Fi triqtu lejn Damasku

Fid-dawl li l-Partit Laburista spiċċa biex kompla jagħmel ħerba sħiħa fil-kwistjoni ambjentali, il-PN qiegħed ikun il-vuċi ewlenija.

Matul din il-ġimgħa ċċelebrajna l-konverżjoni ta’ San Pawl. Minn persuna tiġri wara l-Insara spiċċa jiġri mad-dinja magħrufa ta’ dak iż-żmien bħala l- Appostlu tal-Ġnus. Mill-kitba tal-Appostli nsibu li din il-bidla seħħet fit-triq lejn Damasku. Kien proprju f’din it-triq li Sawl sar Pawlu!

Għaliex qiegħed ngħid dan?

Donnu l-Partit Nazzjonalista wkoll għadu kemm għadda mit-triq ta’ Damasku! Jidher li anke l-PN ‘ikkonverta’! Dan grazzi għall-ħeġġa ta’ Simon Busuttil u t-tim kollu tiegħu.

Il-PN għadu kemm ħabbar dokument ieħor ta’ politika aġġornata. Dan huwa dwar l-ambjent bit-titlu ‘Għal kwalità ta’ ħajja aħjar’. Huwa dokument li mhux biss jagħmel unur lil dan il-Partit, li mill-Oppożizzjoni qiegħed ikun partit proattiv, imma li qed jiġbor wiċċ il-PN fi kwistjonijiet ambjentali!

Għalkemm il-PN ħadem qatigħ f’diversi oqsma u l-ambjent għamel ukoll passi ’l quddiem, kien hemm mumenti meta l-ambjent ma kienx mogħti l-importanza meħtieġa. Dan kien l-imgħoddi.

Fid-dawl li l-Partit Laburista spiċċa biex kompla jagħmel ħerba sħiħa fil-kwistjoni ambjentali, il-PN qiegħed ikun il-vuċi ewlenija. Fimkien ma’ għaqdiet ambjentali oħra, tkellem b’mod ċar fuq il-ħsara tal-bini fiż-Żonqor, dwar il-bini ta’ torrijiet fl-Imrieħel, Townsquare f’Tas-Sliema u dwar it-22 torri proposti fil-masterplan ta’ Paceville.

F’dan id-dokument, Simon Busuttil jistqarr li bħala mexxej se jaħdem biex il-ħarsien ambjentali jkun fil- Kostituzzjoni. Huwa qiegħed jorbot lill-PN li jwettaq pjan sħiħ mifrux fuq diversi snin. Din hija roadmap ambjentali ċara. Id-dokument kien mibni fuq feedback li ngħata minn dawk kollha li għandhom għal qalbhom l-ambjent, dan id-dokument fih ’il fuq minn 170 proposta.

Dan id-dokument mhux biss jagħti ħarsa lejn l-ambjent fis-sens dejjaq tal-kelma, jiġifieri fuq il-bini (kif ħafna drabi nifhmu), imma jitkellem fuq l-ambjent b’mod sħiħ fosthom il-politika dwar il-problema talħsejjes, il-kwalità tal-arja, l-iżvilupp urban, l-importanza tal-ħarsien tal-art li tinsab barra miz-zona taliżvilupp (ODZ), il-bijodiversità tal-ambjent, fuq l-ilma u l-iskart.

Ħadt gost naqra fuq il-ħtieġa li nħarsu dak li bl-Ingliż jissejjaħ skyline tagħna. L-iskyline huwa dwar il-bini għoli. Huwa ġust li biex wieħed jibni fl-għoli u jagħmel il-qligħ jispiċċa biex iħassar il-vista tal-lokalità? Huwa ġust li biex wieħed jispiċċa jitfa’ lill-oħrajn jgħixu fiddell jew fid-dlam li jġib miegħu l-bini għoli? Dan il-punt huwa importanti għax bħalissa hawn ġenn kbir biex wieħed jibni t-torrijiet! Dan se jħalli impatt fuq l-iskyline għax dawn it-torrijiet se jkunu jidhru minn kullimkien u mhux se jaqblu mal-kumplament tal-madwar.

Sentenza li tinsab f’dan id-dokument, li hija miktuba minn Simon Busuttil, hija li l-‘ambjent huwa r-riflessjoni tal-valuri tagħna’. Din hija espressjoni li mhux biss turi kemm Simon Busuttil jemmen bis-sħiħ fil-ħarsien tal-ambjent, imma turi verità. Jekk nemmnu filvalur tal-arja tajba, allura rridu nemmnu fl-ambjent. Jekk nemmnu fil-valur tal-kwalità tal-ħajja, allura ejjew inħarsu l-ambjent fis-sens wiesa’.

Nistieden lil min verament iħobb il-politika serja u aktar mit-teatrini biex jagħmel ħiltu u jaqra dan id-dokument. Wieħed jista’ jibgħat email fuq idea-ambjent@pn.org.mt.

Min jitgħallem mill-iżbalji tiegħu juri li huwa persuna matura u mhux persuna dgħajfa. Meta San Pawl biddel fehmtu fi triqtu lejn Damasku kienu diversi dawk, fosthom San Pietru, li ddubitaw minnu! Imma lkoll nafu li d-dubji tagħhom spiċċaw meta huma f'dawh u tawh ċans juri d-determinazzjoni sinċiera tiegħu.

Jalla l-poplu jafda u jagħti ċans lid-determinazzjoni ta’ Simon Busuttil li jbiddel il-mod kif nagħmlu l-politika. Jekk jiġri dan, allura verament l-ambjent jista’ ikun ‘tagħna lkoll’!

(Dan l-artiklu ġie ippublikat fuq il-gazzetta Il-Mument – 29 ta' Jannar, 2017)