Nagħlaq il-kapitlu politiku tiegħi

Filwaqt li nifraħ lil dawk li ġew eletti, ġentilment ngħaraf li b’dan ir-riżultat ser ikun qiegħed nagħlaq il-kapitlu politiku tiegħi.

F’ħajti kelli diversi kapitli – saċerdot, għalliem, manager, kap eżekuttiv, viċi sindku, sindku, deputat. Kull kapitlu kellu s-sabiħ u l-isfidi tiegħu.

Matul dan il-kapitlu politiku dejjem għamilt ħilti biex inkun vuċi tal-ġid komuni u tar-residenti. Ninsab kburi li matul dan iż-żmien dejjem bqajt konsistenti mal-valuri tiegħi, anke meta ma kientx faċli jew taħt pressjoni biex ma nagħmilx dan. Dan ifisser li ħiereġ mill-kamp politiku kif dħalt, b’subajja dritt!

Filwaqt li qiegħed nagħlaq dan il-kaptilu politiku, xorta ser inkompli nkun ċittadin attiv u ser nibqa’ insemmi leħni b’mod assertiv fuq temi li nemmen bis-sħiħ fihom: l-ambjent, fit-tifsira wiesgħa, l-ġustizzja soċjali, u l-inklusjoni.

Nirringrazzja lil PN għal opportunitajiet li tagħni biex inservi lil komunità, b’mod partikolari nsellem lil Simon Busuttil li emmen fija u numru ta’ kollegi oħra li magħhom ħdimt.

Grazzi lil dawk li kienu ta’ sostenn, b’mod partikolari l-familja tiegħi.

Bil-Malti ngħidu li, ‘il-Mulej jagħlaq bieb u jiftaħ ieħor’.

Il-ħajja tkompli… u kif!