Politika tas-selfies?

Nemmen fil-politika mhux biss tad-dehra imma anke tas-sustanza.

Credit: Shutterstock.com

Bil-Malti għandna espressjoni li tgħid li l-għajn l-ewwel ma tiekol.

Din l-espressjoni tfisser li l-ewwel impressjonijiet ta’ kif wieħed jidher jew kif jiġi preżentat xi oġġett għal bejgħ, jagħmel differenza kbira. Pereżempju, persuna liebsa pulit u b’xagħar tal-moda, żgur li tagħmel differenza. Għalhekk isiru r-riklami. Għalhekk jintefqu elfu ta’ ewro f’marketing, jiġifieri strateġiji jew pjani ta’ kif wieħed jista’ jbigħ. Fil-marketing jitwassal l-aspetti kollha pożittivi tal-persuna jew tal-oġġett, u kemm wieħed jaqbillu li jixtri jew jilqa’ dik il-persuna. Dan għaliex kif jgħid il-Malti wkoll, ‘l-għajta hija nofs il-bejgħ’. Aktar ma tgħajjat u tidher, aktar se tbigħ u tasal biex tikkonvinċi lin-nies jixtru dak il-prodott partikolari.

Dan kollu jgħodd għall-ħidma fil-politika.

Enfasi żejda fuq id-dehra u mhux fuq is-sustanza

Fil-politika hemm dan l-aspett ukoll ta’ bejgħ. Fil-politika hemm l-importanza ta’ dehra u tal-impressjoni. Fil-fatt, ilkoll nafu li l-marketing tal-partit u l-messaġġi li jrid iwassal huwa importanti. Jintefqu eluf ta’ ewro fi propoganda. Dan ma jiġrix biss barra minn Malta, fejn per eżempju l-partit politiċi Amerikani jonfqu miljuni sħaħ f’riklami. Dan jiġri wkoll f’Malta.

Għal min għandu ċerta età, jiftakar li qabel il-propoganda li kienet issir mill-kandidati u mill-partit kienu jkunu biex iwaħħlu posters bil-kolla ma’ kull ħajt vojt li jsibu! Xi drabi anke jiktbu slogans biż-żebgħa! Illum dan ma baqax għaliex il-media, jiġifieri l-leaflets, it-TV, Facebook, Instagram, TikTok u diversi media soċjali oħra ħadu posthom.

Dan kollu tajjeb u bżonjuż li jsir IMMA xi drabi huma diversi li jispiċċaw li jibbażaw il-fehma politika tagħhom biss fuq kif wieħed jidher jew kemm il-partit jimpressjona bi slogans, b’Facebook posts jew kemm wieħed ġab likes. Hemm ir-riskju allura li nagħmlu politika biss fuq kif wieħed jidher, jiġifieri fuq l-apparenza aktar milli fuq is-sustanza, fuq il-valuri jew il-proposti li l-partit jew il-kandidat ikun qiegħed jagħmel!

B’hekk nispiċċaw nagħmlu politika mibnija biss fuq id-dehra u l-faċċata! Dan diġa’ narawh li sar u jsir mill-Partit Laburista. Matul il-kampanja elettorali u matul dawn l-10 snin, il-Partit Laburista nefaq miljuni ta’ ewro f’propoganda, fl-leaflets mibgħuta fid-djar, media soċjali u fuq it-TV, anke dak tal-PBS!

Imma jista’ jiġri (u nemmen li hekk qiegħed jiġri) li bħal meta wieħed jixtri xi oġġett jew inkella xi ħwejjeġ ta’ ditta, jgħaddi ftit taż-żmien u dak li deher tajjeb u sabiħ ma jkunx fir-realtà! Dan iwassal mhux biss għal diżappunt imma wkoll rabja u żgur li ma terġax tixtri dak l-oġġett jew minn dik id-ditta! Dan għaliex tħossok li daħku bik!

Inħoss li dan li qiegħed jiġri wkoll fil-politika. Għaliex forsi qiegħed ikun hemm enfasi żejda fuq id-dehra u mhux fuq is-sustanza, diversi ċittadini jinsabu mhux biss diżappuntati bil-politiċi taż-żewġ partiti prinċipali imma jinsabu rrabjati. U qegħdin juru din ir-rabja billi ma jivvutawx jew ma jridux jisimgħu aktar dwar il-politika! Fil-fatt, fl-aħħar elezzjoni ġenerali madwar 80 elf għażlu li ma jivvutawx. Kollox jindika li fl-elezzjonijiet li ġejjin għal Kunsilli Lokali u għal MEP, dan l-ammont ser ikompli jikber!

Inkunu politiċi b’fehmiet u valuri ta’ sustanza

Dan huwa periklu kbir għad-demokrazija ta’ pajjiżna. Għaldaqstant ilkoll kemm aħna għandha r-responsabbiltà li nifhmu li filwaqt li d-dehra u l-marketing u selfies huma tajbin, imma s-sustanza, il-proposti u l-valuri huma ferm aktar importanti. Filwaqt li tajjeb li wieħed jieħu selfies quddiem xi statwa, quddiem xi murtal jew man-nies fil-marċ ta’ filgħodu, IMMA huwa ferm u ferm aktar importanti li nkunu kapaċi li nkunu politiċi li jkollna fehmiet u valuri ta’ sustanza! Nippreferi li jkolli kandidat/a jew partit politiku li ma jidhirx/jidhrux daqshekk tajjeb fid-dehra jew inkella li għandu/hom ċerta eta’ IMMA mbagħad kapaċi jieħdu stand u kapaċi joħorġu għonqhom għal verità u s-sewwa!

X’jiswa li wieħed jew partit jidher sabiħ biex wara dik is-sbuħija ma hemm xejn ħlief qoxra? X’jiswa li wieħed jkun fil-politika u kontinwament jieħu selfies ma’ dak u ma’ l-oħra IMMA mbagħad qatt ma jitkellem fuq numru ta’ issues li għandu l-pajjiż jew ma jgħid xejn biex jintgħoġob ma’ kulħadd. L-esperjenza tal-ħajja turina li meta wieħed jipprova jintgħoġob ma’ kulħadd jispiċċa ma jintgħoġob ma’ ħadd!

Nemmen fil-politka mhux biss tad-dehra imma anke tas-sustanza.

Nemmen f’politika li ma tibżax titkellem fejn hemm bżonn mingħajr biża’ jew kompromessi. Nemmen f’politika li twassal proposti konkreti ta’ kif nistgħu ngħixu aħjar milli politika ta’ tgħajjir u l-insulti. Nemmen f’politika li toħroġ għonqa għaċ-ċittadini. Nemmen f’politika li tħares u tippromovi l-ġid komuni.

Ma nemminx f’politika tas-selfies!

(Dan l-artiklu ġie ippublikat fuq il-gazzetta Il-Mument – 3 ta' Settembru, 2023)