Il-liġi f’San Ġiljan hija optional?

Xi wħud jippretendu li l-liġi hija għal oħrajn u mhux għalihom.

Għalkemm skont il-mizuri mħabbra mill-Awtorità tas-Saħħa Pubblika, attività tal-massa ma jistgħux isiru, xorta waħda f’San Ġiljan u f’Paceville qed ikun hawn ‘street parties’. Xi wħud jgħidu li dawn huma ‘spontanji’ imma lkoll nafu li fil-ħajja u f’Malta xejn mhu spontanju. Dawn huma organizzati minn ċertu ħwienet u sidien li jitfgħu l-ġebla u jaħbu jdejhom!

Matul din il-ġimgħa, erġajna kellna street party ieħor. F’dan il-każ, kellna mhux biss folla ta’ żgħażagħ u oħrajn fuq xulxin u f’massa bil-mużika ddoqq, imma wkoll xi wħud qalgħu arblu li fuqu kien hemm tabella biex wieħed iżomm il-kwiet u jiftakar li hemm residenti wkoll jgħixu hemm, u spiċċa għamlu burdell biha! Diversi dehru mhux biss jiżżufjettaw biha f’idhom imma anke spiċċaw biex ivvandalizzawha!

Bħala Sindku u bħala ċittadin attiv mhux biss nikkundanna dan l-aġir, imma spiċċajt nikteb lill-Kummissarju tal-Pulizija Anġelo Gafà u lill-Ministru Camilleri responsabbli mis-Sigurtà Nazzjonali.

Għalija u għal diversi residenti, dawn l-istreet parties li jibqgħu sal-5 ta’ filgħodu mhuwiex aċċettabbli u huma insult lir-residenti tagħna u anke jmorru kontra l-valuri taż-żamma tal-ordni. Biż-żufjett ta’ dan is-sinjal kien ifisser żufjett fuq id-direttivi tas-saħħa pubblika u fuq il-bon ordni.

Għaldaqstant kemm lill-Kummissarju u kemm lill-Ministru staqsejthom jekk il-liġi f’Paceville u f’San Ġiljan hiex waħda optional, jiġifieri wieħed jista’ jagħżel li jsegwiha jew le?

Nixtieq li nkun naf għaliex jekk mhix optional, allura nista’ u nippretendi li l-Pulizija tagħmel xogħolha u tinforza l-liġi għal kulħadd. Jekk minn naħa oħra hija ‘optional’, allura anke r-residenti tagħna għandhom jagħżlu fejn u meta jixtiequ jsegwu l-liġi!!

Kontra qalbi nistqarr li f’Paċeville/San Ġiljan, il-liġi hija optional għal ċertu persuni fejn dawn iħossuhom li jistgħu jagħmlu li jridu – untouchables! Xi wħud jippretendu li l-liġi hija għal oħrajn u mhux għalihom. Hemm liġi tal-allat u hemm liġi għal oħrajn. Dawn it-talin jispiċċaw jagħmlu li jridu u jġibu rwieħhom kif iridu. Donnhom jafu li ħadd mhu ser ikellimhom!

Fil-kitba tiegħi lill-Kummissarju u lill-Ministru għamilt numru ta’ mistoqsijiet, fosthom:

• Fejn kienet il-Pulizija quddiem din il-folla? Kien maħruġ permess għal dan l-istreet party? Jekk ma kienx hemm permess allura għaliex ma twaqqfux kif twaqqfu attivitajiet oħra?

• Din il-folla nżammet kontra d-direttivi tas-Saħħa Pubblika? Għaliex ħadd ma kien bil-maskra kif obbligat mill-istess direttiva? Hija inġusta li membri fil-komunitaà tagħna, b’mod partikolari anzjani, kienu mħarrka filwaqt li dawn setgħu jagħmlu li jridu?

• Dan l-inċident jagħmel għajb l-isforzi kollha ta’ kulħadd biex ikollna turiżmu ta’ kwalità. Dawn huma t-turisti li nixtiequ fejn iż-żamma tal-ordni ma kenitx osservata? Din l-imġiba hija riklam tajjeb għal dawk it-turisti serji?

• Quddiem dan iż-żufjett tal-liġi, kif iħossu l-Kummissarju b’responsabbiltà li liġi tkun imħarsa u mwaqqa’ għaż-żufjett?

• Min ser jagħmel tajjeb għall-ħsara tal-propjetà pubblika? Il-Kunsill ma jistax jibqa’ joħroġ u jħallas għall-vandaliżmu ta’ ħaddieħor.

• F’San Ġiljan hawn bye law li ma tħallix konsum ta’ alkoħol fil-fliexken. Din qiegħda tkun infurzata?

Fl-aħħarnett, f’isem ir-residenti nħossu li din is-sitwazzjoni ma tistax tibqa’ għaddejja qisu mhu xejn! Ir-residenti tagħna għandhom DRITT li jgawdu l-ħajja u l-propjetà tagħhom fil-kwiet bħal kulħadd. Diġà aħna qegħdin inbatu minħabba diversi fatturi, fosthom il-kostruzzjoni bla rażan, it-trab, traffiku, krejnijiet, platforms tal-inwejjed u siġġjiet!

Ir-residenti ta’ San Ġiljan/Paceville huma RESIDENTI U ĊITTADINI daqs kulħadd!

Allura għaliex ma nistgħux ingawdu dan id-dritt u li l-Korp tal-Pulizija suppost bil-liġi għandu jħares? Kieku dan l-istreet party inżamm quddiem id-dar tal-Ministru jew tal-Kummissarju, x’kienu jagħmlu? Għaliex l-istorbju, l-għajat, l-imġiba oxxena hija ttollerata anke sa sbieħ filgħodu?Għaliex ir-residenti dejjem iridu jbatu u ċertu negozjanti dejjem jieħdu dak li jridu?

Bħala Sindku ta’ din il-lokalità u bħala kandidat għall-elezzjoni ġenerali, huwa fid-dmir li nkun il-vuċi ta’ diversi li issa xebgħu b’dan in-nuqqas ta’ infurzar tal-liġjiet.

(Dan l-artiklu ġie ippublikat fuq il-gazzetta Il-Mument – 8 ta' Awwissu, 2021)