Il-pitazz tal-ħajja

Tul l-2015, il-PN ħa pożizzjoni ċara fuq diversi temi, bħalma huma t-trasport pubbliku, iż-żieda fil-fjuwil u t-traffiku, l-ambjent u l-iżvilupp fiż-Żonqor, il-kmamar illegali, kwistjonijiet etiċi u dwar it-tmexxija pubblika u l-governanza tajba.

Meta konna għandna żgħar, ta’ tfal li konna, l-ewwel jiem tal-iskola wara l-btajjel tas-sajf kienu jiem speċjali. Fihom konna noqogħdu ferm attenti li l-pitazzi l-ġodda nibżgħu għalihom. Ilkoll niftakru kemm fl-ewwel jiem tal-iskola konna nippruvaw niktbu pulit u nagħmlu l-linji b’mod dritt. Ilkoll niftakru kemm konna nibżgħu li ma nħammġux dawn il-pitazzi billi konna nagħmlulhom il-cover tal-plastik b’diversi kuluri. Ilkoll niftakru b’liema ħeġġa f’dawk l-ewwel jiem konna nagħmlu l-homework tagħna. Ilkoll niftakru li ta’ tfal li konna, konna nifirħu meta l-għalliema tagħna kienet tfaħħarna u twaħħal xi stilla fuq il-pitazz bħala turija ta’ inkoraġġiment. Naħseb li lkoll niftakru f’dawn il-mumenti tat-tfulija.

Għaliex qiegħed nikteb dan?

Nemmen li l-ħajja tagħna hija bħal pitazz. Fuq dan l-pitazz ilkoll mistiedna niktbu l-istorja tagħna. Kapitlu wara ieħor. Ġrajja wara oħra. Fuq dan il-pitazz tal-ħajja rridu ‘niktbu’ l-impenji, id-diffikultajiet, is-suċċessi u l-weġgħat kollha tagħna. Huwa fuq dan il-pitazz li rridu nwettqu l-homework tagħna, gej mill-impenji li ħadna fil-ħajja personali, professjonali u ċivili tagħna. Fuq kollox, fuq dan il-pitazz tal-ħajja se nkunu ġġudikati mill-Imgħallem tagħna. Fuq dan il-pitazz se nieħdu l-‘istilla’ finali tagħna.

Ninsabu fl-ewwel jiem ta’ sena ġdida. Kapitlu ġdid f’dan il-pitazz tal-ħajja.

Għaldaqsant, tajjeb li jkollna l-kuraġġ u l-ħin biex nistaqsu żewġ mistoqsijiet importanti: “fejn qegħdin?” u “fejn nixtiequ li mmorru matul din is-sena l-ġdida?”

Fuq livell personali

Għalija l-2015 kienet tfisser ħafna. Kelli nieħu deċiżjoni serja. Wara perjodu ta’ riflessjoni u bl-għajnuna tal-familja u l-ħbieb, għażilt li nerġa’ nidħol fil-ħajja pubblika ta’ servizz lill-komunità. Madwar 15-il sena ilu, kont għal diversi snin saċerdot Kappuċċin b’diversi ħidmiet fost it-tfal, iż-żgħażagħ, l-anzjani u l-persuni vulnerabbli. Issa jien miżżewweġ. Fl-2015 ilqajt l-istedina li saritli minn Simon Busuttil. Ġejt mistieden biex nagħti s-servizz tiegħi lill-komunità bħala politiku. Għaldaqstant, matul is-sena li għaddiet, ħriġt għall-ewwel darba għall-elezzjoni tal-Kunsilli Lokali fil-lokalità ta’ San Ġiljan. Grazzi tal-fiduċja murija fija mir-residenti; tlajt mill-ewwel għadd. Issa, flimkien ma’ sħabi kunsilliera u mas-Sindku, qiegħed noffri s-servizz tiegħi lill-komunità.

Imma mhux biss. Ninsab ukoll kandidat għall-Elezzjoni Ġenerali li jmiss. Il-motto magħżul biex jagħtini direzzjoni huwa ‘People Matter – INTI tgħodd’. L-iskop tiegħi huwa li mill-ġdid nagħti sehmi biex, flimkien ma’ oħrajn, inkomplu nibnu soċjetà aktar umana, aktar ġusta u inklussiva, fejn l-ebda persuna ma titwarrab fil-ġenb. Nemmen bis-sħiħ li l-politika hija mezz ieħor biex wieħed jagħmel differenza. Għaldaqstant, tul din is-sena hija x-xewqa tiegħi li nkompli nżur il-familji tad-distrett. Nixtieq inkun politiku li nkun preżenti maċ-ċittadini kollha f’din il-ħidma biex nagħmlu s-soċjetà tagħna ftit aħjar milli hi. Dan huwa l-kaptilu l-ġdid fil-pitazz tal-ħajja tiegħi għal din is-sena l-ġdida.

X’inhu l-kaptilu l-ġdid tal-pitazz tal-ħajja tiegħek? Mistoqsija serja li inti trid twieġeb. Ikun tajjeb li wieħed jara x’inhuma l-impenji tiegħu/tagħha u jibni fuqhom. L-esperjenza tal-ħajja turina li dan il-pitazz tal-ħajja mhumiex twil daqskemm jidher. Malajr jgħaddi. Malajr issib ruħek fl-aħħar paġna tiegħu! Ma tantx għandna żmien x’naħlu. Għaldaqstant, jekk hemm imġiba, vizzji, attitudnijiet u ħwejjeġ oħra li hemm bżonn li jkun hemm deċiżjoni serja fuqhom, wieħed għandu jagħmel il-kuraġġ u jfittex l-għajnuna meħtieġa.

Fuq livell ta’ Partit

Matul is-sena 2015, il-Partit Nazzjonalista, taħt it-tmexxija ta’ Simon Busuttil, reġa’ sab saqajh. Matul din is-sena l-PN kellu għażliet u sfidi diffiċli. Kritika li nisma’ matul iż-żjarat fil-familji hija li l-PN qabel l-elezzjoni ma kienx aktar viċin l-aspirazzjonijiet, id-diffikultajiet u l-polz tal-familji. Għaldaqstant, għandna bżonn li nkomplu nagħmlu l-ħila kollha tagħna biex inkunu aktar viċin iċ-ċittadini tagħna. Matul l-2015, il-PN kien ukoll partit proattiv. Partit lest li jerġa’ jieħu lura r-responsabbiltà tat-tmexxija. Matul l-2015, il- PN ħareġ tliet dokumenti li jagħtu identit. u viżjoni ċara fejn jixtieq imur. L-ewwel dokument kien ġabra ta’ proposti għall- Baġit 2015-16. Dan huwa dokument storiku. Għall-ewwel darba partit fl-Oppożizzjoni li ppublika lista ta’ proposti. It-tieni dokument huwa ‘Ekonomija għan-Nies’. F’dan id-dokument hemm ċar il-viżjoni u l-għanijiet ta’ Gvern ġdid Nazzjonalista. F’dan id-dokument, il-Partit jerġa’ jpoġġi lill-persuna fiċ-ċentru ta’ kull ħidma politika u ekonomika. It-tielet dokument huwa ‘Nibnu Fiduċja fil-Politika.’ Il-PN, waqt li jgħarraf u jitgħallem mill-passat, irridu jkun partit li jmexxi verament bl-onestà, b’kontabbiltà u b’meritokrazija. Mhux bil-kliem imma bil-fatti. F’dan id-dokument, il-Partit jagħmel lista ta’ suġġerimenti kif jista’ jkun hemm verament governanza tajba.

Matul 2015, il-PN ħa pożizzjoni ċara fuq diversi temi, bħalma huma t-trasport pubbliku, iż-żieda fil-fjuwil u t-traffiku, l-ambjent u l-iżvilupp fiż-Żonqor, il-kmamar illegali, kwistjonijiet etiċi u dwar it-tmexxija pubblika u l-governanza tajba. Kif stqarr Simon Busuttil, il-Partit matul l-2015 kien mill-ġdid għal diversi drabi l-vuċi tal-poplu.

Min jgħajjar lill-PN bħala partit negattiv, ikun biss negattiv huwa stess!

Jekk fl-ewwel jiem tal-iskola tat-tfal konna nibżgħu għallpitazz, l-esperjenza turina li ta’ tfal li konna wara l-ewwel xhur, il-pitazz ma tantx kien jibqa’ pulit daqskemm meta bdejna. Wara ftit xhur, il-kitba ma tibqax ċara, il-linji jibdew isiru mgħawġa u xi tebgha taż-żejt jew butir jibdew jidhru! Jalla f’dan il-pitazz tal-ħajja ma nagħmlux l-istess. Hija t-tama li matul din is-sena nkomplu bl-istess ħeġġa, impenn u entużjażmu fix-xhur kollha li ġejjin.

(Dan l-artiklu ġie ippublikat fuq il-gazzetta Il-Mument – 3 ta' Jannar, 2016)