Inħarsu 'l quddiem

Dak li kiseb il-PN irid jindukrah. Irid isostnih u jkabbru. Baqa' ferm u ferm xi jsir!

Il-kampanija tal-Kunsilli Lokali ġiet u marret. Kien hemm min feraħ. Kien hemm min ħassu diżappuntant. Forsi anke mweġġa’. Il-poplu tkellem. Vox popoli, Vox Dei, jgħidu bil-Latin. Il-vuċi tal-poplu hija suprema daqs il-vuċi ta’ Alla.

Personalment, inħossni onorat. Dħalt fil-kamp politiku bl-għan li nagħti sehmi biex inkun wieħed mill-protagonisti tal-ġejjieni tal-Partit. Għaldaqstant kont kandidat ġdid f’San Ġiljan. Għamilt diversi żjarat. Ħabbat kull bieb taż-żona li ġejt mogħti biex inżur. Smajt is-suġġerimenti, id-diffikultajiet, il-kritika u l-kummenti ta’ diversi residenti – kemm dawk b’simpatija Nazzjonalista u kemm dawk b’sentimenti Laburisti. Dan wassalni biex inkun elett, mhux biss bħala wieħed mis-sitt kandidati Nazzjonalisti eletti, imma anke elett mill-ewwel għadd. Hija turija ta’ fiduċja kbira li se nsarrafha f’ħidma għall-ġid tal-komunià.

Għall-PN, dawn l-elezzjonijiet tal-Kunsilli Lokali ma kinux passiġġata fil-kampanija. Kien under dog fil-veru sens tal-kelma. Kien hemm ħafna marbut mar-riżultat. Għalkemm mill-bidu nett kulħadd kien jaf li l-maġġoranza ta’ dawn il-Kunsilli se jibqgħu f’idejn il-Partit Laburista, kif kien se jmur il-PN kien kruċjali. Minn wara t-telfa storika fl-elezzjoni ġenerali u minn wara l-elezzjonijiet Ewropej, għajnejn kulħadd kienu fuq il-Partit. Id-distakk se jibqa’ kif kien? Se jikber? Se jiċkien? Kull risposta kellha konsegwenza. Diversi kienu tal-fehma li jekk il-Partit jibqa’ jkollu l-istess perċentaġġ ta’ distakk, allura l-Partit kien jista’ jrodd is-salib għall-elezzjoni ġenerali li jmiss. Għall-partitarji Nazzjonalisti kienet tfisser daqqa oħra ’l isfel fil-moral. Għall-Partit Laburista kienet tfisser li jista’ jserraħ rasu li r-rebħa tagħhom se terġa’ tkun!

Imma dan ma seħħx! Vox Popoli , Vox Dei! Għall-kuntrarju, il-PN naqqas bin-nofs id-distakk bejn iż-żewġ partiti. Żied voti u kunsillieri fejn qabel ma kellux, b’mod partikulari n-naħa t’isfel ta’ Malta. Kiseb mill-ġdid il-Kunsill ta’ San Pawl il-Baħar. Saħħaħ diversi maġġoranzi fosthom f’San Ġiljan. B’eċċezzjoni għal Għawdex, il-Partit mexa ’l quddiem. Il-Partit Laburista, kif kien previst, rebaħ il-maġġoranza imma naqqas il-voti.

Din hija x-xejra li ħarġet. Għall-PN din kienet rebħa morali. Nifs ta’ tama. Riżultat li juri li l-Partit reġa’ beda jagħmel sens għaċ-ċittadini tagħna. Back in business , qal b’sodisfazzjon il-Kap Simon Busuttil. Riżultat li jgħinna nerġgħu nemmnu fina nfusna u jagħtina l-forza meħtieġa biex nimxu ’l quddiem b’sens ta’ tama.

Imma ħbieb, ma nistgħux nieqfu hawn! Dak li kiseb, il-PN irid jindukrah. Irid isostnih u jkabbru. Baqa’ ferm u ferm xi jsir! It-triq li baqa’ hija għat-telgħa, twila u b’diversi ostakli. Jonqos ħafna ħidma. Nemmen li kien hemm diversi fatturi wara dan is-suċċess. Konna viċin ir-residenti. Konna magħqudin f’tim wieħed. Kellna l-integrità u l-onestà ta’ Simon. L-astuzja ta’ Mario. Iż-żelu ta’ Beppe. L-enerġija ta’ Chris u t-tim tiegħu. Kellna wkoll ammont sabiħ ta’ kandidati żgħażagħ u ġodda.

L-esperjenza ta’ aktar minn 30 sena ta’ ħidma fost in-nies u man-nies, tikkonfermali li l-kuntatt kontinwu huwa indispensabbli. Għalkemm il-mezzi soċjali huma neċessarji, jibqa’ l-fatt li l-aktar mod kif wieħed jista’ jkollu fiduċja fik huwa li jiltaqa’ miegħek wiċċ imb wiċċ.

Jekk irridu nħarsu lejn futur sabiħ, jeħtieġ li nkomplu niltaqgħu man-nies. In-nies jgħallmuk. In-nies juruk x’inhu għaddej. In-nies ifehmuk dak li jgħodd u dak li ma kienx jgħodd. Għalkemm huwa veru li n-nies jgħajjuk ukoll u xi drabi huma egoisti fit-talbiet tagħhom, dan huwa s-sigriet.

Għaldaqstant, nistieden lill-kunsillieri sħabi kollha u lill-kandidati l-ġodda tal-elezzjoni ġenerali biex inkomplu bi programm ta’ żjarat lill-familji u nżuru l-familji kollha. Lgħajta ‘Malta Tagħna Lkoll’ nistgħu nagħmluha verament tagħna meta nħabbtu l-bieb ta’ kulħadd. Ejjew verament inkunu partit ta’ kulħadd.

Din hija t-triq ’il quddiem li ġġegħilna nħarsu ’l quddiem b’ottimiżmu!

(Dan l-artiklu ġie ippublikat fuq il-gazzetta Il-Mument – 10 ta' Mejju, 2015)