Kumitat ħabbrieki ta’ San Ġwann

Il-membri kollha ta’ dan il-kumitat ħadmu qattiegħ biex jaraw li l-kandidati kollha li kellna għal din l-elezzjoni mhux biss jiltaqgħu mar-residenti tagħna fi djarhom imma anke saru diversi laqgħat.

Credit: tvmnews.mt

Fl-aħħar elezzjonijiet għal Kunsilli Lokali li nżammu f’Gunju li għadda, il-maġġoranza tar-residenti ġewwa San Ġwann reġgħu fdaw mill-ġdid it-tmexxija ta’ din il-lokalità f’idejn il-Partit Nazzjonalista.

Fl-edizzjoni tal-elezzjonijiet tal-kunsilli, il-PN kien tilef din il-lokalità bi 80 vot. Din id-darba, il-Partit Nazzjonalista, rebaħ din il-lokalità b’maġġoranza ta’ aktar minn 730 vot. Dan ifisser li kien hemm swing ta’ aktar minn 800 vot aktar għal Partit Nazzjonalista!

Imma dan ir-riżultat ma waqgħax mis-sema. Dan kollu ma kienx possibli għal ħidma siewja tal-kumitat ta’ San Ġwann.

Il-membri kollha ta’ dan il-kumitat ħadmu qattiegħ biex jaraw li l-kandidati kollha li kellna għal din l-elezzjoni mhux biss jiltaqgħu mar-residenti tagħna fi djarhom imma anke saru diversi laqgħat. Nemmen li żjarat fid-djar huma kruċjali għaliex huwa mod dirett li wieħed jidħol fid-djar ta’ residenti tagħna u jisma’ l-opinjoni, is-suġġerimenti u l-kritika tagħhom.

Kien hemm wkoll l-għajnuna tal-Kap, Bernard Grech li għal diversi drabi żar huwa wkoll, mhux biss lil komunità kummerċjali li hawn fostna, imma anke ltaqa’ ma’ bosta residenti u sema’ dak li kellhom xi jgħidu. Kienet opportunità sabiħa li l-Kap sab il-ħin biex jagħmel dan.

Kien hemm ukoll l-għajnuna ta’ diversi kandidati MEP u Deputati tad-distrett li huma wkoll taw l-appoġġ tagħhom biex inħeġġu lir-residenti biex joħorġu jivvutaw.

Imma l-ħidma tal-kumitat ma waqfitx wara l-elezzjoni.

Il-membri ta’ dan il-kumitat jafu li l-ħidma trid tkompli. Kien għalhekk li l-kumitat ħaseb mhux biss li jagħmel attività tar-rebħa wara li mill-ġdid tal-maġġoranza f’San Ġwann, imma ħaseb li għal 60 sena mill-kisba glorjuża tal-Indpendenza ta’ pajjiżna jtella’ numru ta’ attivitajiet li jfakkru din il-ġrajja.

Kien għalhekk li l-kumitat tella’ tlett attivitajiet.

L-ewwel attività kienet ta’ natura soċjali permezz ta’ pasta night. Kienet attivita’ fejn diversi tesserati u oħrajn jinġabru flimkien għal din l-attività. Bħal kull attivita’ soċjali, dawk prezenti kellhom l-opporunità mhux biss biex jieklu ftit pasta tajba imma kellhom ċ-ċans li jiltaqgħu lkoll flimkien. Għal din l-attività kien hemm prezenti numru ta’ kollegi Deputati fejn dawn kellna l-opportunita’ biex inġeddu l-kuntatt tagħna mal-votanti tagħna.

It-tieni attivita’ kien li kumitat ħaseb biex jiżra siġra taż-żebbuġ biex titfakkar din il-grajja. Is-siġra taż-żebbuġ tfakkar mhux biss il-paċi u l-għaqda imma peress li kienet siġra taż-żebbuġ Maltija, kienet wkoll turija ta’ apprezzament għal dak li huwa Malti. Il-PN kien u għadu partit kburi minn pajjiżna. Matul is-snin li l-PN jingħata fiduċja fit-tmexxija tal-pajjiż, dejjem ħaseb biex jmexxi ‘il quddiem pajjiżna.

It-tielet attività kienet ġbir tal-għoti tad-demm. Dan kien possibli għaliex l-Blood Donation Unit laqa’ t-talba tagħna u kellna il-mobile blood donation trailer fostna. Dan kien ipparkajt quddiem il-knisja parrokjali. B’hekk diversi persuni setgħu jiġu jagħtu d-donazzjoni tagħhom tad-demm. L-għoti tad-demm huwa ġest nobbli u juri li fil-ħajja rridu nkunu persuni ġeneruzi. Il-PN dejjem ħadem biex jwassal il-valur tas-solidarjetà għal oħrajn.

Dan kollu kien possibbli għaliex il-membri kollha tal-kumitat ħadmu flimkien. Nemmen fis-sħiħ li fejn hemm l-għaqda, hemm ħidm tajba li tagħti l-frott.

Għaldaqstant, nixtieq ninqeda b’dan l-artiklu żgħir biex mbux biss ngħid ‘grazzi’ u ‘prosit’ lil membri KOLLHA ta’ dan il-kumitat u nkompli nagħti l-appoġġ tiegħi lilhom biex inkomplu l-ħidma tagħna flimkien.

Flimjien aħjar. Flimkien naslu.

(Dan l-artiklu ġie ippublikat fuq il-gazzetta in-Nazzjon – 9 t' Ottubru, 2024)