L-identità tal-Partit Nazzjonalista

L-għajta tal-PN għandha tkun li kull persuna hija l-ewwel u qabel kollox! Nemmen li din hija l-karta tal-identità tal-PN.

Il-karta tal-identità tagħti l-informazzjoni bażika fuqna: isimna, kunjomna, data tat-twelid u l-indirizz fejn noqogħdu. Imma aħna ferm aktar minn hekk! Aħna nsarrfu aktar minn sitt numri! Wara kull karta tal-identità, hemm persuna bi storja twila ta’ ħajja, snin u esperjenzi varji li l-ħajja taf toffri. Xi wħud minnhom sbieħ u ta’ sodisfazzjon. Xi wħud minnhom koroh. Oħrajn huma mumenti ta’ diżappunt u qtigħ il-qalb. Dan kollu jinġabar flimkien biex jagħġinna u jagħmilna dak li aħna. Aħna dak li aħna għaliex għandna l-passat u l-preżent magħġuna flimkien. Il-passat u l-preżent jinġabru flimkien biex jagħtuna l-identità vera tagħna lil hinn minn sitt numri. Jien dak li jien illum, bis-saħħa ta’ dak li kont ilbieraħ!

L-identità tagħna twassal x'inhuma l-valuri tagħna. Turi liema huma l-għażliet tagħna tal-bieraħ, tal-lum u ta’ għada. L-identità tikxef kif inħarsu lejn il-ħajja u x’inhi l-viżjoni li għandna. L-identità tagħna tikxef min aħna verament. Dan huwa proċess kontinwu li jaf il-waqfien tiegħu mal-mewt fiżika.

Imma min-naħa l-oħra, min mhuwiex f’kuntatt kontinwu miegħu nnifsu, jista’ jidħol fi kriżi ta’ identit. – ma jafx xi jrid mill-ħajja, ma jafx x’se jagħmel fil-ħajja u ma jafx għaliex qiegħed jgħix! Għaldaqstant, kif minn żmien għal ieħor ikollna nġeddu l-karta tal-identità li tkun skadiet, hekk ukoll biex fil-ħajja ‘ma niskadux’, hemm bżonn li nġeddu l-identità tagħna. Dan huwa proċess f’mixja kontinwa ta’ tiġdid.

Għaliex qiegħed ngħid dan? Qiegħed ngħid dan kollu biex inkun nista’ nsaqsi mistoqsija provokattika: X’inhi l-karta ta' l-identità tal-Partit Nazzjonalista? Dak kollu li ktibt hawn fuq l-identità u l-bżonn ta’ tiġdid, japplika għall-PN? Ir-risposta sinċiera, bla aġenda hi IVA. Jekk ma rridux ikollna kriżi ta’ identità, il-Partit irid jistaqsi fuq l-identità aġġornata tiegħu.

Matul din is-sena qegħdin niċċelebraw 135 sena mit-twaqqif tal-Partit. Għal dawn l-aħħar 135 sena, il-PN kien forza ta’ ġid u progress. Malta mmexxija mill-PN imxiet ’il quddiem. Għalkemm kien hemm mumenti ta’ diżappunt, telf, żbalji u stejjer u persuni li jimbarazzawna, kollox ma’ kollox nistgħu ngħidu b’wiċċna minn quddiem li bit-tmexxija Nazzjonalista ‘rajna wiċċ Malta jinbidel’. Seħħet rivoluzzjoni silenzjuża. Tul dawn is-snin, il-PN, permezz tal-mexxejja tiegħu, dejjem offra identità ċara ta’ pajjiżna. Minn pajjiż magħluq fih innifsu, intimidat mill-aggressività ta’ Mintoff, spiċċa pajjiż modern, liberu u bi kwalit. għolja tal-ħajja għal kulħadd.

Permezz ta’ Nerik Mizzi, il-PN ħadem favur id-dinjità tal-Maltin taħt il-kolonja Ingliża. Permezz ta’ Ġorġ Borg Olivier, il-PN ġab l-identità ta’ pajjiż sovran u indipendenti li jemmen fih innifsu. Permezz ta’ Eddie Fenech Adami, il-PN mhux biss ħareġ mill-morsa Soċjalista, imma ħadem biex jikkonferma l-identità Ewropea tagħna fi ħdan il-komunit. Ewropea. Permezz ta’ Lawrence Gonzi, il-PN offra l-viżjoni ta’ Malta moderna u ugwali fil-komunità Ewropea li taħdem ma’ membri oħrajn.

U issa? X’inhi l-identità tal-Partit? X’inhi l-viżjoni tagħna għal Malta tal-lum u għada? Malta tal-bieraħ mhix Malta tallum.

U Malta tal-lum mhix Malta ta’ għada. Għaldaqstant, il-PN irid iħares ’il quddiem. Il-Partit irid jerġa’ jiskopri l-għeruq u l-valuri tiegħu. Irid jerġa’ jemmen fih innifsu. Jerġa’ jisfida lill-Maltin b’viżjoni ta’ Malta onesta u bieżla. Wara sentejn fit-tmexxija, il-Partit Laburista tbiegħed mill-għeruq u l-valuri ta’ kull partit Laburista. Il-Partit Laburista sar donnu partit neo-Liberali u neo-Kapitalista.

Il-PN ma jistax joqgħod ‘gallarija’ u jistenna ‘lill-Imperatur jispiċċa mingħajr ħwejjeġ’. Irid ikun proattiv. Il-PN irid iġedded l-identità tiegħu bħala partit li lest joffri viżjoni ċara ta’ Malta onesta, bieżla u moderna. Nemmen li bit-tmexxija ta’ Simon Busuttil dan qiegħed bil-mod il-mod iseħħ. Jekk fl-imgħoddi l-għajta Laburista kienet ‘Malta, l-ewwel u qabel kollox’, nemmen li issa l-għajta tal-PN għandha tkun li kull persuna hija l-ewwel u qabel kollox!

Nemmen li din hija l-karta tal-identità tal-PN.

(Dan l-artiklu ġie ippublikat fuq il-gazzetta Il-Mument – 30 ta' Awwissu, 2015)