Min jitħanżer u min jitbażwar!

Mhux aċċettabbli li hawn persuni jitħallew jitħanżru minn fu il-but tal-poplu waqt li oħrajn qegħdin jitbażwru biex jirnexxilhom jaslu sal-aħħar tax-xahar.

Credit: Shutterstock.com

Ftit tal-ġranet ilu, ġiet pubblikata analiżi mill-KMPG li kkonfermat mill-ġdid dak li diversi qegħdin għaddejjin minnu u minn dak li l-PN ilu għal diversi xhur jinsisti dwaru.

F’dan l-aħħar stħarriġ ġie kkonfermat li fid-dawl li ċ-ċittadini qedgħdin iħossu l-piż tal-għoli tal-ħajja, huma qegħdin jibqgħu lura min ċertu attivitajiet ta’ divertiment u attivitajiet oħra. Dan qed jagħmlu biex ikunu jistgħu jiffrankaw biex b’hekk ilaħħqu mal-għoli tal-ħajja. Sentenza li laqtitni minn dan ir-rapport maħruġ kienet: ‘many are thinking of changing their lifestyles’ – ‘diversi qegħdin jbiddlu l-istil tal-ħajja tagħhom’. Fil-qosor, qegħdin joqgħodu ‘bilgħaqal’ u jibqgħu lura minn numru ta’ affarijiet/attivitajiet li kienu jħobbu jagħmlu għaliex inkella ma jwasslux sal-aħħar ta’ kull xahar. Fil-fatt, skont l-NSO kien hemm tnaqqis fil-konsum ta’ prodotti ta’ divertiment.

Mhux hekk biss, skont l-aħħar stħarrig ukoll ta’ NSO, persuni li jaħdmu full-time spiċċaw iridu jagħmlu part-time ukoll. Fil-fatt, kien hemm żieda ta’ 9.7%. Dan ifisser li n-numru ta’ persuni li jaħdmu full-time imma ħassew il-bżonn li jagħmlu wkoll part-time issa huwa ta’ 38,791. Għalkemm mhux l-ewwel darba li xi ħadd jagħmel ukoll part-time għaliex ser ikun dieħel/daħal għal xi spiża kbira, imma din iż-żieda tista’ tfisser ukoll li b’paga waħda dan ma jistax jibqa’ jgawdi livell tajjeb ta’ għajxien.

Dan jista’ wkoll juri li jekk dan huwa f’relazzjoni u s-sieħeb/sieħba tiegħu qed taħdem ukoll, dan ifisser li koppja waslet f’sitwazzjoni li biex ikollha l-livell ta’ għajxien, għandha bżonn li jkollha tliet impiegi? Jekk iva, dan ser ikompli jnaqqas il-kwalità tal-ħajja ta’ dawn il-koppji. Min jaħdem fil-qasam soċjali jaf sew li meta koppja tonqsilha ż-żmien/ħin li tqatta’ flimkien, hemm il-periklu li jkun hemm diffikultajiet fir-relazzjoni tagħhom! Dan jista’ jwassal għal mhux biss problemi soċjali oħra imma r-relazzjoni tal-koppja tkun qed teżisiti aktar milli tkun waħda ħajja! U dan kollu għaliex ma jistgħux ilaħħqu mal-għoli tal-ħajja!

U hawn tajjeb li ngħidu li l-għoli tal-ħajja, li filwaqt f’Frar 2022 kien ta’ 4.2%, fi Frar ta’ din is-sena tela’ għal 7% u issa f’Marzu li għadda ir-rata kienet 7.1%. Din iż-żieda hija aktar minn dik tal-pajjiżi li jinsabu fiż-żona ewro, fejn ir-rata tal-inflazzjoni hija ta’ 6.9%!

Lil hinn minn ċifri, iċ-ċittadini, b’mod partikolari dawk il-familji vulnerabbli, jafu li meta qegħdin imorru kull ġimgħa jixtru l-affarijiet bażiċi tal-ikel, qegħdin iħallsu aktar għall-istess affarijiet. Dan kien ukoll ikkonfermat mill-Ministru Clyde Caruana nnifsu meta fil-Parlament hu stqarr li xirja li qabel kienet tiswa €220, issa saret tiswa €290. Dan ifisser €70 aktar!

L-unika persuni li mhumiex qegħdin iħossu din iż-żieda huma dawk tal-qalba li jinsabu mitlufin jiffangaw jew aħjar, kif qalet Rosianne Cutajar, jinsabu jitħanżru!

Numru ta’ persuni tal-qalba, fosthom il-partners tal-Ministri qegħdin jitħanżru sew bħal attaparsi qegħdin jagħtu konsulenzi u ħidmiet oħra.

Nagħti ftit eżempji ta’ dan. Tajjeb li nsemmgħu li l-eks deputati tal-Gvern qegħdin tħallsu/jitħallsu somom mill-flus pubbliċi biex jitkomplew jitħanżru. Mela Gavin Gulia qala’ €388,000, Luciano Busuttil ħa €350,614, Silvio Grixti qala’ €234,640, filwaqt li Etienne Grech li qala’ €59,651. Dawn huma biss xi wħud minn dak li semmiet Rosianne Cutajar.

Żgur li dawn u ħafna oħrajn mhumiex biss qegħdin iħossu l-għoli tal-ħajja u żgur mhumiex qed jibqgħu lura milli jiddevertu kif l-istħarriġ ta’ KPMG qiegħed jindika li diversi Maltin qegħdin jagħmlu.

Il-PN għal darba oħra qiegħed ifakkar lil Gvern ta’ Robert Abela fir-responsabbiltà li jara li jieqaf dan it-tħanżir kollu u jkun hemm verament miżuri biex itaffi l-għoli tal-ħajja tal-familji. Hija fir-responsabbiltà tal-Gvern li jirażżan lil min qed jitħanzer, jieqaf iwaħħal f’ħaddieħor u fil-ġrajjiet internazzjonali u jibda iġorr ir-responsabbiltà tat-tmexxija.

Mhux aċċettabbli li hawn persuni jitħallew jitħanżru minn fuq il-but tal-poplu waqt li oħrajn qegħdin jitbażwru biex jirnexxilhom jaslu sal-aħħar tax-xahar.

(Dan l-artiklu ġie ippublikat fuq il-gazzetta Il-Mument – 30 t' April, 2023)