Meta l-persuni jiġu l-ewwel (2)

Il-Politika vera hija meta l-persuni jiġu l-ewwel. B'hekk nistgħu nħallu din is-soċjetà ftit aħjar milli sibnieha.

Il-Ħadd li għadda qsamt magħkom xi ftit punti dwar xi tfisser il-politika għalija u liema huma dawk il- valuri li nħoss li għandhom ikunu preżenti fil-ħajja politika. Illum nixtieq inkompli naqsam magħkom xi punti oħra.

Fedeltà lejn il-Partit li tfisser fedeltà lejn viżjoni u valurikomuni. Għalkemm tajjeb li jkun hemm ideat differenti, dawn l-ideat differenti għandhom jinġabru f’viżjoni waħda. Fejn hemm il-firda m’hemmx l-għaqda u fejn m’hemmx l-għaqda m’hemmx saħħa. Flimkien biss b’saħħitna u jista’ jkollna mill-ġdid il-fiduċja tal-maġġoranza.

Ħsieb politiku li għandu jkun mibni fuq il-valuri u l-għeruq tal-Partit u mhux fuq konvenjenzi, opportuniżmu, opinjoni pubblika jew marketing . Waqt li l-Partit għandu jżomm ruħu aġġornat ma’ dak li jkun għaddej biex ikollu l-kuraġġ ibiddel dak li ma għadux jgħodd għal-lum, jibqa’ jkollu fedelt. lejn l-għeruq.

Livell ta’ etika fejn mhux kollox jgħaddi jew jgħodd. Għalkemm il-ħajja personali ta’ kull politiku għandha tkun imħarsa u rispettata, kull politiku għandu jaħdem biex ikollu livell ta’ integrit. pubblika. Il-fiduċja fil-politiku tinbena meta hemm l-onest. – lil hinn minn kull xamma ta’ korruzzjoni jew ċerti ‘ħbiberiji’. Il-politiku jrid ‘jgħid dak li se jwettaq u jwettaq dak li jgħid’. Ċertu livell ta’ frustrazzjoni taċ-ċittadini qed jikber għaliex għejjew jisimgħu wegħdi, roadmaps , u timeframes.

Promozzjoni ta’ diversità u ugwaljanza soċjali. Għalkemm wieħed għandu japprezza l-identit. u l-valuri li jsawruh, dan għandu jseħħ b’rispett kbir lejn il-minoranzi. B’hekk ikollna għaqda fid-diversità. Ħadd ma għandu jħossu barrani f’daru stess.

Investiment. Il-politika għandha sservi biex ikun hemm investiment qawwi fl-infrastruttura edukattiva formali, informali u edukazzjoni vokazzjonali. L-edukazzjoni fiddiversi forom tagħha, hija mhux biss iċ-ċavetta għal futur ta’ kwalità għal uliedna, imma hija l-pedament ta’ soċjetà demokratika u inklużiva fejn kull persuna għandu jkollha l-opportunitajiet meħtieġa biex timxi ’l quddiem u twettaq l-aspirazzjonijiet tagħha.

Vuċi tal-persuni mingħajr vuċi. Meta l-politika tkun mibnija fuq id-dinjit. umana, allura l-politika ma tistax ma titkellimx f’isem il-persuni li jinsabu fit-tarf tas-soċjetà u ssir leħen ta’ solidarjetà. Politika vera taħdem id f’id mas-soċjetà ċivili biex tinħoloq kultura ta’ kenn u appoġġ.

Politika li tmur lil hinn minn politika ta’ tgħajjir u insulti u minflok tkun Politika bil-‘P’ kbira – li toffri rispett, soluzzjonijiet u alternattivi ta’ tmexxija. Id-differenzi tal-ħsieb politiku għandhom jgħinu biex ikollna soċjetà b’demokrazija aktar matura.

Ħarsien tal-ambjent u l-patrimonju tagħna bħala investiment għall-futur ta’ wliedna. Dan il-pajjiż ma jistax jispiċċa donnu belt waħda. Il-kampanja tagħna ma tistax tinkesa bis-siment jew taqa’ fis-silenzju. B’rispett lejna u lejn uliedna għandna bżonn politika li taħdem mas-soċjet. ċivili biex ikun hemm żvilupp sostenibbli.

Għaqal fit-tmexxija. Il-politika tkun kredibbli meta tkun serja, trasparenti, kontabbli fi tmexxija pubblika. Spiss nisimgħu dwar dan, IMMA bejn il-kliem u l-fatti hemm baħar imqalleb! Kull proposta politika trid tirrispetta l-intelliġenza taċ-ċittadini u toffri l-informazzjoni kollha. Spiċċa żmien li ċ-ċittadini jemmnu u jaqblu ma’ kollox. Ċittadini serji u maturi jistennew risposti serji u maturi mill-politiċi tagħhom.

Sekulariżmu pożittiv. Għalkemm wieħed għandu japprezza u jgħożż il-patrimonju Nisrani u l-kontribut li dan ta lill-pajjiż, ikun ta’ ġid għas-soċjetà u għall-istess komunità li jkun hemm awtonomija sħiħa u rispett reċiproku. Illum il-ġurnata s-soċjetà hija magħmula minn diversi persuni ta’ opinjonijiet, valuri u twemmin differenti. Għaldaqstant, il-politiku, waqt li għandu jkollu fedeltà sħiħa lejn il-valuri li jagħtuh identità, irid jifhem li huwa qiegħed f’isem kulħadd.

Il-Politika vera hija meta l-persuni jiġu l-ewwel. B’hekk nistgħu nħallu din is-soċjetà ftit aħjar milli sibnieha.

(Dan l-artiklu ġie ippublikat fuq il-gazzetta Il-Mument – 22 ta' Frar, 2015)