Il-gula
- Jul 19, 2015
- 3 min read
Jekk wieħed jagħti ħarsa madwaru jara tant persuni, anke f'karigi pubbliċi u politiċi, li donnhom għandhom din il-gula. aktar ma jkollhom poter, aktar iridu.
Fl-imgħoddi, fit-tagħlim tar-Reliġjon konna niġu mgħallma dwar is-sebat irjus tad-dnub il-mejjet. Dawn kienu sensiela ta' mġibiet li jwasslu lil-persuna biex taqa’ fil-vizzju. Dawn kienu l-għira, ix-xeħħa, iż-żina, l-għażż, ir-rabja, is-suppervja u l-gula.
Il-vizzju tal-gula huwa meta persuna, mhux biss tkun moħħha fl-ikel imma li tiekol u terġa’ tiekol mingħajr waqfien. Ir-Rumani tal-antik kienu jagħmlu ġranet sħaħ jieklu u meta ma kinux ikunu jistgħu jkomplu jieklu, kienu jispiċċaw jaqilgħu dak li jkunu kielu... biex b’hekk ikomplu jieklu! Bil-Malti ngħidu li verament kienu jitħanżru!
Il-gula mhix marbuta biss mal-kilba esaġerata għall-ikel, iżda hemm forom oħra tagħha. Hemm il-gula għall-poter u l-gula biex nakkwista. Jekk wieħed jagħti ħarsa madwaru jara tant persuni, anke f’karigi pubbliċi u politiċi, li donnhom għandhom din il-gula. Aktar ma jkollhom poter, aktar iridu. U waqt li qegħdin f’din il-ġirja sfrenata ta’ gula, ma jinteressahomx li hemm ħaddieħor li qiegħed jispiċċa barra ‘jittewweb’, imwarrab jew ibati. Kuntenti huma, kuntent kulħadd.
Gula għall-poter
Il-poter politiku huwa maħluq biex ikun ta’ servizz. Il-poter politiku qiegħed hemm biex jagħmel differenza fil-ħajja taċ-ċittadini. Il-politiku qiegħed hemm biex jaħdem qatigħ ħalli jtejjeb l-istrutturi tat-tmexxija. B’hekk ikun hemm qabża fil-kwalit. talħajja ta’ kull ċittadin, anke dak li qiegħed jgħix fuq ‘il-ħobża ta’ kuljum, agħtini llum’. Din hija responsabbiltà. kbira.
Nistqarr li fil-fatt, dan mhux dejjem qiegħed iseħħ. Ċerti Deputati tal-Gvern, il-ħbieb tal-ħbieb u diversi funzjonarji f’entitajiet pubbliċi (li ħadu posthom mhux bil-mertu imma fuq ‘bażi ta’ fiduċja’) qegħdin donnhom f’gula sfrenata għall-poter. Ilkoll nafu b’Deputati Laburisti li għandhom tliet pagi differenti jew erbgħa. Ħatra waħda mhix biżżejjed!
Ilkoll smajna b’karigi ta’ persuni li għaliex dehru fuq il-billboards jew kienu kandidati spiċċaw f’ħatriet b’pagi li jġibulek għajnejk wara widnejk. Ilkoll qrajna fuq ħatriet maħluqin apposta biex ċerti persuni jkunu sodisfatti fil-gula għall-poter tagħhom. Ilkoll qrajna kif persuni li ma saddux fil-kariga li ngħataw, reġgħu ngħataw kariga oħra biex issoddhom!
Ġirja sħiħa biex wieħed jaħtaf u jiekol mill-kejk Laburist! U waqt li sar u qiegħed iseħħ dan, oħrajn twarrbu, ġew umiljati u mċaħħda. Addijo l-għajta ‘Malta Tagħna Lkoll’!
Nistqarr mingħajr tlaqliq li matul l-amministrazzjonijiet Nazzjonalisti wkoll, ċerti persuni kellhom u għad għandhom gula għall-poter. Fejn hemm iz-zokkor, hemm id-dubbien. U bħad-dubbien, li kif jara z-zokkor dlonk imur għal fuqu, hekk dawn għamlu u għadhom jagħmlu. U waqt li llum il-PN qiegħed iħallas il-prezz tal-gula li kellhom, xi wħud minnhom issa qed iduqu mill-benna tal-Partit Laburista waqt li oħrajn qegħdin ipappuha fil-kwiet!
Gula li nakkwista
Forma oħra ta’ gula hija dik li wieħed jakkwista u jkollu aktar. Għalkemm huwa tajjeb li wieħed jaħdem qatigħ biex itejjeb ħajtu, dan għandu jsir b’limitu u b’rispett lejn il-liġi ċivili. Sfortunatament, ċerti negozjanti kbar u żviluppaturi huma tant maħkumin mill-gula tal-akkwist li qatt mhuma kuntenti b’dak li għandhom. Iridu jibnu aktar. Iridu jkabbru aktar. Iridu jakkwistaw aktar. U forsi għaliex il-Gvern Laburista huwa obbligat lejhom, jidher li huwa lest jissodisfahom! Jidher li fejn tidħol il-gula tal-akkwist, m’hemmx kuxjenza. Kollox jgħaddi. Kollox jgħodd sakemm wieħed jakkwista!
Ilkoll nafu bl-intriċċi tal-każ tal-Caf. Premier. Ilkoll smajna fuq l-artijiet mogħtija lil Gaffarena. Ilkoll qrajna fuq il-ħeġġa tal-Gvern li jagħti l-art taż-Żonqor lil negozjant mill-Ġordan. Ilkoll qegħdin nisimgħu fuq diversi negozjanti li jingħataw permessi jew jinbidlu l-policies biex jagħmlu tajjeb għall-ħtiġiet tagħhom.
U dawn huma l-ftit li nafu! Dan qiegħed jagħmel il-ħsara lid-demokrazija għaliex meta d-demokrazija tkun ‘immexxija’ minn min għandu l-gula għall-akkwist, il-pajjiż jitlef id-demokrazija.
Waqt li jseħħ dan, aħna ċ-ċittadini qegħdin nagħmlu tajjeb għal din il-gula. Quddiem il-gula kollha, tajjeb li wieħed jiftakar li dak li wieħed jakkwista minn fuq il-ħsara u d-deni ta’ ħaddieħor ma jitgawdiex fit-tul u fis-serenità!
(Dan l-artiklu ġie ippublikat fuq il-gazzetta Il-Mument – 19 ta' Lulju, 2015)