Il-parrocca ta' San Ġwann: 50 sena servizz lill-komunità

Matul dawn il-50 sena, kiena diversi dawk it-tfal, żgħażagħ, familji u oħrajn li gawdew mis-servizzi varji li offriet u għadha toffri din il-parroċċa.

Matul din is-sena, il-Parroċċa ta’ San Ġwann tagħlaq 50 sena minn meta saret parroċċa. Din il-parroċċa hi mmexxija mill-Patrijiet Franġiskani Kapuċċini u hi ddedikata lill-Madonna bit-titlu ‘Ta’ Lourdes’. Proprju llum jiftħu l-attivitajiet tal-festa li jilħqu l-qofol tagħhom il-Ħadd li ġej bil-purċissjoni bl-istatwa tal-Madonna ta’ Lourdes madwar it-toroq ta’ San Ġwann.

L-ewwel kappillan ta’ din ilparroċċa kien Patri Leopoldu Tabone. Il-kappillan preżenti hu Patri Emmanwel Abela. Matul is-snin, diversi kienu dawk il-patrijiet li taw is-sehem tagħhom lil din il-komunità. Jien kont wieħed minnhom. Għal għaxar snin kont nagħti ssehem tiegħi bħala patri fit-tmexxija tal-katekiżmu, attivitajiet għal tfal, anzjani u fit-tmexxija ta’ San Ġwann Youth Centre. Madwar 400 żagħżugħ u żagħżugħa, f’etajiet varji, kienu jattendu bil-ħeġġa għal diversi attivitajiet li kienu jsiru.

Kien żmien sabiħ u li għadni ngħożżu sal-lum. Nispera li kont ta’ servizz għal din il-komunità. Barra San Ġwann Youth Centre, f’din il-parroċċa hemm diversi għaqdiet u movimenti oħrajn, fosthom komunità ta’ sorijiet Franġiskani, l-abbatini, il-leġjonarji ta’ Marija, il-kor tal-parroċċa, il-Mixja Katekumenali, il-Moviment Kariżmatiku, il-grupp ta’ talb ta’ Patri Piju, il-grupp Grufan għal koppji miżżewġin, il-grupp tal-missjoni u l-Mużew tal-bniet u għas-subien.

Barra minn dawn il-gruppi, hemm gruppi oħra li għalkemm huma awtonomi mit-tmexxija tal-parroċċa, huma viċin tal-ħajja tal-komunità, fosthom il- Banda ta’ San Ġwann, in-nursery tal-futbol, il-gruppi tal-armar u tan-nar u l-moviment tal-iScouts u l-Girl Guides.

Diversi residenti f’San Ġwann huma membri f’dawn l-għaqdiet u jagħtu s-sehem tagħhom biex flimkien jagħmlu l-parroċċa ta’ San Ġwann waħda ħajja, dinamika u mimlija enerġija.

Matul dawn il-50 sena, kienu diversi dawk it-tfal, żgħażagħ, familji u oħrajn li gawdew mis-servizzi varji li offriet u għadha toffri din il-parroċċa. Illum il-ġurnata, dawn l-istess persuni jħarsu lura u jirringrazzjaw lill-parroċċa għal diversi esperjenzi sbieħ li rċevew. Mingħajr l-ebda dubju, dan kollu kien u għadu possibbli bis-saħħa tad-dedikazzjoni u l-impenn sħiħ tar-reliġjużi li kienu u għadhom jagħtu sservizz bl-imħabba u impenn sħiħ lejn din il-komunità. Diversi residenti tal-età tiegħi għandhom memorji sbieħ ta’ impenn ta’ diversi patrijiet li kienu f’San Ġwann matul dawn il-50 sena!

Personalment, jien li trabbejt u għaddejt it-tfulija u ż-żgħożija tiegħi f’San Ġwann, għandi diversi memorji sbieħ ta’ diversi patrijiet, fosthom Patri Klement, Patri Vinċenz, Patri Karlu, Patri Donald, Patri Publju Mair u Patri Emmanuel Barbara, li llum huwa Isqof fil-Kenja. Min jaf dawn il-patrijiet li semmejt u oħrajn, jaf x’qiegħed ngħid! Nistqarr li bl-eżempji tagħhom nista’ ngħid li kont iddeċidejt li bħala żagħżugħ nidħol mal-Kapuċċini u ngħaddi 20 sena minn ħajti magħhom. Ridt inkun bħalhom. Persuna ta’ servizz. Li nagħmel differenza fil-ħajja ta’ madwari. Illum, li ninsab miżżewweġ, il-valuri li ħadt qiegħed nipprova ngħixhom fiż-żwieġ tiegħi, ma’ ibni, fil-karriera tiegħi u fil-ħajja l-ġdida tal-politika. Ċert li diversi persuni oħrajn li kienu viċin il-ħajja ta’ din ilkomunità jistgħu jixhdu dan.

Min b’mod u min b’mod ieħor.

Il-parroċċa mhix waħda żgħira. Għandha madwar 14,000 persuna jgħixu fiha. Il-konfini tagħha jmissu ma’ diversi lokalitajiet oħra, fosthom San Ġiljan, il-Gżira, Birkirkara, is- Swieqi u n-Naxxar. F’din il-parroċċa

ma hawnx aspett ekonomiku u soċjali wieħed. Hawn ħaddiema tal-id u hawn ħaddiema tal-pinna. Hawn professjonisti u oħrajn fin-negozju. Hawn familji li jinsabu fit-triq ekonomika u soċjali aħjar minn oħrajn. Hawn oħrajn li għandhom ukoll diversi problemi soċjali, fosthom il-problema tad-droga. Hawn ukoll nies ta’ twemmin ieħor u persuni li mhumiex ċittadini Maltin.

Għaldaqstant, din il-parroċċa għandha diversi realtajiet li kollha joffru sfidi kbar lill-komunità Nisranija f’din illokalità.

Nemmen li l-ikbar sfida ta’ din il-komunità Nisranija għadha kif u b’liema mod se twassal il-messaġġ ta’ Ġesù – messaġġ mibni fuq l-imħabba, il-karità u l-inklużjoni – bħala messaġġ relevanti li jagħmel sens għall-bniedem u l-familji tal-lum. Nemmen li biex jiġri dan, din il-komunità ta’ fidi trid tħares ’il barra minnha nnifisha u mill-istrutturi u ritwali interni tagħha.

Fuq l-eżempju ta’ San Franġisk, li huwa l-‘mentor’ tal-patrijiet, kemm ir-reliġjużi u kemm il-lajċi impenjati, iridu jersqu aktar viċin ir-residenti u jkunu preżenti fosthom u magħhom, huma min huma. Filwaqt li matul din is-sena qegħdin isiru diversi ċelebrazzjonijiet biex ifakkru dawn il-50 sena ta’ servizz, jalla fuq l-eżempju ta’ Marija omm Ġesù, din il-komunità tkompli tkun il-qaddejja tal-Mulej... ‘li daqqa jgħaddi bil-bagalja u daqqa jgħaddi bis-sellum’.

Prosit u grazzi għal dawn il-50 sena ta’ servizz lill-komunità.

(Dan l-artiklu ġie ippublikat fuq il-gazzetta In-Nazzjon – 27 ta' Lulju, 2015)