Kapitlu ġdid

Nixtieq vuċi għall-ambjent, għall-ġustizzja soċjali u għall-inklużjoni. Dan huwa l-ispirtu li bih qed nidħol bħala Deputat ġdid.

Credit: DOI - Omar Camilleri

Wara l-mewt tal-mikbi Robert Arrigo, jiena u l-kollega Emma Bonnici Portelli, tfajna n-nomina tagħna biex jimtela’ dan il-post vakant b’rispett sħiħ lejn il-proċess demokratiku u b’lealtà lejn iċ-ċittadini tal-10 distrett.

Huwa unur għalija li ġejt magħżul.

Din hija opportunità oħra biex inkun ta’ servizz mhux biss għall-komunità Ġiljaniza bħala Sindku, imma opportunità fejn issa nista’ nagħti s-servizz tiegħi lill-komunità aktar wiesgħa.

L-ewwel ħsieb tiegħi jmur biex insellem il-memorja ta’ Robert Arrigo. Robert kien politiku li għamel ħafna ġid mhux biss lill-Partit Nazzjonalista u lir-residenti tad-9 u l-10 distrett, imma għas-soċjetà kollha. Is-sentimenti murija f’dawn l-aħħar jiem jikkonfermaw dan. Għandi ħafna x’nitgħallem minnu u żgur li ser nagħmel ħilti kollha biex inkun viċin in-nies kif kien huwa.

It-tieni ħsieb huwa li jiena, kif dejjem pruvajt nagħmel, irrid inkun qaddej tal-ġid komuni. Il-politika mhix dwari. Lanqas mhi dwarek. Il-politika hija dwarna. Nemmen bis-sħiħ li l-politika vera hija dik li hija għas-servizz tal-ġid komuni! Kull persuna li tidħol għal politika tagħmel dan biex toffri servizz u mhux biex tinqeda u tisserva bil-politika!

Pajjiżna jieħu r-ruħ meta nagħmlu l-politika ta’ flimkien, jigifieri politika fejn il-kelma ‘aħna’ tiġi qabel il-kelma ‘jiena’. Għaldaqstant, għalija l-kelma ‘flimkien’ turi l-ħidma għall-ġid komuni. Għal xi wħud, il-ġid komuni ma baqax ġid komuni. Il-ġid komuni huwa dak il-ġid li jmur lil hinn mill-intersssi tal-ftit waqt li tħares l-interessi tal-ħafna.

Għaldaqstant, nixtieq nagħmel politika li tħares l-interessi tal-ħafna u mhux tal-ftit.

Nemmen bis-sħiħ li dan huwa proprju l-valur fundamentali li dejjem dawwal u għaġġen lill-Partit Nazzjonalista matul iż-żminijiet. Il-Partit Nazzjonalista gawda l-fiduċja tal-poplu u għamel riformi u inizjattivi kbar proprju meta għaliex ġab l-ewwel mhux l-interessi tal-ftit jew inkella tal-Partit imma tal-ġid komuni. Sfortuatament, din hija b’kuntrast qawwi mal-Partit Laburista li kwazi dejjem fittex l-interessi tiegħu u ta’ dawk ta’ madwaru l-ewwel qabel kollox.

Għaldaqstant, filwaqt li qiegħed b’umiltà nibda dan il-kapitlu ġdid, b’determinazzjoni sħiħa, nixtieq qattigħ li nkun il-vuċi lil dawk il-valuri li ngħozz. Dawn huma:

1. Il-ħarsien tal-ambjent tagħna. Ilkoll naqblu l-ambjent jinsab taħt assedju ta’ dawk li m’għandhomx xabgħa. L-ebda lokalità mhi ħielsa minn dan il-bini sfrenat kollu. L-ambjent huwa d-dar komuni tagħna. Jekk mhux ser nieħdu ħsieb l-ambjent u nkomplu nagħmlu freġju minnu, allura ser inkunu mhux biss ser nagħmlu pajjizna belt waħda imma ser ikollna diversi problemi ta’ saħħa mentali. L-istudju juri biċ-ċar li hemm rabta sħiħa bejn is-saħħa mentali u bini żejjed li ma jħallix spazji miftuħa! Għalhekk bħala Partit irridu neżaminaw sew il-policies eżistenti tal-kostruzzjoni u nieħdu bla biża’ dawk il-passi meħtieġa. Personalment nemmen li dawn il-policies għandhom bżonn li jiġu reveduti u ssir masterplan nazzjonali fejn l-ambjent jingħata aktar importanza u ħarsien.

2. Il-ħtieġa tal-inklużjoni. B’hekk ħadd ma jibqa’ lura, b’mod partikolari l-anzjani tagħna. Hemm bżonn aktar kura u servizz għalihom fil-komunitajiet tagħna. Hemm bżonn li jinħataw aktar serħan il-moħħ. Huwa d-dover tagħna lkoll li l-anzjani wara snin ta’ servizz u ħidma, iħossuhom b’rashom mistrieħa u siguri. Barra l-anzjani, hemm persuni oħra vulnerabbli li bħala soċjetà rridu nilqgħu fostna u nagħtuhom id-dinjità li jixtiqilhom.

3. Il-bżonn tal-ġustizzja soċjali. Nemmen f’politika għal ħafna u mhux għal ftit. Il-Gvern Labursita għamel lil ftit meqjusa tal-qalba sinjuri u lil ħafna tawhom biss il-loqom! Il-Gvern Laburista lil ta’ madwaru tawhom ħafna imma l-oħrajn taw bil-karità! L-istudju juri biċ-ċar li d-distakk bejn il-fqir u s-sinjur qiegħed jikber. Issa hemm distakk ieħor, bejn is-sinjur u ta’ dawk tal-qalba Laburista! ħ Il-Gvern Laburista rnexxielu joħloq klassi soċjali ġdida! Il-politika vera hija dik li tqassam il-ġid ugwali lil kulhadd mingħajr ma tara wiċċ ta’ ħadd!

Fil-qosor għalhekk nixtieq vuċi għall-ambjent, għall-ġustizzja soċjali u għall-inklużjoni. Dan huwa l-ispirtu li bih qed nidħol bħala Deputat ġdid.

F’dawn l-aħħar 40 sena okkupajt diversi rwoli u responsabbil-tajiet fis-setturi soċjali, reliġjużi, edukattivi u maniġerjali, fos-thom għalliem, patri Franġiskan Kapuċċin, manager fis-Sedqa, Kap Eżekuttiv tal-Awtorità tad-Djar, Amministratur f’Caritas, Direttur fl-Equal Partners li taħdem fost it-tfal b’diżabbiltà, ħidma fil-UĦM, Viċi Sindku u issa Sindku f’San Ġiljan. F’kull rwol u responsabblità li kelli dejjem għamil ħilti b’onestà u b’integrità sħiħa biex naqdi dmiri kif kien mitlub minni.

Dan huwa pass, kapitlu ieħor ġdid.

(Dan l-artiklu ġie ippublikat fuq il-gazzetta Il-Mument – 6 ta' Novembru, 2022)