korruzzjoni dwar allegat abbuż ta’ poter!

Biżżejjed wieħed isemmi kif ingħataw 164 kuntratti ta’ kunsulenzi b’nefqa totali ta’ €3.2 miljuni u lil min dawn ġew mogħtija! Biżżejjed li wieħed isemmi kif ċerti persuni qegħdin jingħataw promozzjonijiet u ħatriet fl-entitajiet tal-Gvern. Per eżempju, fl-Awtorit. tad-Djar, il-23 post intern li kien hemm dan l-aħħar, ingħataw lil persuni li din il-gazzetta kienet żvelat isimhom ftit jiem biss wara li ħarġu s-sejħiet! Dan ifisser li qabel ma kienu saru l-interviews, il-persuni kienu diġ. magħżulha! Imma jekk wiehed irid jislet tagħlima li tgħodd għal kull min huwa fil-politika, inkluż għalija u għall-kollegi ġodda fil-Parit Nazzjonalista u anke fi ħdan il-Partit Laburista, hija li jekk irridu nsaħħu d-demokrazija, ejjew naraw lid-‘dar politika’ tagħna ma tkunx tal-ħġieġ! Għalkemm il-ħajja personali u ntima tagħna għandha tibqa’ tagħna, tibqa’ rispettata u mħarsa dejjem minn kulħadd, ejjew inżommu ‘l bogħod minn min jista’ issa jew ‘il quddiem jtellef l-integrità pubblika u l-onestà politika tagħna.

Meta jkollna politiċi li jgħixu fid-‘djar tal-ħġieġ’, ifisser li mhux biss il-partit u l-persuna li jkunu mhedda imma listess demokrazija f’pajjiżna.

(Dan l-artiklu ġie ippublikat fuq il-gazzetta Il-Mument – 8 ta' Novembru, 2015)