Nirnexxu lkoll flimkien

Simon Busuttil dejjem wera biċ-ċar li huwa persuna ta' integrità u onestà kbira… id-determinazzjoni tiegħu hija ta' eżempju għalina lkoll.

It-tema magħżula għal din is-sena mill-Partit Nazzjonalista biex titfakkar il-kisba tal-Indipendenza hija ‘Nirnexxu lkoll flimkien’. Huwa slogan li juri verità kbira. Jikxef li meta naħdmu flimkien u niġbdu ħabel wieħed, nistgħu nirnexxu. Għalija personali l-aktar kelma importanti f’dan is-slogan magħżul hija ‘flimkien’.

‘Flimkien ma’ min?’, wieħed jista’jistaqsi.

Flimkien ma’ Simon Busuttil

Simon Busuttil huwa l-Kap tal-PN. Miegħu rridu niġbdu l-istess ħabel. Miegħu rridu nwasslu l-messaġġ li l-PN huwa gvern alternattiv. Id-dedikazzjoni u l-impenn tiegħu lejn il-Partit u lejn pajjiżu huma eżempju ċar ta’ persuna li temmen verament f’dak li qiegħda tgħid u tagħmel. Il-ħidma tiegħu mhix faċli. Kull meta kelli l-opportunità niltaqa’ miegħu, Simon Busuttil dejjem wera biċ-ċar li huwa persuna ta’ integrità u onestà kbira. Għalija, huwa persuna b’missjoni kbira u diffiċli. Mhux faċli li l-Partit jerġa’ jqum fuq saqajh u jerġa’ jgawdi l-fiduċja tal-maġġoranza. Imma Simon huwa determinat. Id-determinazzjoni tiegħu hija ta’ eżempju għalina lkoll.

Kien ikun aktar faċli għalih kieku baqa’ fil-kariga li kellu qabel. Imma Simon Busuttil ma ħasibx għalih innifsu. Daħal għal din l-isfida kbira b’ruħu u b’ġismu. Għaldaqstant, nagħmlu tajjeb li napprezzaw dan u noffru l-appoġġ tagħna.

Nagħmlu tajjeb ukoll jekk niftakru li Simon Busuttil mhuwiex Lawrence Gonzi, kif Lawrence Gonzi ma kienx lanqas Eddie Fenech Adami. Simon Busuttil huwa Simon Busuttil. Għandu karattru, kapaċitajiet u limitazzjonijiet tiegħu bħal kull persuna oħra. Ikun żball jekk wieħed joqgħod iqabbel il-karattru u l-personalità ma’ ta’ oħrajn.

Min-naħa l-oħra nemmen li jkun żball akbar jekk norbtu l-partit mal-persuna tal-kap, huwa min huwa. Il-partit huwa akbar mill-mexxej tiegħu. Il-partit jiġi qabel kull mexxej. Dan huwa bil-kontra tal-Partit Laburista fejn donnu hemm il-kult tal-personalità. Fi ħdan il-Partit Laburista, il-Mexxej huwa kważi aqwa mill-Partit stess.

Flimkien mad-deputati, il-kandidati u l-attivisti

Waħda mir-raġunijiet tat-telfa li kellu l-PN fl-aħħar elezzjoni ġenerali kienet l-fatt li mhux biss kien hemm nuqqas ta’ għaqda fostna, imma wkoll nuqqas ta’ teamwork. Għalkemm issistema elettorali tagħna tpoġġi lill-kandidati f’kompetizzjoni diretta ma’ xulxin, u fil-verità hemm numru kemm jistgħu jitilgħu, huwa fl-interess ta’ kulħadd li naħdmu bħala tim.

Li wieħed jaħdem f’tim mhix faċli. Għalkemm min jaħdem f’tim għandu jkollu viżjoni u għan wieħed, dan ma jfissirx li kulħadd jaħsibha l-istess. U hawn hija l-akbar problema. Tim veru huwa dak li jagħti l-ispazju kollu meħtieġ biex ikun hemm diskussjoni sħiħa u aperta.

Iċ-ċittadini huma għatxana għall-għaqda u mhux għall-firda. Filwaqt li nifhem li d-deputati u l-kandidati jinsabu f’kompetizzjoni flimkien, ejjew nagħmlu din il-kompetizzjoni f’ambjent ta’ ħbiberija. Ikun ta’ ħsara għall-Partit u għalina stess meta naħsbu biss fl-ambizzjonijiet egoistiċi tagħna. Tajjeb niftakru li kull partit politiku jew entità tista’ tiġġedded maż-żmien jekk ikun hemm ‘demm ġdid’. Għaldaqstant, ħadd ma għandu jipprova jagħmel bsaten fir-roti lil ħadd. Ikun żball akbar meta ndawru l-kumitati tal-każini jew strutturi interni oħra tal-partit f’xi tip ta’ territorju personali ta’ xi deputat jew kandidat.

Flimkien mas-soċjetà ċivili

Diversi ċittadini ma jħossuhomx komdi li jkunu membri f’partit politiku. Għalkemm dawn mhumiex fi ħdan partit politiku, xorta għandhom sens qawwi ta’ responsabbiltà ċivili. Flaħħar snin kienu diversi ċ-ċittadini li ħassew li jagħtu sehemhom. Dan seħħ b’mod partikulari fuq temi ambjentali. Waqt li mhumiex membri ta’ xi partit, xorta jridu jsemmgħu leħinhom. Il-każ tal-Ponta taż-Żonqor, l-iżvilupp ta’ torrijiet f’Tas-Sliema, l-iżvilupp ta’ Wied Għomor fil-limiti ta’ San Ġwann, San Ġiljan u s-Swieqi, huma eżempju ta’ kif iċ-ċittadini qegħdin ikunu attivi.

Jagħmel tajjeb il-PN li joħloq alleanzi mas-soċjetà ċivili. Huwa importanti li l-PN jagħti l-appoġġ u l-ispazju meħtieġ lil dawn iċ-ċittadini attivi biex flimkien inwasslu l-vuċi tagħna. Ikun żball għall-PN jekk jinqata’ għalih waħdu. U jkun żball ieħor jekk nibqgħu mwaħħlin emozzjonalment ma’ xi kwistjoni tal-passat. Huwa importanti li flimkien immorru lil hinn minn dan. Huwa importanti li ngħaqqdu l-forzi u r-riżorsi tagħna. Flimkien nistgħu nirnexxu. Ejjew ma naqgħux f’dak li kien jgħid Napuljun meta kien jgħid: ‘Ifred u tirbaħ’.

Fil-jiem li ġejjin se jkun hemm diversi attivitajiet organizzati biex infakkru din il-ġrajja storika. Filwaqt li nħeġġeġ lil ħafna biex jattendu, b’mod partikulari għall-mass meeting ta’ kull sena, nagħmlu tajjeb li nemmnu li verament flimkien nirnexxu lkoll.

(Dan l-artiklu ġie ippublikat fuq il-gazzetta Il-Mument – 11 ta' Settembru, 2016)