Il-Kotra

Il-kora fehmet l-korruzzjoni hija theddida għall-istess demokrazija tagħna. Jekk xi ħadd huwa korrott, se jmexxi b'mod korrott.

“Il-kotra qamet f’daqqa u għajtet: ‘Jien Maltija!” Hekk kiteb Rużar Briffa, meta l-Maltin qamu kontra l-ħakkiem barrani. Għalkemm fl-innu Malti, nitolbu bil-ħniena lis-Setgħani biex jagħti d-dehen u l-għerf lil min jaħkimna, mhux l-ewwel darba li l-poplu sab li t-talb mhuwiex biżżejjed! Mhux l-ewwel darba li induna li jrid jieqaf għas-suppervja u r-ras iebsa tal-ħakkiem! Mhux l-ewwel darba li l-kotra għarfet li l-ħakkiem huwa maqful f’torri tal-avorju, u jinsab f’sakra ta’ poter! Mhux l-ewwel darba li wriet li l-ħakkiem għandu bżonn jiġi f’sensih! Matul il-grajjiet tal-istorja, mhux l-ewwel darba li l-poplu ħa azzjoni qawwija! Mhux l-ewwel darba li semma’ leħnu u wera l-għadab tiegħu!

Biżżejjed infakkru l-kotra ta’ Dun Mikiel u sħabu, jew meta l-kotra qamet fis-Sette Giugno! Biżżejjed insemmu meta l-kotra qamet f’tal-Barrani, jew fl-Imnarja, u wettqet reżistenza passiva quddiem l-aggressività tar-reġim ta’ Mintoff u sħabu! Nagħmlu tajjeb ukoll jekk insemmu meta l-kotra qamet u vvutat kif ivvutat, fl-aħħar elezzjoni li għaddiet!

Leħen il-poplu huwa sovran: “Miskin min ikasbarni, miskin min jidħak bija!” Nhar il-Ħadd li għadda, il-poplu mill-ġdid semma’ leħnu lill-ħakkiem.

Wara aktar minn għaxar snin fl-Unjoni Ewropea, fejn id-demokrazija hija garantita, il-kotra ħasset il-bżonn li terġa’ tqum u ssemma’ leħinha. Hija ironika ferm aktar li wara tliet snin biss ta’ gvern Laburista, li tela’ bil-wegħda ta’ politika nadifa u ġdida, il-poplu kellu jerġa’ joħroġ isemma’ leħnu. U l-kotra miġbura hekk għamlet! Ma kienx hemm Nazzjonalisti. Ma kienx hemm Laburisti. Kien hemm miġbura l- Maltin. Kien hemm bandiera waħda: Dik Maltija.

Il-kotra miġbura kellha wkoll għajta waħda: “Shame on you !” Il-maġġoranza taċ-ċittadini huma onesti; li jaqilgħu l-ħobża tagħhom bl-għaraq ta’ ġbinhom; li jħallsu t-taxxi; li jħobbu lil pajjiżhom u jixtiequ l-ġid lil din “l-art li tatna ismiha.” Il-kotra fehmet li l-korruzzjoni hija theddida għall-istess demokrazija tagħna. Jekk xi ħadd huwa korrott, se jmexxi b’mod korrott. Jekk xi ħadd m’għandu ebda skruplu li jwettaq korruzzjoni, mhux ser ikollu ebda skruplu biex jibqa’ jiffanga u jiggranfa mas-siġġu tal-poter. Min għandu d-dell tal-korruzzjoni fuqu, ma jistax imexxi bis-serenita` meħtieġa. Għaldaqstant, quddiem l-akkużi serji ta’ korruzzjoni sistematika minn dawk stess li qegħdin imexxu pajjiżna, wieħed jifhem għalfejn il-kotra, li nġabret, kienet determinata u għajtet b’vuċi soda: “Shame on you!”

Wara tliet snin ta’ tmexxija Laburista u wara sensiela sħiħa ta’ stejjer ta’ korruzzjoni u skandli, il-kotra Maltija ma riditx tgħix f’soċjetà diżonesta u maħmuġa; ma riditx li wliedha jikbru f’soċjetà fejn xejn mhu xejn, u li kollox jgħaddi; ma riditx li hi u wliedha jgħixu f’soċjetà fejn il-korruzzjoni hija n-norma tal-ħajja u mhux l-eċċezzjoni. Il-kotra miġbura wasslet messaġġ ċar li mhux ser tittollera aktar lil min jinqeda biha biex jiffanga u jsir sinjur minn fuq daharha: “Shame on you!”

Hija tal-mistħija li jkollok Ministru u dak li jmexxi l-Uffiċċju tal-Prim Ministru, li jkollhom kumpaniji u kontijiet il-Panama, magħrufa aħjar bħala l-ġenna ta’min irid jevita t-taxxa u jaħsel flusu li ġew minn attivita’ kriminali jew illegali: “Shame on you!”

Hija tal-mistħija li, filwaqt li seħibhom, il-Ministru tal-Finanzi (li donnu waqa’ fil-muta), qiegħed jagħmel ħiltu kollha biex jara li ebda Malti ma jevita t-taxxi u, saħansitra, iħarrek lil min evita t-taxxi, dawn is-sinjuri jippjanaw li, fis-sigriet u fil-ħemda, jiftħu kontijiet u kumpaniji, li jwasslu biex jevitaw it-taxxa: “Shame on you!”

Hija tal-mistħija li, filwaqt li l-gvern jiġri wara dawk li jabbużaw mis-servizzi soċjali, mingħajr lanqas jagħti kas, forsi, tal-vulnerabbiltà tagħhom; waqt li l-pensjonanti jippruvaw jaraw kif se jwasslu sal-aħħar tax-xahar; waqt li persuni morda bil-kanċer jittalbu lill-President biex tgħinhom ikollhom il-kura meħtieġa, il-Ministru u martu jkomplu jiffangaw mingħajr mistħija ta’ xejn: “Shame on you!”

Id-diskors ta’ Simon jikxef persuna determinat; li qed tikber, kull ġurnata, f’mexxej onest li jista’ jagħtina, verament, il-bidla li wiegħed, b’tant pompa, il-Partit Laburista, imma li m’għamilhiex.

Kif Busuttil ħadem qatigħ biex Malta tingħaqad mal-UE, issa huwa l-mexxej li jrid jgħolli l-livell tad-demokrazija f’pajjiżna. Bħala mexxej ta’ partit u ta’ gvern futur, mhuwiex se jittollera ebda korruzzjoni, u dan diġà wrieh bil-fatt, fi ħdan il-partit tiegħu stess. Għaldaqstant, il-messaġġ tiegħu kien anki għall-PN. L-iżbalji tal-passat għandhom ikunu tagħlima għalina lkoll.

Il-bniedem għandu bżonn ukoll valuri u prinċipji sodi li jiggwidawh. L-onestà hija l-valur fundamentali tas-soċjetà. Nhar il-Ħadd, il-kotra qamet u għajtet: “Jiena Maltija! Jiena rrid politika ONESTA!” “Miskin min ikasbarni, miskin min jidħak bija!”

(Dan l-artiklu ġie ippublikat fuq il-gazzetta Il-Mument – 13 ta' Marzu, 2016)