Il-PA hija fuq il-Qorti?

Din id-deċiżjoni skandaluża mhux biss tmur kontra l-liġijiet ambjentali u l-policies tal-istess Awtorità IMMA hija deċiżjoni li tmur kontra s-saltna ta’ dritt – rule of law – f’pajjiżna! Għaliex forsi wieħed jistaqsi?

F’Marzu li għadda, il-Qorti permezz tal-Prim Imħallef, iddeċidiet li l-permessi għal penthouses u pixxina f’Ta’ Sannat, li huma parti minn żvilupp proġettat mill-iżviluppatur Joseph Portelli, huma mhux biss illegali imma, fi kliem il-Prim Imħallef, anke ‘assurdi’!

Is-sentenza kienet waħda ċara. Il-penthouses u anke l-pixxina kellhom jitwaqqgħu u jitneħħew!

Imma oħroġ il-għaġeb, forsi għaliex xi wħud ingħataw l-arja li jistgħu jaħsbu li l-liġijiet ta’ pajjiżna jgħoddu għalina biss u mhux għalihom, saret applikazzjoni ġdida, PA 3869/24, minn ċertu Indjan Tarlochan Singh li ddikjara li mhuwiex is-sid, biex dawn il-penthouses illegali jkunu sanzjonati! Fi kliem ieħor, kien hemm talba biex strutturi li ġew iddikjarati mill-Qorti li huma illegali, ikunu approvati! Trid vera ma jibqgħalekx żejt f’wiċċek!

U oħroġ aktar il-għaġeb li l-Awtorità tal-Ippjanar spiċċat approvat din it-talba! U biex l-Awtorità tidher li hija serja u li ħadd ma jgħaddiha biż-żmien (sic!) tat multa ta’ €150 lill-iżviluppaturi!! Nidħak jew nibki?

B’din id-deċiżjoni, ikompli toħroġ ċar li din l-Awtorità hija waħda mil-kawżiet tal-ħsara ambjentali f’Malta! Din id-deċiżjoni turi li din l-Awtorità mhix Awtorità kif kienet maħsuba biex tkun imma spiċċat pupazz ta’ numru ta’ żviluppaturi! B’din id-deċiżjoni nkompli nikkonviċi ruħi li jekk irridu nħarsu l-ambjent tagħna, hemm bżonn ta’ riformi kbar f’din l- Awtorità.

Imma lil hinn mill-fatt li din l-Awtorità qiegħda tkompli tħeġġeġ u tippromwovi l-mentalità ta’ ‘build first, sanction later’, jiġifieri il-mentalità ta’ ħarbat u gerfex b’mod illegali l-ewwel u mbagħad ejja nirranġawlek’, din id-deċizjoni hija waħda perikoluża u se toħloq preċedenti oħra kbar!

Din id-deċiżjoni skandaluża mhux biss tmur kontra l-liġijiet ambjentali u l-policies tal-istess Awtorità IMMA hija deċiżjoni li tmur kontra s-saltna ta’ dritt – rule of law – f’pajjiżna!

Għaliex forsi wieħed jistaqsi?

Din id-deċiżjoni tfisser li din l-Awtorità hija ‘l fuq mill-Qorti! Fis-saltna tad-dritt, l-aħħar kelma hija dejjem tal-Qorti. B’din id-deċiżjoni, l-aħħar kelma hija ta’ din l-Awtorità! Il-Qorti tista’ tgħid li trid imma l-aħħar kelma hija tal-awtorità!

Dan se jfisser li mil-lum ‘il quddiem, kull entità tal-Gvern (għaliex fuq kollox il-PA hija entità tal-Gvern) se jkollha l-aħħar kelma fuq il-Qorti? Jekk ‘il quddiem, il-Qorti tagħti sentenza tagħha, se jkun hemm xi entità tal-Gvern li tkun involuta u din taqa’ u tqum mis-sentenza tal-Qorti u tiddeċiedi mod ieħor!

B’din id-deċiżjoni se jkun qed ifisser li xi ħadd, f’dan il-każ l-iżviluppatur Joseph Portelli, huwa ‘l fuq mil-liġi? Kif stqarret l-FAA: “Dan l-aħħar ksur tad-deċiżjoni tal-Qorti maħruġa mill-Prim Imħallef japprova l-perċezzjoni li qed ngħixu f’pajjiż fejn Joseph Portelli u sħabu l-iżviluppaturi għandhom poter aħħari fuq il-liġijiet u l-Qorti, bħal stat tal-Mafja”.

Imbagħad xi wħud jieħdu għalihom meta ngħidilhom li huma ‘fat cats’ – jiġifieri nies imġewħa bil-ġuħ li ma għandhomx xebgħa ta’ xejn u li jħossuhom ‘il fuq minn kulħadd!

Jekk dan huwa l-każ, allura nistgħu nagħlqu l-Qorti! X’se jagħmel il-Ministru tal-Ġustizzja quddiem dan? Il-Prim Imħallef ma jistax jikkummenta għaliex marbut li jibqa’ fis-silenzju. Hija r-responsabbiltà tal-ħalfa li ħa bħala Ministru tal-Ġustizzja li jara li s-saltna tad-dritt u s-sentenzi tal-Qorti jkunu l-aħħar kelma! Is-silenzju tiegħu jfisser biss kompliċità.

Din is-sentenza tkompli tikxef kemm il-Gvern Laburista spiċċa juża lil Malta/Għawdex biex jibqa’ jgawdi l-ħbiberiji u s-sapport ta’ ċertu persuni.

Din il-kwistjoni mhix l-unika waħda! Matul dawn il-11-il sena hemm lista ta’ persuni li kontinwament jitħanżru u jiffangaw askapitu tal-ġid komuni. Minflok sabu lill-Gvern li jeqfilhom u jrażżanhom, spiċċa biex jidħol fis-sodda magħhom! Ħokkli dahri, u nħokk tiegħek!

Għaldaqstant, huwa fl-interess tal-ġid komuni, li l-politiċi ta’ naħa u oħra, iżommu ‘l bogħod minn dawk li l-għan aħħar tagħhom mhux il-ġid komuni imma l-but tagħhom!

Diversi ċittadini, fosthom dawk il-100,000 li ma ħarġux jivvutaw dan l-aħħar, li huma mxebbgħa minn din l-arroganza, regħba fuq naħa u nuqqas ta’ tmexxija fuq naħa oħra!

(Dan l-artiklu ġie ippublikat fuq newsbook.com.mt – 20 t' Awwissu, 2024)