Gvern dahru mal-ħajt?
- Oct 22, 2023
- 3 min read
Il-Partit Nazzjonalista flok iwaħħal u jkeskes kontra l-importaturi, qiegħed minflok jipproponi li jagħti l-appoġġ u s-sostenn.
Din il-ġimgħa kelli l-opportunità li flimkien mal-kollega Mark Anthony Sammut nindirizza konferenza stampa f’isem il-Partit Nazzjonalista. It-tema ta’ din il-konferenza stampa kienet dwar l-għoli tal-ħajja u l-impatt li dan qiegħed iħalli.
Matul l-intervent tiegħi tkellimnt li l-għoli tal-ħajja mhux xi perċezzjoni jew inkella qiegħed jolqot fil-laħam il-ħaj lil xi kategorija tas-soċjetà u mhux oħra. Jidher ċar li kull kategorija tas-soċjetà tagħna qiegħdha ġġorr dan il-piż. S’intendi dawk li huma l-aktar vulnerabbli, bħal anżjani u single parents, qegħdin iħossuha ferm u ferm aktar.
Fil-fatt, biex dak li għidt ikollu bażi ta’ argument sod u mhux kliem fieraħ, ġbit l-attenzjoni għal studju professjonali li sar mill-General Workers Union. Dan l-istudju bl-isem: ‘A proposal towards the definition and estimate of the NATIONAL LIVING INCOME in Malta 2022’ jagħti stampa ċara tas-sitwazzjoni! F’dan ir-rapport/studju, jagħmel diversi kategoriji ta’ nies – bħal single parent b’wild wieħed, anzjani single, koppja b’wild wieħed jew aktar u koppja anżjani. F’paġna 74, ir-rapport jaħdem b’mod professjonali x’għandu jkun id-dħul tagħhom biex ikunu jistgħu jgħixu b’mod dinjituz. Għal aktar dettalji ara l-grafika numru 1.
Imma l-aktar ta’ tħassib huwa li f’paġna 80 ta’ l-istess rapport, dan jagħti persentaġġ ta’ kemm hawn persuni f’kull kategorija msemmija li ma jlaħħqux ma’ dan id-dħul neċessarju – ara l-grafika numru 2.
Pereżempju, single parent b’wild wieħed hawn 74% f’Malta li ma jaslux għal dan it-threshold u allura ma għandhomx ħajja diċenti! L-istess anzjani single, fejn hawn 71.6% minnhom li ma għandhomx dħul biżżejjed, filwaqt li koppji anzjani hawn 68.6% li ma għandhomx dan id-dħul!
Dan kollu jagħti stampa ċara li s-sitwazzjoni hija waħda serja u żgur li mhix aċċettabli.
Dan ikompli juri kemm il-Partit Nazzjonalista huwa korrett meta għal diversi xhur ilu jiġbed l-attenzjoni tal-Gvern Laburista fuq dan.
Min-naħa l-oħra, il-Gvern Laburista jidher li ma għandu l-ebda idea x’jagħmel u jinsab daru mal-ħajt. L-esperjenza tal-ħajja turina li meta wieħed ikun daru mal-ħajt, wieħed jispiċċa jwaħħal f’ħaddieħor biex ma jidhirx li huwa t-tort tiegħu. Hekk qiegħed jagħmel il-Partit Laburista!
L-ewwel waħħal dan l-għoli tal-ħajja fil-Covid 19, imbagħad waħħal fil-gwerra fl-Ukraina. Għalkemm dawn huma fatturi li żgur li hemm qbil li ma għinux u kulħadd fehma din, IMMA l-Gvern ma jistax jibqa’ jaħsel idejh u jippunta subajh lejn ħaddieħor. Għaliex qiegħed ngħid dan? Għaliex issa l-Gvern wara li waħħal fil-Covid u fil-gwerra, ISSA qiegħed iwaħħal u jkeskes il-poplu kontra l-importaturi, jiġifieri dawk li jġibu l-prodotti tal-ikel minn barra.
Jekk il-gvern jaf li hemm xi abbuż minn xi impurtatur, dan għandu jirraportah lil MCCAA, li hija l-entità li tara li ma jkunx hemm abbuzi u allura jħalli l-istituzzjonijiet jaħdmu kif iħobb jgħid il-Gvern stess. Fl-istess waqt, din l-attitudni mhix tajba u tagħmel ħsara lil kulħadd!!
Kien għalhekk li kemm il-PN, diversi MEP tagħna u kemm ukoll diversi msieħba soċjali kellhom kliem iebes għal dan.
Il-Partit Nazzjonalista flok iwaħħal u jkeskes kontra l-importaturi, qiegħed minflok jipproponi li jagħti l-appoġġ u s-sostenn. Araw x’differenza! Fil-fatt, il-PN qiegħed jipproponi li jkun hemm fond ta’ għajnuna biex jgħin lil importaturi fl-ispejjez loġistiċi tagħhom – transport u storage. Nafu li ħafna drabi fid-dawl li hemm spejjeż kbar biex jinġibu u jinżammu l-prodotti tal-ikel, dawn l-ispejjeż jispiċċaw jgħaddu fuq il-konsumatur. Għaldaqstant, il-proposta tagħna qegħda tgħin lil importatur ma jkollux spejjeż akbar u allura l-prodotti tal-ikel ma jkomplux jgħolew!
Proposta oħra li l-PN qiegħed jagħmel hija li l-COLA – jiġifieri dik iż-żieda li tingħata kull sena biex tagħmel tajjeb għal għoli tal-ħajja – ma tkunx intaxxata! Jekk din is-sena, skont il-mekkaniżmu (maqbul b’mod storiku meta l-PN kien fil-Gvern) ser ikun ta’ €13 żieda, allura kulħadd għandu jieħu dan l-ammont u mhux inqas!!
Tajjeb li ngħid li din il-proposta mhux biss hemm qbil fuqu mall-kamra tal-kummerċ u l-UĦM imma issa anke l-istess GWU qegħdha taqbel ma’ din il-proposta!
Imbagħad ikollhom il-wiċċ jgħidu li l-PN huwa bla ideat u negattiv!
Dawn huma żewġ proposti biss minn oħrajn li ser inkunu qegħdin ngħidu fiz-żmien li ġej.
Il-PN jibqa’ impenjat li jkun hemm ġustizzja soċjali fejn mhux aċċettabli li min jitbażwar biex jasal sal-aħħar tax-xahar, u hemm min qiegħed jiffanga u jitħanżer minn fuq dar il-poplu. L-istejjer ta’ korruzzjoni li ta’ kull ġimgħa qegħdin jinħarġu, juru verament kemm il-PL spiċċa korrott.
Il-PL jinsab daru mal-ħajt. Il-PL ma jistax ikun is-soluzzjoni, għaliex huwa parti mill-problema għal dan l-għoli tal-ħajja fejn jippremja lil tal-qalba u lil korrotti, filwaqt liċ-ċittadini onesti jagħtihom il-loqom.
(Dan l-artiklu ġie ippublikat fuq il-gazzetta Il-Mument – 22 t' Ottubru, 2023)