Iż-żejt tela' fil-wiċċ

Id-dokument dwar governanza tajba se jagħti viżjoni ċara li Gvern Nazzjonalista tgħallem mill-iżbalji u jrid li jimxi u jmexxi bl-onestà.

Minn meta Joseph Muscat ġie fdat fit-tmexxija tal-Partit, beda proċess ta’ bidla fl-immaġni tal-Partit. Biex ikompli jserraħ ras dawk li kienu fix-xifer li jivvutaw għall-ewwel darba lill-Partit Laburista, Joseph Muscat tkellem fuq tliet kunċetti fundamentali fil-politika – meritokrazija, kontabbiltà u trasparenza.

Diversi jixtiequ li dan il-pajjiż jitmexxa fuq il-meritokrazija, fejn fil-ħajja wieħed jimxi ’l quddiem fuq il-ħiliet u mhux fuq lil min jaf. Diversi huma tal-fehma wkoll fuq il-ħtieġa ta’ kontabbiltà, jiġifieri li l-politiku u dawk fis-servizz pubbliku jridu jagħtu kont tad-deċiżjonijiet li jwettqu. Diversi jistennew lit-tmexxija tal-pajjiż tkun trasparenti, li kollox isir bla ħabi.

Għaldaqstant, il-poplu meta vvota lill-Partit Laburista kien qiegħed jemmen li se jkun hemm il-bidla. Ivvota għat-trasparenza, meritokrazija u kontabbiltà kif kienu mwiegħda.

Sentejn u nofs wara li qiegħed joħroġ fiċ-ċar li ż-żejt tela’ fil-wiċċ. Kien kollu kliem sabiħ u bżar fl-għajnejn.

Għaliex nemmen fil-politika onesta ma għandix problema nistqarr li l-Partit Laburista wettaq xi miżuri tajbin. Imma nistqarr ukoll li l-Gvern Laburista falla bil-kbir f’dawn it-tliet wegħdiet. Fiż-żjarat li qiegħed nagħmel fid-djar, diversi huma dawk li qegħdin jistqarru li huma ferm diżappuntati. Diversi jħossuhom traduti u li ġew ingannati u użati. Laburisti ġenwini huma rrabjati li wara l-kliem sabiħ hemm l-istess Partit Laburista antik talimgħoddi li jaqdi lil tal-qalba jew switchers li vvutaw Labour għall-interess personali tagħhom.

Marlene Farrugia hija waħda minn fost ħafna diżappuntati. Min jirraġuna u jgħarbel sew, jaf li l-meritokrazija mwiegħda saret biss ċajta tal-Gvern. Diversi promozzjonijiet u ħatriet ta’ konsulenza, b’eluf ta’ ewro f’salarji u perkaċċi, mhumiex qegħdin jingħataw fuq il-mertu imma fuq bażi ta’ lil min taf u min jiflaħ jiffanga.

Min jaħseb b’moħħu jaf li l-wegħda l-oħra tal-kontabbiltà baqgħet fuq l-ixkaffa. Ħafna deċiżjonijiet żbaljati, donnu li ħadd mhu jagħti kont ta’ għemilu. Nieħdu l-eżempju tal-isfreġju fuq ilfaċċata ta’ Kastilja.Wara li ngħata tender ta’ €300,000 bla sejħa pubblika, issa dan id-dawl tneħħa. Min se jerfa’ r-responsabbiltà tal-isfreġju? Ir-Reġina ngħatat l-istess pittura darbtejn! Min se jħallas tal-iżball li jimbarazzana? Fit-Triq tal-Kosta ntilfu €11-il miljun mill-fondi Ewropej. Min se jagħmel tajjeb?

Min jirraġuna jaf tajjeb ukoll li l-wegħda ta’ trasparenza kienet biss ta’ qabel l-elezzjoni. Jekk dan mhuwiex hekk, allura għaliex diversi kuntratti, fosthom dawk tal-power station, tal-bejgħ taċ-ċittadinanza, il-kuntratt ta’ trasport pubbliku, il-bini fuq il-ponta taż-Żonqor, il-proġett fl-isptar f’Għawdex u kuntratti oħrajn, baqgħu sigriet tal-Istat?

Il-PN taħt it-tmexxija għaqlija u sinċiera ta’ Simon Busttil illum qiegħed iħabbar dokument ieħor fuq it-tmexxija tajba. Dan se jagħti viżjoni ċara li Gvern ġdid Nazzjonalista tgħallem mill-iżbalji u jrid li jimxi u jmexxi bl-onestà. Malta għandha bżonn Gvern onest. Ma’ kull ġurnata, aktar joħroġ ċar liema partit jixtieq iservi lill-pajjiż u liema partit qiegħed jisserva bil-pajjiż. Wara sentejn u nofs, iż-żejt tela’ fil-wiċċ.

(Dan l-artiklu ġie ippublikat fuq il-gazzetta Il-Mument – 6 ta' Diċembru, 2015)