Kieku kont saħħar!
- manuelschembri
- Sep 16, 2024
- 2 min read
Ser inkompli naħdem mill-aħjar li nista’ għal bini ta’ soċjetà aktar umana, aktar ħanina u aktar inklussiva!
Ftit tal-ġranet ilu, mara Amerikana, Victoria Tenisha Shanae Dillhunt, għoġobha tiftaħ kawza kontrija, kontra s-Sindku ta’ Maċerata fil-Italja u Sindku ta’ Ghent ġewwa l-Belġju.
Għaliex, wieħed jista’ jistaqsi?
Ir-raġuni tagħha kienet għaliex skontha, San Ġiljan kien mażun u saħħar!
Għaldaqstant, fid-dawl li l-lokalità ta’ San Ġiljan, Ghent u Maċerata għandhom lill-qaddis San Ġiljan bħala protettur tagħhom, hija sostniet għalhekk is-sindki ta’ dawn il-lokalitajiet huma saħħara huma wkoll!
Għalkemm m’għadnix Sindku ta’ San Ġiljan mill-2022, xorta din is-sinjura għoġobha tiftaħ din il-kawża u takkużani li jiena mażun u saħħar!
Kif wieħed jista’ jinnota, dan mhu minnu xejn!
Ma nafx kif din waslet għall-konklużjoni li San Ġiljan kien mażun u saħħar. Għalkemm l-istorja ta’ San Ġiljan kienet waħda kulurita, fejn spiċċa joqtol lill-ġenituri tiegħu bi żball, imma żgur li San Ġiljan ma kienx mażun u saħħar!! Wara din it-traġedja, San Ġiljan għadda ħajtu jgħin lil pellegrini u dawk morda. Min-naħa l-oħra, ma nafx lanqas x’għandhom x’jaqsmu s-sindki ta’ dawn il-lokalitajiet!
Għaldaqstant nixtieq inserraħ ras kulħadd li m’inix la mażun u lanqas saħħar!
Imma kieku kont saħħar, kieku nistqarr li kont nagħmel ħafna affarijiet.
Kieku kont saħħar, kont nisparixxi l-ġuħ u l-għaks li hawn fid-dinja.
Kieku kont saħħar, kull tifel u tifla nagħtihom edukazzjoni u opportunitajiet biex jimxu ‘l quddiem.
Kieku kont saħħar, kont neqred il-korruzzjoni u r-regħba li diversi huma maħkuma minnha.
Kieku kont saħħar, kont inwaqqaf il-qerda tal-ambjent u moħqrija tal-annimali.
Kieku kont saħħar, kont inwaqqaf il-gwerer, il-mibegħda u l-ġlied f’Gaża, fl-Ukrajna u f’diversi postijiet oħra!
Kieku kont saħħar, kont …..
Imma m’inix saħħar! U għaliex m’inix saħħar, allura ser inkompli dak li ili nagħmel għal 40 sena. Ser inkompli naħdem mill-aħjar li nista’ għal bini ta’ soċjetà aktar umana, aktar ħanina u aktar inklussiva!
Għalhekk dħalt fil-politika. Dħalt fil-politika mhux biex noqgħod nieħu s-selfies! Lanqas biex inħossni importanti jew inkella biex noqgħod nitgħajjar mal-partit oppost qisna ‘tom and jerry’.
Dħalt fil-politika biex flimkien ma’ oħrajn, anke dawk ta’ fehma differenti minn tiegħi, naħdmu għal soċjetà, Malta aħjar. Dan huwa l-iskop aħħari tal-politika. Din hija r-responsabbiltà tagħna.
Imma mhix ir-responsabbiltà tal-politiċi biss. Din ir-responsabbiltà hija ta’ kull ċittadin. Kull ċittadin għandu jkun attiv u mhux ma jimpurtahx minn dak li għaddej f’pajjiżu u barra minn xtutna. Kull ċittadin għandu d-dmir li jagħti sehmu. Kull ċittadin għandu jkun strument li jġib il-bidla pożittiva madwaru. Ma nistgħux inkunu ċittadini passivi, li kollox jgħodd u kollox jgħaddi.
U għal min huwa anke Nisrani, allura għandu responsabbiltà oħra fuq spallejh. Permezz tal-magħmudija, kull nisrani huwa msejjaħ biex ikun ‘il-melħ u d-dawl tad-dinja’. Kull nisrani għandu responsabbiltà li jkun ambaxxatur ta’ Kristu lil oħrajn u jgħin lil proxxmu kollu tiegħu.
Għalkemm ħadd mhu saħħar u ħadd ma jagħmel il-mirakli, IMMA kulħadd jista’ jagħti daqqa t’id għall- bini ta’ dinja aħjar….u jekk wieħed ma jistax jew ma jridx jagħmel dan, għallanqas m’għandux ifixkel jew itellef lil min qiegħed jipprova jagħti sehmu!
Fl-aħħarnett, fid-dawl ta’ din l-akkuża assurda ta’ din l-Amerikana, ippermettuli ngħid minn qalbi: VIVA SAN ĠILJAN!
(Dan l-artiklu ġie ippublikat fuq newsbook.com.mt – 16 ta' Settembru, 2024)