Nuqqas ta’ investiment mill-Gvern Laburista f’San Ġiljan

Kemm San Ġiljan u kemm Paceville huma marbuta sew mat-turiżmu. Dan għaliex San Ġiljan u Paceville huma meqjusa mhux biss bħala l-mekka tad-divertiment għal diversi żgħażagħ lokali u turisti li jiġu fostna, imma wkoll għaliex din hija l-lokalità fejn hawn l-aktar ammont ta’ lukandi ta’ l-għola kwalità.

Credit: Shutterstock.com

Nistgħu ngħidu li San Ġiljan u Paceville huma ċ-ċentru kosmopolitan ta’ pajjiżna, minn fejn diversi familji jaqilgħu l-għajxien tagħhom. Huwa post ukoll fejn diversi negozjanti nvestaw bi kbir.

Sfortutanament, il-Gvern Laburista ittraskura din il-lokalità u mhux qiegħed jagħti l-importanza meħtieġa. U għaliex mhux qed jagħti importanza, allura l-Gvern mhux qiegħed jinvesti kif għandu suppost jagħmel.

Jidher ċar li l-Gvern ma għandu l-ebda pjan kif imexxi din il-lokalità.

Insemmi żewġ punti li qegħdin jitfgħu lura din il-lokalità u l-Gvern mhu ma qiegħed jagħmel xejn dwaru.

Overdevelopment

Bil-Malti ngħidu, ‘iż-żejjed huwa oħt in-nieqes’. Dan huwa veru f’San Ġiljan u f’Paceville. Minn żona kwieta, issa spiċċa, fi kliem xi ħadd, ‘Manhattan ta’ Malta’.

Filwaqt li ma għandi l-ebda problema li din il-lokalità tkun bħal Manhattan, imma jidher ċar li din iż-żona ma tiflaħx aktar żvilupp. Jidher ċar li l-iżvilupp li sar, li qiegħed isir u ser issir, ser ibiddel din iż-żona kompletament.

Ftit taż-żmien ilu, il-Gvern kien ħareġ masterplan li kienet donnha wish-list għal ċertu persuni. Dak iż-żmien kien hemm kritika kbira u l-Gvern kien waqqaf din il-masterplan. Imma xorta ħalla kull proġett li kien hemm fija! Fil-fatt, kull toqba ta’ art li hemm ġiet, jew inkella qed tiġi mibnija mingħajr pjan ħolistiku.

U din hija l-ikbar problema – li m’hemmx pjan ħolitisku! Anzi mhux biss ma hemmx pjan ħolistiku imma l-Gvern ibiddel u jemenda l-pjanti, kif qed jagħmel fil-każ tal-applikazzjoni ta’ Villa Rosa!

It-talba tagħna kienet, u għadha, li jkun hemm tassew masterplan, fejn l-istakeholders kollha inkluż ir-reżidenti, jkunu nvoluti u jkun hemm pjan fit-tul.

Nuqqas ta’ investiment

Filwaqt li l-investituri qegħdin jinvestu flushom f’din il-lokalità, il-Gvern Laburista mhu qiegħed jagħmel l-ebda investiment fl-infrastruttura pubblika. B’infrastruttura pubblika nifhem: toroq, bankini, spazji mifutħa, sistema ta’ dranaġġ, etċ.

Il-Gvern ikun diżonest jekk iwaħħal fil-Kunsill Lokali meta jaf li l-Gvern neħħilhom kull awtorità. Fil-fatt lanqas tabella tat-traffiku ma jistgħu jwaħħlu mingħajr permess mill-Gvern! Imbagħad jkollu l-wiċċ jgħid li l-kunsilli huma l-gvern lokali – my foot, igħidu l-Ingliżi!

Huwa fatt li s-stat li huma fihom it-toroq u l-bankini, huma tal-biki. Mhux biss, imma issa anke l-Bajja ta’ San Ġorġ, li kellha l-blue badge, spiċċat għal diversi drabi magħluqa minħabba l-ħruġ tad-dranaġġ fil-baħar! Dan qed iwassal biex din il-bajja titlef il-kwalità tagħha. U dan mhux qed ngħidu jien imma kitbu saħansittra l-Profs. Victor Axiak u anke ex-Ministru, Evarist Bartolo.

Mhux biss il-gvern abbanduna il-Bajja ta’ San Ġorġ, imma anke proġetti li kienu tħabbru b’tant pompa, u r-riġenerazzjoni tal-Ġnien ta’ Spinola. Qalilna li l-Gvern ser jonfoq €5.5 milju. Sa llum kollox għadu kif inhu. Barra minn hekk, il-proġett tax-xatt tas-sajjieda mhux biss ma tkompliex, imma f’żona li suppost hija għas-sajjieda biex ipoġġu l-inġenji tagħhom, spiċċat bl-imwejjed u s-siġġijiet!

Insaqsi mistosija parlamentari numru 4120, kemm xogħolijiet u investiment saru f’San Pawl il-Baħar, fil-Mellieħa u kemm xogħolijiet u investiment sar ġewwa San Ġiljan.

Risposta: Fil-Mellieħa kien hemm investiment ta’ €47,900, filwaqt li f’San Pawl il-Baħar/Xemxija kien hemm €578,000.

Minn naħa l-ohra, f’San Giljan kien hemm biss €22,500!

Filwaqt li ma għandi l-ebda problema li l-lokalitajiet bħal Mellieħa u San Pawl il-Baħar ikollhom dan l-ammont ta’ investiment, imma ċ-ċifri jitkellmu weħidhom!

In-nuqqas ta’ investiment u telqa jidher ukoll fl-ammonti ta’ toroq li jinsabu fi stat ħażin. Biżżejjed insemmi Triq Borg Oliver fil-Balluta u Triq il-Kbira. Filwaqt li nifhem li kienu saru xi xogħolijiet fihom imma dawn ilhom minn Mejju 2024 fi stat ħażin!

Ma nistax lanqas inħalli barra l-istat tal-indafa u skart ma’ kullimkien, għaliex il-gvern jibża jinforza l-liġijiet ma’ numru ta’ resturants li suppost għandhom il-kuntrattur privat, u mhux lest jirregola ix-short-lets li għalkemm huma tajbin, imma ma jistax ikun li jitħallew jagħmlu ħerba mill-lokalità/residenti.

Hemm ukoll in-nuqqas ta’ sigurtà, u nfakkar lil Gvern fil-wedgħa tiegħu li jkun hemm skwadra tal-pulizija apposta għal din il-lokalità.

Il-Partit Nazzjonalista jinvesti f’din il-lokalità

Il-Partit Nazzjonalista, għaliex jemmen mhux biss li din il-lokalità hija waħda mill-muturi tal-ekonomija, imma jemmen li r-residenti jixirqilhom jkollhom kwalità aħjar ta’ ħajja, u ser ikun qiegħed jieħu ħsieb din il-lokalità.

Għaldaqstant…

• Għal diversi drabi, il-PN tkellem fuq il-ħtieġa li jkollna turisti ta’ kwalità u mhux ta’ kwantità.

• Għal diversi drabi l-PN tkellem (u anke jien meta kont Sindku) biex il-flus mill-eco tax, li issa telgħet minn 50c, li kull turist jagħti għal kull lejl, għal €1.50, tkun investità fil-lokalità u mhux tmur ġo fond li ħadd ma jaf fejn imorru! Din hija win win situation fejn kullħadd igawdi minn dan l-investiment. Tista’ timmaġinaw turist li joqgħod f’5-star hotel u jispicca jimxi fuq bankini 1-star li huma kollha mkissra u mimlija boroż tal-iskart maħruġ barra mill-iskeda.

Għaldaqstant, il-Partit Nazzjonalista fil-Gvern juri mpenn sħiħ lejn din il-lokalità, u jinvesti bis-saħħa kollha għal ġid mhux biss tan-negozjanti li jinvestu flushom hawn, imma għar-residenti li jixirqilhom ferm aħjar.

(Dan l-artiklu ġie ippublikat fuq il-gazzetta Il-Mument – 11 ta' Jannar, 2026)