Politika ta' ħniena

Hija inġustizzja kbira meta huma l-ftit dawk li jimxu 'l quddiem waqt li l-ħafna jibqgħu lura.

Fil-bidu ta’ dan ix-xahar, il-Papa Franġisku nieda sena ta’ ħniena. Matul din is-sena, il-Papa Franġisku qiegħed jistieden lill-Insara biex ikunu f’ħajjithom mera u ambaxxaturi tal-ħniena ta’ Alla, li huwa għani fil-ħniena tiegħu magħna. Min huwa midħla ta’ Alla, żgur ġarrab u jġarrab din l-esperjenza qawwija ta’ dan il-Missier.

Imma l-istedina tal-Papa Franġisku tmur lil hinn mill-konfini tad-diskors reliġjuż. Hija stedina indirizzata mhux biss lil dawk li huma Kattoliċi. Hija messaġġ qawwi li ma għandux jingħalaq fost l-ambjenti Kristjani. Għaldaqstant, nemmen bis-sħiħ li dan il-messaġġ huwa messaġġ qawwi għal dawk kollha ta’ rieda tajba.

Messaġġ lil dawk il-politiċi li daħlu fil-politika bl-għan wieħed u ewlieni li jibnu soċjetà aħjar, aktar inklużiva u aktar umana. Huwa messaġġ li jfakkarna li s-sens tal-ħniena huwa valur fundamentali. Lil hinn mid-diskors u t-tifsira reliġjuża, il-valur tal-ħniena huwa wieħed mill-pedamenti taċ-ċiviltà umana. Mingħajr sens ta’ ħniena lejna nfusna u lejn xulxin, is-soċjetà tieqaf milli tkun umana. Mingħajr ħniena, is-soċjetà tispiċċa titlef is-sens uman tagħha. Mingħajr ħniena, is-soċjetà tkun ‘kiesħa’, jiġifieri mingħajr emozzjoni u bla qalb li tħoss. Mingħajr ħniena, is-soċjetà tieqaf taħseb fl-oħrajn u tispiċċa tħares biss lejn l-interessi personali u egoisti fejn ma jimpurtana minn ħadd u minn xejn ħlief minna nfusna. Mingħajr ilvalur tal-ħniena, is-soċjetà titmexxa mil-liġi tal-ġungla. Mingħajr ħniena, il-persuni jispiċċaw donnhom numri u robots.

Għaldaqstant, il-ħniena tfisser solidarjetà. Il-ħniena tfisser sens ta’ ġenerożità. Il-ħniena tfisser li taħseb f’ħaddieħor. Il- ħniena tfissser li tinsa lilek innifsek u l-interessi tiegħek u taħseb f’ħaddieħor. Il-ħniena tfisser li tifhem li hemm ħaddieħor li jinsab agħar minnek. Il-ħniena tfisser li jimpurtak minn dak li jinsab fit-tarf tas-soċjetà. Il-ħniena tfisser li tagħżel li tkun ġentili aktar milli persuna kattiva, kemm miegħek innifsek u ma’ ħaddieħor. Il-ħniena tfisser li min żbalja, jerġa’ jingħata opportunità oħra biex iqum mill-ġdid fuq riġlejh u jibda kapitlu ġdid f’ħajtu. Ħniena tfisser mogħdrija u tolleranza. Min-naħa l-oħra, il-ħniena ma tfissrix li sempliċement titħassar biss; tgħid ‘jaħasra’ u tibqa’ ma tagħmel xejn.

Il-ħniena vera tieħu azzjoni u ma tibqax indifferenti jew frisk daqs ħassa. Il-ħniena vera tasal biex tħammeġ idejha ħalli tagħti s-sehem tagħha. Dan ifisser li l-ħniena tfisser ukoll il- ħarsien tal-ġustizzja soċjali. Għalkemm kull pesuna għandha ta’ kuljum tagħti s-sehem tagħha biex il-valur ta’ ħniena jkun preżenti fostna, dan kollu jista’ jseħħ meta nagħżlu li jkollna politika ta’ ħniena. Il-politika ta’ ħniena hija politika li toħloq strutturi, skemi, inizjattivi u liġijiet fejn il-ħniena hija murija fit-tmexxija ta’ pajjiżna. Il-politika ta’ ħniena hija mibnija fuq prinċipju ewlieni fejn il-persuna hija fiċ-ċentru tal-ħsieb politiku kollu. Is-soċjetà turi l-kwalità taċ-ċiviltà tagħha meta tħaddem politika b’kuxjenza soċjali. Politika soċjali ġusta tfisser meta lpersuna ma tkunx għas-servizz tal-ekonomija u l-profitt imma hija l-ekonomija u l-profitt li huma għas-servizz tal-persuna. Soċjetà li ma tiħux ħsieb persuni vulnerabbli u mwarrba, hija soċjetà li tilfet il-ġewwieni tagħha.

Dan huwa l-qofol tad-Dokument li tħabbar dan l-aħħar mill-Partit Nazzjonalista bit-tema ‘Ekonomija għan-nies’. Huwa dokument li minnu toħroġ l-identità mġedda tal-Partit li jerġa’ jpoġġi lill-persuna fiċ-ċentru. Meta l-persuna hija fiċ-ċentru u l-għan ta’ kull ħidma politika, allura l-valur tal-ħniena huwa muri wkoll. Il-politika ta’ ħniena għandha wkoll sens qawwi ta’ solidarjetà. Wieħed mill-għanijiet tal-politika huwa li twassal lill-politiċi biex ikunu aġenti ta’ solidarjetà għal dawk li fis-soċjetà waqgħu lura jew huma mgħobbijin bil-piż tal-ħajja.

Għalkemm sfortunatament dejjem se jibqa’ jkun hawn persuni li, għal raġuni jew oħra, se jaqgħu lura u xi wħud minnhom għandhom ‘faqar strutturali’, imma l-politika tal-ħniena trid toffri mhux biss il-‘ħuta’ imma anke l-‘qasba’. Is-solidarjetà tilħaq verament il-milja tagħha meta toffri l-kapaċità li wieħed iqum verament fuq riġlejh – dak li bl-Ingliż jissejjaħ empowerment. Il-politiċi ma jistgħux ‘jużaw’ lill-persuni vulnerabbli biex jidhru huma ġenerużi! Il-politiċi ma jistgħux iżommu l-batut lura biex b’hekk dan jibqa’ jiddependi fuqhom. Il-ħniena mhijiex li titħassar, imma dmir. Il-ħniena mhijiex klijenteliżmu, imma dinjità. Il-ħniena vera tagħti d-dinjità u mhux twassal għal dipendenza. Imma biex iseħħ dan kollu hemm bżonn li l-istrutturi ta’ tmexxija jkunu b’tali mod li kulħadd jingħata l-opportunità li jimxi ’l quddiem.

Hija inġustizzja kbira meta huma l-ftit dawk li jimxu ’l quddiem waqt li l-ħafna jibqgħu lura. Għaldaqstant, il-governanza tajba hija fundamentali biex ikollna politika ta’ ħniena. Proprju dan huwa wieħed mill-punti li joħroġ mid-dokument l-ieħor li l-Partit Nazzjonalista nieda bit-tema ‘Nibnu fiduċja ġdida fil-politika’. Mingħajr governanza u tmexxija tajba, m’hemmx ġustizzja soċjali imma hemm biss tħaddim tal-liġi tal-ġungla. Filwaqt li nixtieq nawgura l-Milied u s-Sena t-Tajba lill-qarrejja kollha u lill-familji tagħhom, jalla matul din is-sena l-ġdida nkunu lkoll aġenti tal-ħniena.

(Dan l-artiklu ġie ippublikat fuq il-gazzetta Il-Mument – 20 ta' Diċembru, 2015)