L-agħma u t-trux

Sfortunatament hawn persuni li għalihom il-ġibda tat-tribù hija ferm aktar qawwija mill-ġibda għall-verità u l-onestà.

L-esperjenza ta’ min huwa nieqes mid-dawl u missmigħ mhix esperjenza sabiħa. Nammira bil-kbir lil dawk li għalkemm jgħixu f’din id-dalma talħajja, jagħmlu minn kollox biex jippruvaw jgħixu b’ottimiżmu.

Imma lil hinn min-nuqqas ta’ dawl u smigħ fiżiku, jeżisti nuqqas ieħor ta’ dawl u smigħ. Bil-Malti għandna espressjoni profonda. Spiss insibu lilna nfusna ngħidu li t-trux veru huwa dak li ma jridx jisma’ u l-agħma huwa dak li ma jridx jara. Ħafna drabi, persuni f’dan l-istat ikollhom livell qawwi ta’ fanatiżmu. Jaraw biss dak li jridu jew jixtiequ. Jisimgħu biss dak li jdoqq għal widnejhom. Xejn aktar.

Jinstabu diversi forom ta’ fanatiżmu, fosthom dak politiku. Persuna fanatika hija pesuna silettiva. Għal din il-persuna, kulma jagħmel il-partit huwa kollu tajjeb u l-partit qatt ma jagħmel xejn ħażin. Persuna fanatika mhix kapaċi tieħu kritika. Hekk kif wieħed jipprova jirraġuna, din il-persuna tispiċċa taqa’ personali u tinfexx titgħajjar.

Għaldaqstant, persuna fanatika mhix kapaċi tuża moħħha u tasal waħedha għall-konklużjonijiet, imma toqgħod fuq dak li jgħid il-partit permezz tal-midja tiegħu. Persuna fanatika hija persuna li tibla’ r-ross bil-labra. Hija persuna li minn filgħodu sa filgħaxija taf titkellem biss fuq il-politika partiġjana.

Sfortunatament, il-partiti politiċi jagħmlu ‘festa’ fuq l-injoranza tagħha! Jien m’iniex persuna fanatika. Qatt ma kont. Lanqas meta kont saċerdot. L-abjad u l-iswed dejjem sejjaħtilhom b’isimhom. Preżentement jien mhux biss Viċi Sindku f’San Ġiljan, imma kandidat għall-elezzjoni ġenerali fuq id-disa’ u l-għaxar distrett.

Għalkemm diversi huma viċin tal-PN, xi wħud sabu lilhom infushom jivvutaw għall-ewwel darba lill-Partit Laburista. Oħrajn għadhom jemmnu li l-PN wettaq l-iżbalji u kien jimmeritah li jispiċċa fl-Oppożizzjoni. Oħrajn donnhom qatgħu qalbhom mill-politika inġenerali. F’dawn id-distretti jgħixu diversi ċittadini li mhumiex fanatiċi tal-politika. Għalihom ilpolitika hija importanti sa ċertu livell. F’ħajjithom hemm valuri, interessi u suġġetti oħrajn. Filwaqt li jemmnu fil-valur tal-politika, ma jemmnux bis-sħiħ fil-politika partiġjana. Il-PN irid jersaq lejn dawn il-persuni mhux biss b’umiltà, imma anke b’inqas aggressività politika. Inħoss li ma’ dawn iċ-ċittadini rridu nidħlu fi djalogu kostruttiv, intelliġenti u awtokritiku. Wieħed ma jibżax isemmi t-tajjeb u l-ħażin tal-Gvern Laburista u fl-istess waqt isemmi t-tajjeb u l-ħażin li l-PN wettaq fit-tmexxija.

Din hija l-politika onesta u l-politika differenti li Simon Busuttil qiegħed jinsisti dwarha. Inħoss li diversi ċittadini jistgħu jerġgħu lura lejn il-PN jekk dan jagħraf jidħol fi djalogu kostruttiv lil hinn minn doża ta’ partiġjaniżmu aggressiv. Min-naħa l-oħra, diversi residenti f’dawn id-distretti ma jistgħux jifhmu kif filwaqt li diversi Nazzjonalisti kienu kritiċi quddiem il-partit tagħhom u fl-aħħar elezzjoni vvutaw lill-Partit Laburista, ma jistax jingħad l-istess għall-partitarji Laburisti.

Mistoqsija li spiss ikolli hija: ‘Huwa possibbli li quddiem dawn l-iskandli kollha, quddiem dan l-ingann, abbuż ta’ poter, kontijiet sigrieti, ftehimiet dubjużi u qerq sfaċċat li qiegħed isir taħt l-amministrazzjoni preżenti, xorta dawn il-partitarji Laburisi jibqgħu jiġġustifikaw u jagħtu l-appoġġ tagħom? Huwa possibbli li quddiem dan kollu jagħżlu li jkunu torox u għomja?’

It-tweġiba tiegħi tkun li sfortunatament hawn persuni li għalihom il-ġibda tat-tribù hija ferm aktar qawwija millġibda għall-verità u l-onestà. Sfortunatament, xi wħud għandhom għajnejn imma jagħżlu li ma jarawx. Għandhom widnejn u jagħżlu li ma jisimgħux. Sewwa jgħid il-Malti.

(Dan l-artiklu ġie ippublikat fuq il-gazzetta Il-Mument – 22 ta' Mejju, 2016)