Serħan il-moħħ

Mhux ġust li filwaqt li l-Gvern Laburista jiftaħar li l-ekonomija sejra tajjeb u jsib eluf ta' ewro għall-ħbieb tiegħu, l-ekonomija tal-anzjani sejra ħażin.

Kienu madwar tliet snin ilu meta Simon Busuttil talabna nerġgħu nemmnu fina nfusna. Simon Busuttil ħeġġiġna biex nerġgħu niskopru l-għeruq tagħna. Stedinna biex nerġgħu nsiru partit tan-nies.

Ilkoll nafu li waħda mir-raġunijiet għat-telfa li kellna kienet li filwaqt li bħala Partit konna naħdmu għall-ġid ta’ Malta, fil-ħeġġa tagħna, insejna nkunu viċin il-Maltin! Fil-qosor, Simon Busuttil talabna biex il-Partit ikun partit tan-nies.

Xi jfisser li partit politiku ikun partit tan-nies?

Ifisser li l-PN għandu bżonn jerġa’ jiskopri l-valur li jħoss il-polz taċ-ċittadini, li jkun b’saqajh mal-art u jaf minn xiex għaddejjin iċ-ċittadini tal-pajjiż. Partit tan-nies ifisser li jkun spalla ma’ spalla ma’ dawk kollha li għaddejjin minn mumenti diffiċli. Ifisser li l-partit ikun vuċi u tarka għal dawk li huma dgħajfa fis-soċjetà. Ifisser ukoll li wieħed għandu japprezza u jinkoraġġixxi l-aspirazzjonijiet kollha taċ-ċittadini. Fil-qosor, partit tan-nies ifisser li l-PN għandu jkollu qalbu

tħabbat għan-nies u man-nies.

B’din il-viżjoni u b’determinazzjoni sħiħa, tul dawn it-tliet snin, il-PN reġa’ qam fuq saqajh. Il-PN reġa’ resaq lejn iċ-ċittadini kollha. Matul dawn it-tliet snin ta’ skandli mill-Gvern, il-PN esprima s-sentimenti tal-maġġoranza taċ-ċittadini li jinsabu urtati bl-iskandli. Għal darba oħra, il-PN reġa’ beda jemmen fin-nies. Għalhekk li n-nies ġejjin lura lejn il-Partit!

Il-PN, bis-saħħa tal-ħidma siewja ta’ Simon Busuttil u t-tim kollu tiegħu, qiegħed iwassal diversi miżuri li qegħdin iħossu diversi ċittadini tagħna. Fosthom hemm miżuri għall-anzjani.

Dawn huma:

• Gvern ġdid Nazzjonalista jgħolli l-pensjoni biex l-anzjani ma jibqgħux f’sitwazzjoni li ma jlaħħqux sal-aħħar tax-xahar.

• Gvern ġdid Nazzjonalista jneħħi t-taxxa tad-dħul minn fuq il-pensjoni.

• Gvern ġdid Nazzjonalista jirrevedi t-taxxa li jħallsu l-anzjani fuq dividends li jirċievu mill-investimenti li jkunu għamlu f’shares.

• Gvern ġdid Nazzjonalista jagħti l-mediċini kollha lill-anzjani b’xejn.

• Gvern ġdid Nazzjonalista jreġġa’ lura t-taxxa fuq il-faqar u jbaxxi għal li kienet il-kera li żied Muscat għal dawk li jgħixu fl-akkomodazzjoni soċjali.

• Gvern ġdid Nazzjonalista jżid is-sussidju lil dawk il-familji li jikru mill-privat.

L-għan aħħari wara dawn il-miżuri kollha mhuwiex il-fatt li diversi anzjani tagħna mhumiex qegħdin iwasslu sal-aħħar tax-xahar. Mhuwiex lanqas għaliex ’il fuq minn 5,500 anzjan/a jinsabu fir-riskju tal-faqar, kif tħabbar mill-NSO. Tajjeb li nsemmu r-rapport tal-Caritas li jgħid li matul dawn it-tliet snin l-ispiża tal-ikel biss żdiedet bi 18%. Dawn il-miżuri kollha għandhom l-għan li jagħtu lill-anzjani serħan il-moħħ u joffru apprezzament, rispett u dinjità lilhom f’din il-fażi tal-ħajja tagħhom.

Mhux ġust li filwaqt li l-Gvern Laburista jiftaħar li l-ekonomija sejra tajjeb u jsib eluf ta’ ewro għall-ħbieb tiegħu, l-ekonomija tal-anzjani sejra ħażin. Issa li dalwaqt jasal il- Baġit, il-Gvern Laburista żgur li se jitfa’ l-bżar fl-għajnejn biex forsi ‘jagħmi’ lill-anzjani. Imma l-anzjani tagħna jafu min qiegħed igawdi l-eluf ta’ ewro f’pagi u benefiċċji waqt li huma qegħdin jieħdu l-loqom.

Il-PN dejjem ħadem biex l-anzjani jgħixu b’dinjità sħiħa. Tul id-diversi snin fit-tmexxija, il-PN daħħal diversi għajnuniet fil-komunità, bħal Home Help u Meals On Wheals biex jgħin lill-anzjani jibqgħu fil-komunità. Il-gvernijiet Nazzjonalisti daħħlu wkoll skemi finanzjarji, biżżejjed insemmu li wieħed seta’ jkompli jaħdem u jibqa’ jirċievi lpensjoni, inkella l-għotja ta’ flus f’ċerti etajiet. Il-gvernijiet Nazzjonalisti bnew ukoll diversi djar u night shelters għal dawk l-anzjani li għandhom bżonn aktar attenzjoni.

Dawn il-miżuri kollha mħabbra jikxfu li l-PN jemmen f’politika mhux tal-ftit għall-ftit, imma politika għall-ħafna. Il-PN irid ikompli miexi f’din it-triq fejn huwa jwassal proposti ispirati mill-bżonnijiet taċ-ċittadini. Għalkemm id-distakk bejn iż-żewġ partiti naqas drastikament, xorta jibqa’ lfatt li hemm bżonn inkomplu naħdmu flimkien biex naraw li l-poplu jerġa’ jkollu fiduċja fil-PN.

Il-PN ma għandu l-ebda dritt ‘divin’ biex imexxi lill-pajjiż. Dan id-dritt irid jakkwistah. Wieħed mill-modi kif din il-fiduċja tista’ tinkiseb mill-ġdid huwa li mhux biss inkomplu nixkfu l-maskri tal-Gvern Laburista, imma nkomplu nagħmlu politika li tagħti serħan il-moħħ liċ-ċittadini kollha tagħna.

(Dan l-artiklu ġie ippublikat fuq il-gazzetta Il-Mument – 9 ta' Ottubru, 2016)