Għall-kapitlu li jmiss

Filwaqt li nifraħ lil dawk li ġew eletti bħala Membri tal-Parlament, ġentilment nagħraf li b’dan ir-riżultat issa ser inkun qiegħed nagħlaq il-kapitlu politiku tiegħi b’sens ta’ serenità kbira.

Ritratt ta' Erika Lanzafame

Kull bidu fih it-tmiem

F’ħajti kelli diversi kapitli – saċerdot/patri Kappuċin, għalliem, maniġer, kap eżekuttiv, viċi sindku, sindku, deputat. Kull kapitlu kellu s-sabiħ u l-isfidi tiegħu.

Matul dan il-kapitlu politiku dejjem għamilt ħilti biex inkun leħen għall-ġid komuni u għar-residenti. Dejjem għażilt li nagħmel politika ta’ valuri li tħares l-interessi tal-ĦAFNA aktar milli l-interessi tal-‘ftit’. Dan kien l-għan aħħari tiegħi.

Ninsab kburi li matul dan iż-żmien dejjem bqajt konsistenti mal-valuri tiegħi, anke meta ma kienx faċli li nagħmel dan jew kont taħt pressjoni biex ma nagħmilx hekk.

Dan ifisser li ħiereġ mill-kapitlu politiku kif dħalt, b’subgħajja dritti!

Għall-valuri li nemmen fihom lest inħallas kull prezz li hemm bżonn.

Madankollu, għalkemm ser nieqaf inkun politiku f’partit, xorta waħda se nkompli nkun attiv bħala ċittadin privat u se nibqa’ nsemma’ leħni b’mod assertiv u aktar liberu fuq temi li nemmen bis-sħiħ fihom. Dak li kont nemmen fih, ser nibqa’ nemmen fih. Din tfisser il-konsistenza.

It-temi għal qalbi huma: l-ambjent fis-sens wiesa’ tiegħu, l-għożża lejn l-annimali KOLLHA, il-ġustizzja soċjali u l-inklużjoni. Dan ser inkun qed nagħmlu permezz ta’ diversi ħidmiet fil-volontarjat u f’entitajiet oħra.

Min ħaseb li ser noqgħod nikbi xortija, qed jiżbalja. Għandna għajnejna fuq quddiem biex dejjem inħarsu ’l quddiem, aktar milli lura. Dejjem hekk kont u hekk ser nibqa’. Anzi, peress li issa m’iniex marbut ma’ ħadd, nista’ nkun aktar liberu biex inwassal l-opinjonijiet u l-ħsibijiet tiegħi. Mhux l-ewwel darba li Membru Parlamentari, ta’ naħa jew oħra, ikollu joqgħod lura milli jesprimi ruħu għaliex jibża’ li jitlef xi vot jew inkella ma jibqax f’għajnejn tajba mal-Kap jew mal-partit.

Nirringrazzja lill-PN

Nirringrazzja lill-PN għall-opportunitajiet li tani biex inservi lill-komunità bħala viċi sindku u sindku f’San Ġiljan u bħala Deputat.

B’mod partikolari nsellem lil Simon Busuttil, li kien minn tal-ewwel li emmen fija u nkoraġġieni biex nagħmel dan il-pass fl-arena politika. Nixtieq ukoll nirringrazzja lil numru ta’ kollegi oħra, miż-żewġ naħat, li ħdimt mill-qrib magħhom.

Grazzi lill-ħafna li dejjem kienu ta’ sostenn f’din il-mixja tiegħi, b’mod partikolari r-residenti ta’ San Ġiljan, il-mara u l-familja tiegħi.

Bil-Malti ngħidu, “meta jingħalaq bieb, jinfetaħ ieħor”.

Il-mixja u l-ħajja jkomplu… kif dejjem komplew!

Kif jgħidu bit-Taljan, ‘alla prossima’.

Għall-kapitlu li jmiss!

(Dan l-artiklu ġie ippublikat fuq newsbook.com.mt – 26 ta' Ġunju, 2026)