Il-miżien tal-ħajja

Hija t-tama li l-2018 tkun sena li matulha mhux biss naqdu d-dmirijit u r-responsabbilitaijiet varji tagħna, imma nagħrfu ndawru d-diffikultaijiet, li kellna fl-2017, fl-opportunitajiet li jsarrfu f'Malta aħjar.

Ninsabu fl-aħħar jum tas-sena 2017. Iż-żmien igerbeb. Huwa fl-interess ta’ kull persuna li tara kif qiegħda tqatta’ dan iż-żmien. Persuna li ma tħarisx lura u ma tgħarbilx sew kif għexet, tispiċċa, ħafna drabi, biex tirrepetti l-istess żbalji li tkun bkiet fuqhom. Minbarra li hemm il-miżien li bih inkejlu u niżnu l-piż tal-oġġetti, hemm ukoll il-miżien tal-ħajja.

Il-miżien tal-ħajja jurina l-bilanċ ta’ dak li nkunu wettaqna waqt li jikxef ukoll l-iżbilanċ ta’ dak li ma wettaqniex.

Għaldaqsant tajjeb li nistaqsu jekk l-2017 kinitx sena li fiha konniex forza għat-tajjeb jew agenti għall-ħażin? Konna piż għal ħaddieħor jew inkella forċina għall-oħrajn?

Fuq livell personali

Għalija personalment, din is-sena kellha ftit minn kollox. Sigurament, l-akbar ħaġa li kienet ta’ diżappunt għalija, kienet, mhux daqstant li ma kontx elett fl-aħħar elezzjoni ġenerali jew inkella għaliex il-PN tilef l-elezzjoni, imma li nara lil ċerti ‘poltiċi’ u dawk ta’ madwarhom jitbiegħdu mill-prinċinpji fundamentali. Min-naħa l-oħra, l-akbar sodisfazzjoni kienet il-familja tiegħi, id-dar tal-ġenituri tiegħi li erġajt dħalt ngħix fiha, il-programm soċjali ta’ kull ġimgħa, Waħdek m’intiex fuq Fliving Channel, u l-ħidma tiegħi fil- Kunsill ta’ San Ġiljan bħala Viċi Sindku. Dawn poġġew ilmiżien tal-ħajja fuq in-naħa li għamlu din is-sena interessanti, sabiħa u tajba.

Fuq livell nazzjonali

Żgur li din is-sena kienet sena diffiċli ħafna għal pajjiżna. Dan qiegħed ngħidu mhux għaliex tlifna l-elezzjoni. L-elezzjoni kienet pass ieħor fil-mixja demokratika.

Min-naħa l-oħra, għalkemm pajjżna kompla miexi ekonomikament 'il quddiem, fl-istess nifs, kompla mar lura bħal qranċ fil-qasam etiku u ċivili. Matul is-sena 2017, inħoss li kompliet tikber fostna l-mentalit. ta’ xejn mhu xejn, li kulħadd jista’ jagħmel li jrid u jgħid li jrid, u li ħadd ma jista’ għal ħadd. Matul 2017 żdiedet il-kilba u l-eġoiżmu sfrenat ta’ ċerti żviluppaturi u negozjanti li ssoktaw jirvinaw l-ambjent għall-gwadann tagħhom.

Rajna wkoll lil pajjiżna jkompli jaqa’ lura fil-governanza tajba. Għalkemm nistqarr li l-Gvern Laburista wettaq miżuri tajbin u ta’ benefiċċju, ħammrilna wiċċna fil-komunità Ewropea. Matul din is-sena, komplejna naraw sensiela ta’ korruzzjoni, abbuż ta’ poter u nepotiżmu sfrenat. Matul din is-sena, komplejna naraw li donnu kull dipartiment jew entità tal-Gvern tispiċċa każin Laburista!

Żgur, mhux forsi, li l-akbar ġrajja li, tappnet lil pajjiżna kienet il-qtil brutali ta’ Daphne Carunana Galizia. Għalkemm wieħed jista’ ma jaqbilx ma’ kull ħaġa li kienet tikteb, grazzi għall-kitba tagħha, ċerti stejjer serji ta’ korruzzjoni saru magħrufa. Żgur ukoll li ħadd m’għandu jispiċċa ħajtu b’dan il-mod brutali. Minn din l-istorja rajna wkoll lis-Soċjetà Ċivili tqum u ssemma’ leħinha, u tistqarr li dan mhux aċċettabbli! Issa, it-tama hija li l-poplu jkun jaf min qabbadhom biex jagħmlu dan! Malta onesta ma tridx nofs ġustizzja imma ġustizzja sħiħa!

Fuq livell ta’ Partit

L-2017 kienet sena diffiċli għall-PN. Mhux biss il-Partit tilef l-elezzjoni għat-tieni darba (u fiċ-ċirku demokratiku din hija xi ħaġa normali li wieħed jista’ jistennieha) imma lelezzjonijiet interni tagħna fetħu feriti li wieħed ikun żbaljat jekk jipprova jinjorahom. Għalkemm il-kritika ġenwina u ddifferenzi fl-ideat m’għandhomx ikunu meqjusa bħala att ta’ tradiment, huma sinjal ta’ maturit. politika għax, fl-istess waqt, rajna Nazzjonalisti kontra Nazzjonalisti oħrajn. Tajjeb li nifakru, li dar maqsuma ma żżommx wieqfa fit-tul! Jalla matul l-2018 ikun hemm persuni kuraġġużi biżżejjed biex jitħallew jaħdmu ħalli jinbnew il-pontijiet meħtieġa! Malta demokratika għandha bżonn Opożizzjoni b’saħħitha u kredibbli!

Hija t-tama li l-2018 tkun sena li matulha lkoll kemm aħna mhux biss naqdu d-dmijiriet u r-responsabbiltajiet varji tagħna, imma wkoll li nagħrfu ndawru d-diffikultajiet, li kellna fl-2017, fl-opportunitajiet li jsarrfu f’Malta aħjar. Biex iseħħ dan, il-miżien tal-ħajja jrid ixaqleb lejn in-naħa t-tajba!

Nawgura s-Sena t-Tajba lil kulħadd!

(Dan l-artiklu ġie ippublikat fuq il-gazzetta Il-Mument – 31 ta' Diċembru, 2017)