Mhux jien mamà

Aktar ma jgħaddi ż-żmien, aktar toħroġ ċara d-differenza fl-irġulija u l-onestà bejn Joseph Muscat u Simon Busuttil. Sintendi, għall min irid jara!

Diversi snin ilu kien hawn diska bil-Malti bl-isem ‘Mhux jien mamà’. Min għandu ċerta età żgur li jiftakar sew din il-kanzunetta. Fl-aħħar ġranet smajna diversi drabi lill-eksSegretarju Parlamentari Michael Falzon isostni, li hu ma kienx involut fil-każ tal-iskandlu li fih Gaffarena ngħata kumpens skandaluż għal xiri ta’ parti waħda minn palazzin il-Belt. Ikoll qrajna wkoll il-konklużjonijiet tal-Awditur Ġenerali. Mingħajr ebda tlaqliq, l-Awditur Ġenerali kkonferma dak li l-Partit Nazzjonalista u diversi mezzi talmedja kienu qegħdin isostnu għal xhur sħaħ. Għal darba oħra, Simon Busuttil ingħata raġun. Il-verità ħarġet rebbieħa fuq il-qerq u l-ingann tal-Gvern. Imma għall-eks-Segretarju Parlamentari, hu ma kellux x’jaqsam! ‘Mhux jien mamà’.

Għalkemm l-eks-Segretarju Parlamentari kien politikament responsabbli mit-tmexxija tad-Dipartiment tal-Artijiet, ħass li ma kellu jġorr l-ebda responsabbiltà. Meta fl-aħħar ġie dahru mal-ħajt, kellu jagħmel dak li ma riedx. Irriżenja kontra qalbu. Qiegħed jagħmel donnu t-tfajjel innoċenti Geordie li fid-diska li jsostni, għal darba darbtejn, li ma kienx hu li kisser il-vażun! ‘Mhux jien mamà’.

Imma l-eks-Segretarju Parlamentari mhux biss ma riedx jammetti r-responsabbiltà ta’ għemilu (għaliex kien hu li ffirma l-ftehim), imma wasal biex ikkritika lill-istess Awditur Ġenerali! Stqarr li kien hemm sabutaġġ politiku fil-konfront tiegħu!

Kriżi ta’ governanza tajba

Din hi kritika ta’ attitudni ta’ kif wieħed jagħmel il-politika. Din hi kritika fuq il-governanza ta’ pajjiżna. Nemmen li l-Gvern Laburista għandu problema serja ta’ governanza onesta u serja. Laburisti ġenwini qegħdin huma wkoll jagħmlu din l-osservazzjoni. L-istess Prim Ministru, li fir-realtà huwa -lMinistru tal-Artijiet, ipprova jilgħab gallarija u qisu ma kien qed jiġri xejn. Wara xhur ta’ stennija, iddikjara li se ‘jidħol bir-ras’ biex isolvi l-kwistjoni tal-governanza ħażina. Għal sensiela sħiħa ta’ akkużi ta’ korruzzjoni, il-Gvern ġab diversi skużi biex forsi jsalva wiċċu. Ma’ kull jum qegħdin jinkixfu stejjer ta’ korruzzjoni, gula minn nies tal-qalba, qerq u ingann. U dan kollu wara sentejn u nofs ta’ tmexxija biss!

Din l-attitudni qiegħda tagħmel ħsara mhux daqstant lill-kredibbiltà tal-Partit Laburista, imma qiegħda tagħmel ħsara lill-fiduċja li ċ-ċittadini għandhom lejn il-politiċi kollha. Dan hu ta’ periklu għad-demokrazija ta’ pajjiżna.

Aktar uċuħ b’innoċenza falza

Imma d-Deputat Michael Falzon mhux waħdu f’din l-attitudni ta’ innoċenza falza. Kellna lill-eks-Ministru Mallia li stqarr li ma kellux x’jaqsam fil-cover up tal-isparatura tassewwieq tiegħu. Kellna lill-Ministru Helena Dalli li quddiem l-irregolaritajiet fil-bini ta’ post li hi s-sidt tiegħu wkoll, tistqarr li ma kinitx taf.

Għandna lis-Segretarju Parlamentari Ian Borg li b’wiċċ innoċenti jsostni li r-rapport tal-Ombudsman, li permezz tiegħu sab li l-uża ‘mezzi ta’ ingann’ biex jinħariġlu l-permess, ma kienx imdaħħal fil-kwistjoni tal-applikazzjoni! Ħadd mill-Gvern mhu qiegħed iħossu responsabbli ta’ xejn. Ilkoll innoċenti! ‘Mhux jien mamà’.

Meta l-Gvern jinqabad…

U bħal tifel żgħir li meta jinqabad jagħmel xi ħaġa ħażina jipprova jwaħħal f’ħaddieħor ħalli l-attenzjoni tmur fuq ħaddieħor. Hekk jagħmel il-Gvern meta jinqabad. Il-Gvern Laburista jemmen li meta wieħed isemmi l-passat, allura jista’ forsi jnessi l-preżent. Nesa l-Gvern Laburista li tela’ bil-wegħda solenni li se jagħmel politika ġdida?

Nistqarr li l-Prim Ministru, quddiem dawn l-iskandli, ingann u tgħawwiġ tal-verità, kellu l-isbaħ ċans biex jieħu pożizzjoni ċara u forsi jerġa’ jirbaħ ftit mill-kredibbiltà li l-Gvern immexxi minnu qiegħed jitlef. Il-Prim Ministru, minflok kien sod ma’ dawk involuti, spiċċa biex mar jgħannaqhom u faħħarhom għall-irġulija tagħhom!

Aktar ma jgħaddi ż-żmien, aktar toħroġ ċara d-differenza fl-irġulija u l-onestà bejn Joseph Muscat u Simon Busuttil. Sintendi, għal min irid jara!

(Dan l-artiklu ġie ippublikat fuq il-gazzetta Il-Mument – 31 ta' Jannar, 2016)