Miskin min ikasbarni
- Jul 31, 2023
- 3 min read
Jidher biċ-ċar li l-poplu jinsab diżappuntat li ġie mqarraq. Robert Abela daħaq bih.
‘Miskin min ikasbarni. Miskin min jidhaq bija.’ Hekk kiteb Rużar Briffa fil-poeżija tiegħu meta l-Maltin qamu kontra l-ħakkiem barrani. Hekk ukoll stqarr il-poplu mill-ġdid meta semma’ leħnu b’eluf miġbura fil-Belt Valletta fil-vġili għal Jean Paul Sofia.
Wara 10 snin ta’ Gvern Laburista, li tela’ bil-wegħda ta’ politika nadifa u ġdida, il-poplu kellu jerġa’ joħroġ isemma’ leħnu. Jidher biċ-ċar li l-poplu jinsab diżappuntat li gie mqarraq. Jidher ċar li l-poplu jħoss li Robert Abela daħaq bih. Għalhekk il-poplu huwa rrabjat. Deher biċ-ċar li l-poplu miġbur huwa mdejjaq mhux biss b’dan il-każ, imma bis-sensiela sħiħa ta’ skandli wieħed wara l-ieħor. Il-poplu qiegħed jifhem li jekk dawn l-iskandli jispiċċaw isiru qishom mhuma xejn, allura ‘ruħ’ pajjiżna ser tispiċċa. Jidher biċ-ċar li l-poplu mhuwiex kuntent bil-mod li dan il-Gvern qiegħed imexxi. Dan ħareġ ukoll ċar fl-aħħar stħarriġ li sar.
Irridu ngħixu f’pajjiż nadif. Irridu ngħixu f’pajjiż normali
Il-maġġoranza taċ-ċittadini huma onesti; li jaqilgħu l-ħobża tagħhom bl-għaraq ta’ ġbinhom; li jħallsu t-taxxi; li jħobbu lil pajjiżhom u jixtiequ l-ġid lil din “l-art li tatna isimha”. Il-kotra fehmet li l-korruzzjoni hija theddida għall-istess demokrazija tagħna. Jekk xi ħadd huwa korrott, se jmexxi b’mod korrott. Jekk xi ħadd m’għandu ebda skrupli li jwettaq korruzzjoni, mhux ser ikollu ebda skruplu biex jibqa’ jiffanga u jiggranfa mas-siġġu tal-poter. Min għandu d-dell tal-korruzzjoni fuqu, ma jistax imexxi bis-serenità meħtieġa. Għaldaqstant, quddiem l-akkużi serji ta’ korruzzjoni sistematika minn dawk stess li qegħdin imexxu pajjiżna.
Il-kotra Maltija ma tridtx tgħix f’soċjetà diżonesta u maħmuġa; ma tixtiqx li wliedha jikbru f’soċjetà fejn xejn mhu xejn, u li kollox jgħaddi; ma riditx li hi u wliedha jgħixu f’soċjetà fejn il-korruzzjoni hija n-norma tal-ħajja u mhux l-eċċezzjoni. Il-kotra mhux ser tittollera aktar lil min jinqeda biha biex jiffanga u jsir sinjur minn fuq daharha.
Hija tal-mistħija li, filwaqt li l-gvern jiġri wara dawk li jabbużaw mis-servizzi soċjali, mingħajr lanqas jagħti kas, forsi tal-vulnerabbiltà tagħhom; waqt li l-pensjonanti jippruvaw jaraw kif se jwasslu sal-aħħar tax-xahar; waqt li persuni morda bil-kanċer jittalbu lill-President biex jgħinhom biex ikollhom il-kura meħtieġa, diversi ‘ħbieb tal-ħbieb’ ikomplu jiffangaw mingħajr mistħija ta’ xejn.
Jiem iebsa
F’dawn il-jiem kellna wkoll Malta kollha mingħajr servizz ta’ dawl. Kienu jiem iebsa għal diversi, fosthom anzjani, morda u anke negozjanti li tilfu kollox. Quddiem dan il-qtugħ kollu, minflok li l-Gvern jammetti li matul dawn l-aħħar 10 snin ma għamel kważi xejn fuq il-problema tad-distribuzzjoni, spiċċa bħas-soltu jwaħħal fil-Gvern Nazzjonalista meta Lawrence Gonzi kien Prim Ministru. Lanqas wieħed jemminha din! Mhux hekk biss. Kellna ministru li tgħid lil dawk mingħajr dawl biex ma jgergrux u jmorru minflok jaqraw ktieb! Huwa tajjeb li wieħed jaqra u għandha bżonn kbir anke fid-dawl li aħna poplu li ma nħobbux naqraw, imma żgur li dan ma kienx il-mument li wieħed jgħid dan! Dan kollu juri li l-Gvern ta’ Robert Abela jinsab maqtuħ mir-realtà ta’ kuljum. Huwa Gvern li jgħix f’dinja għalih, fejn qiegħed jitħanżer fuq li jitħanżer fuq dahar il-pubbliku. Huwa Gvern insensittiv. U dan ħareġ ċar wara l-votazzjoni fil-Parlament dwar l-Inkjesta Pubblika fuq il-każ ta’ Jean Paul Sofia. Wara li ġel lid-deputati kollha tiegħu biex jivvutaw bħalu, Robert Abela b’insensittività kbira mhux biss mar jiġri siegħa wara għal kunċert imma l-għada mar jiġri bil-yot ġewwa Ragusa. Filwaqt li wieħed jifhem li anke Prim Ministru għandu bżonn tal-mistrieħ, imma żgur li ma kienx dan il-mument.
Dan il-Gvern Laburista ma baqagħlu l-ebda mistħija ta’ xejn.
Il-Partit Nazzjonalista jkun il-vuċi tan-nies
Il-Partit Nazzjonalista, imexxi minn Bernard Grech u d-deputati kollegi kollha tiegħu, ser nkomplu nagħmlu l-ħila tagħna biex inkunu mhux biss viċin in-nies imma nkomplu nkunu vuċi għalihom.
(Dan l-artiklu ġie ippublikat fuq il-gazzetta Il-Mument – 30 ta' Lulju, 2023)