Jien nagħżel lil Malta

Huma diversi dawk il-persuni li magħhom niltaqa' matul id-diversi żjarat li nwettaq li jħosshom ittraduti u mibjugħa! Għalihom, dan mhux dak li l-Labour wiegħed.

Fil-ħajja nagħmlu ħafna għażliet. Nhar is-Sibt, 3 ta’ Ġunju, aħna lkoll mistiedna biex nerġgħu nagħmlu l-għażla mhux biss ta’ min se jmexxi lill-pajjiż imma se nagħżlu aktar minn hekk. Se nagħżlu x’tip ta’ soċjetà nixtiequ ngħixu fiha aħna u wliedna. Nixtiequ ngħixu f’soċjetà onesta jew f’soċjetà fejn id-diżonestà ssir onestà?

Din l-għażla mhix għażla mistennija. Fil-fatt, l-aħħar li lpoplu Malti kien għażel il-Gvern li jixtieq li jmexxi kien proprju erba’ snin ilu. Suppost baqa’ sena oħra ta’ tmexxija ta’ Gvern Laburista. Għaldaqstant, sena qabel iż-żmien, Joseph Muscat qiegħed jitlobna biex nerġgħu nagħżlu. Erba’ snin ilu, il-maġġoranza kbira ta’ ħutna l-Maltin għażlu li jemmnu lil Joseph meta qal li l-Gvern tiegħu jkun Gvern li jmexxi b’akkontabbiltà, bi trasparenza u b’meritokrazija. Eluf emmnu li Malta mhix se tibqa’ donnha tribù, maqsuma fi tnejn, imma se tkun ‘Malta tagħna lkoll’.

Għaldaqstant, quddiem dan il-kliem kollu ħlewwa u tjubija, il-poplu għażel. Erba’ snin wara ninsab ċert li l-poplu qiegħed jerġa’ jaħsibha sew! Dan għaliex matul dawn l-erba’ snin, Joseph qatgħalna nifisna bl-istejjer ta’ skandli.

Il-poplu Malti darba tista’ tidħak bih. Darbtejn ikun diffiċli. Huma diversi dawk il-persuni li magħhom niltaqa’matul iddiversi żjarat li nwettaq li jħosshom ittraduti u mibjugħa!

Għalihom, dan mhux dak li l-Labour wiegħed. Iħossu li Joseph u sħabu nqdew bil-Parit Laburista u bil-Laburisti ġenwini biex huwa u sħabu jrekknu għalihom ġid mhux mistħoqq lilhom. Dan is-sens ta’ tradiment ġej mhux biss minn ċittadini komuni li, filwaqt li huma jridu jikkuntentaw bil-karità tal-Prim Ministru, tal-qalba jiffangaw, imma issa anke l-istessWhip tal-Parlament, l-Onorevoli Farrugia, qiegħed iħossu ttradut!

Farrugia kiteb lill-Prim Ministru biex jgħidlu li huwa ma jħossux komdu jaħdem f’dan il-moviment u spiċċa biex jakkuża lill-Prim Ministru li dan ittradixxa l-valuri tal-Partit Laburista. Bħal Farrugia hemm oħrajn li forsi fis-skiet ta’ djarhom jafu jaraw min huwa ġenwin u min inqeda bihom. Għaldaqstant, l-għażla fl-elezzjoni mhix se tkun biss bejn il-PN u l-PL. Din mhix elezzjoni ‘normali’. Kieku kienet elezzjoni normali, kienet issir sena oħra. Għalhekk tajjeb li wieħed jistaqsi ‘għala l-Prim Ministru ħass li għandu jagħmel elezzjoni bikrija?’

Qiegħed jgħid li hawn l-instabbiltà. Jekk dan huwa minnu, din l-instabbiltà taf l-għeruq tagħha proprju sena ilu meta Konrad Mizzi u Keith Schembri nqabdu li għandhom kontijiet sigrieti fil-Panama u f’postijiet oħra. Meta faqqgħet din l-istorja, il-Prim Ministru qalilna li dawn huma ‘fake news’. Issa nafu li dan mhux minnu. L-unika ‘fake news’ hija t-tweġibiet tiegħu. Għaliex sena ilu l-Prim Ministru naqas mid-dover tiegħu li jieħu passi fil-konfront tagħhom, spiċċa mhux biss fid-dell qawwi tal-korruzzjoni, imma issa sirna nafu għaliex ma ħax passi. Ma ħax passi għax kollox jindika li huwa wkoll imdaħħal fil-biċċa xogħol! Issa l-Prim Ministru qiegħed dahru mal-ħajt u jrid isalva ġildu permezz ta’ elezzjoni bikrija.

Ir-riżultat tal-elezzjoni ma jħassarx it-tajjeb jew il-ħażin ta’ dak li wieħed jagħmel. Jekk il-Prim Ministru jemmen li rriżultat jista’ jmewwet dawn l-akkużi serji, allura għandna Prim Ministru li jara sal-ponta ta’ mnieħru.

Il-PN huwa lest għal din l-elezzjoni. Għalkemm il-Partit qiegħed jibda minn żvantaġġ kbir ta’ numru ta’ voti u ta’ nuqqas ta’ finanzi, ninsabu determinati. Simon Busuttil jagħtina eżempju ta’ determinazzjoni sħiħa li nagħlqu dan il-kapitlu ikrah fl-istorja ta’ pajjiżna.

Kif qal sew Simon Busuttil, l-għażla mhix iktar bejn il-blu u l-aħmar imma bejn Joseph u l-klikka tiegħu li ħatfet lill- Partit Laburista, u dawk li jħobbu lil Malta. Għal kull min iħobb lil pajjiżu, kull min iħobb is-sewwa, l-onestà, l-integrità, il-verità, l-għażla hija waħda ċara.

Jien se nagħżel lil Malta onesta għax nixtieq ngħix f’soċjetà serja u onesta. Din hija stedina għal kull min għandu dawn il-valuri. Għandu jinġabar madwar din il-Forza Nazzjonali biex nieħdu lura l-pajjiż minn idejn il-briganti.

(Dan l-artiklu ġie ippublikat fuq il-gazzetta Il-Mument – 7 ta' Mejju, 2017)