Id-diskors tieghi waqt il-Kunsill Ġenerali 2015: Nagħmlu Differenza
Insellem lil Simon Busuttil, Kap tal-Partit, lill-amministrazzjoni u lid-delegati kollha miġbura hawn dalgħodu.
Insellem ukoll lil dawk li qegħdin isegwuna permezz tal-mezzi tax-xandir b’mod partikolari lill-anzjani tagħna.
Ningħaqad ma’ sħabi u nsellem ukoll u nirringrazzja lin-nisa tas-sehem tagħhom fil-Jum il-Mara.
Ippermettuli nintroduċi lili nnifisi. Jismini Albert Buttigieg. Għandi 50 sena. Miżżewweg bit-tfal. Għalkemm jien wieħed mill-uċuħ ġodda tal-Partit Nazzjonalista, bit-tama li nkun parti mill-proċess tat-tiġdid ta’ dan l-istess partit u protogonist tal-ġejjieni tiegħu, imma għal dawn l-aħħar 30 sena kont naħdem f’diversi oqsma – fil-qasam soċjali, maniġerjali, reliġjuż u anke edukattiv.
Preżentament jiena naħdem ġewwa l-Caritas u sa ftit wara l-elezzjoni kont Kap Eżekuttiv fl-Awtorità tad-Djar. Ħdimt ġewwa Sedqa. Kont għalliem u għal fuq minn 12-il sena kont patri Kappuċċin b’diversi ħidmiet f’Malta u fil-Kenya.
Wara proċess ta’ riflessjoni lqajt l-istendina li saritli li mhux biss ikun Kandidat għal Elezzjoni Ġenerali fuq id-9 u l-10 Distrett imma anke kandidat għall-Elezzjoni tal-Kunsilli Lokali ġewwa San Ġiljan.
Għalfejn qiegħed nagħmel dan il-pass ‘il quddiem?
Hija l-intenzjoni tiegħi li nkun ċittadin attiv u mhux ċittadin passiv li jgerger biss.
Nixtieq nagħti sehmi, flimkien miegħek, biex nibni soċjetà aktar umana, soċjetà aktar ġusta u nklussiva fejn l-ebda persuna ma titwarrab fil-ġenb.
Għalkemm diversi drabi, meta wieħed isemmi l-kelma ‘politika’, jiġu f’moħħu stejjer ta’ politika żbaljata u esperjenzi negativi, jiena nagħżel li nżomm li l-politika bħala waħda minn diversi mezzi kif fis-soċjetà wieħed jista’ jagħmel differenza pożittiva fil-ħajja taċ-ċittadini l-oħra.
Il-motto li dejjem kelli huwa: Ħalli d-dinja ta’ madwarek ftit aħjar milli sibtha.
Dan l-għan jista’ jintlaħaq jekk il-politika tkun mibnija fuq ċerti valuri, fejn il-persuni jiġu l-ewwel – WHEN PEOPLE MATTER – (l-islogan tiegħi)
U l-persuni jiġu l-ewwel meta hemm: Politika li tisma’. Politika li tkun preżenti u Politika li timpenja ruħha.
Politika li tisma’
• Il-politika trid issib il-ħin u tieħu attitudni li tisma’ s-suġġerimenti, id-diffikultajiet, l-opinjonijiet, l-istejjer u l-aspirazzjonijiet ta’ kullħadd. Meta l-politika tieqaf tisma’, tispiċċa tingħalaq fija nnifsha u tispiċċa politika retorika tal-ftit;
• Meta tismgħu allura jkollna l-umiltà u kuraġġ ta’ awtokritika. Nagħrfu li mhux kull deċizjoni politika fil-passat kienet tajba biżżejjed. Għamilna ħafna ġid imma mhux kollox kien ‘ward u zahar’.
Politika li tkun preżenti
• Politika viċin in-nies tfisser politika li tkun ispirata mill-ħajja, ispirazzjoni u l-ġrajjiet ta’ kuljum;
• Ħidma politika li mhix mibnija daqstant dwari, dwar l-ambizzjonijiet jew il-proġetti tiegħi jew inkella x’nista’ nakkwista, imma hija DWARNA u dwar id-diffikutajiet u l-aspirazzjonijiet tagħna lkoll. Il-mentalità ta’ AĦNA trid tkun akbar mill-mentalità tal-JIENA.
Politika ta’ impenn
• Politika fejn Il-persuna hija fiċ-centru tal-ħsieb politiku u tħaddem politika b’kuxjenza soċjali. Politika soċjali ġusta tfisser meta l-persuna ma tkunx għas-servizz tal-ekonomija u l-profitt imma hija l-ekonomija u l-profitt li huma għas-servizz tal-persuna. Soċjetà li ma tiħux ħsieb persuni vulnerabli hija soċjetà li tilfet il-ġewwieni tagħha;
• Għalkemm sfortunatament dejjem se jibqa’ jkun hawn persuni li, għal raġuni jew oħra, se jaqgħu lura u xi wħud minnhom għandhom ‘faqar strutturali’, imma l-politika soċjali vera trid toffri mhux biss il-‘ħuta’ imma anke l-‘qasba’;
• Is-solidarjetà mhijiex pjaċir imma dmir. Is-solidarjetà mhijiex klijenteliżmu imma dinjità. Is-solidarjetà vera tagħti d-dinjità u mhux twassal għal dipendenza.
Nemmen li b’hekk biss nistgħu nagħmlu differenza: Politika li tisma – Politika li tkun preżenti – Politika ta’ impenn. Dawn huma l-egħruq tagħna.
F’ismi u f’isem il-Kandidati kollha li ħerġin għal kunsill f’San Giljan nixtiequ nwasslu l-appell ta’ għaqda. Flimkien biss b’saħħitna.
Għaldaqstant, aħna Tim wieħed – b’viżjoni waħda u b’għan wieħed: dak li nagħmlu differenza pożittivà fil-komunità tagħna.
Grazzi,
Albert