Skont Roderick

Għalkemm il-Partit Laburista jipprova jagħti l-impressjoni li x-xemx fil-housing telgħet wara l-2013 jew inkella meta l-Ministru Galdes laħaq Ministru, sejjer żballjat bil-kbir.

Credit: Shutterstock

Skont Roderick Galdes, il-Ministru għal Akkomodazzjoni Soċjali, il-Partit Nazzjonalista m’għamel xejn dwar il-housing matul is-snin li kien fit-tmexxija tal-pajjiż.

Qabel ma nikteb li dan mhuwiex minnu, tajjeb li nifhmu li meta wieħed jitkellem fuq il-housing, wieħed irid jifhem li dan huwa settur li jiżviluppa maż-żmien u ma’ l-esiġenzi/sfidi taż-żminijiet. Ir-realtà tal-housing tas-snin 70/80 mhiex l-istess bħal m’hija dik ta’ llum.

Imma għalkemm hemm id-differenzi, wieħed japprezza li l-ħidma ta’ llum hija grazzi għal ħidmiet li kienu seħħew qabel.

Dan qed ngħidu għaliex xi drabi l-Ministru jagħti l-impressjoni li x-xemx fil-housing telgħet fl-2013! Anzi, xi drabi jagħti wkoll l-impressjoni li x-xemx telgħet meta sar Ministru hu u l-Ministri Laburisti ta’ qablu m’għamlu xejn!

Din mhiex narrattiva ġusta u lanqas korretta, u ngħid għaliex.

Barra li matul it-tmexxija Nazzjonalisti kien hemm lista sħiħa ta’ skemi ta’ għajnuna, għotjiet ta’ art b’rata baxxa, xiri ta’ appartamenti, skemi ta’ tranġar u sussidji fuq il-kera, il-Ministru jħobb jakkuża lilna li ħallejna fl-2013 lista twila ta’ applikazzjonijiet. Hu jgħid ’l fuq minn 3,500 - 4,000 applikazzjoni. Dan mhu veru xejn! Dan huwa biss spin. Biex nuri dan il-qerq nagħmel referenza għal diversi rapporti annwali li wieħed ma jistax imerri, għaliex huma iswed fuq l-abjad!

Skont ir-rapport annwali tal-Awtorità maħruġ fl-2020, f’paġna 14: hemm li, fl-2012 kien hemm 2,439, filwaqt li fl-2013 kien hemm 2,910. Issa tajjeb li ngħid li f’din iċ-ċifra hemm inkluż l-exchanges (tpartit). Dan wieħed jista’ jarah fir-rapport annwali tal-Awtorità tal-2013 (jien kont CEO sa Ġunju biss ta’ dik is-sena) fejn dawn kienu inklużi fil-lista ta’ stennija.

Imma tajjeb li ngħid li mill-2013 mhux biss il-lista ta’ stennija baqgħet fl-istess livell imma saħansitra anke żdiedet. Ara t-tabella.

Għalkemm fl-2018 il-lista ta’ stennija kienet tlaħħaq 3,172, imma mbagħad jidher li mill-2018 ’l quddiem, sar b’bħal donnu miraklu għax din il-lista bdiet niżla! Skont ir-rapport annwali tal-Awtorità ta’ din is-sena, il-lista issa hija ta’ 1,576!

Mistoqsija: X’ġara? Nagħti xi ftit raġunijiet għal dan it-tnaqqis:

1. Tneħħew dawk li kienu fuq il-lista tal-exchanges/tpartit. Skont l-PQ 16083 dawn kien 759. Issa l-Ministru jgħid li konna diġa neħħejnihom aħna. Skont ir-rapport annwali tal-2013, f’pġ.12, dawn kienu parti miċ-ċifra totali.
   

2. Skema Kiri (nikru mill-privat u mbagħad nagħmlu sub-letting b’sussidju), li tant kienu kontra biex issa jfaħħruha, u issa semmewha Nikru Biex Nassistu. Skont PQ 11310 kien hemm 225, filwaqt li fir-rapport annwali ta’ din is-sena hemm 100 oħra. Dan ifisser li Skema Kiri/Nikru Biex Nassistu kien hemm 325 appartmenti.

Ejjew mela nagħmlu ftit matematika…

Jekk bħalissa il-waiting list hija ta’ 1,576 u wieħed iżid 759 tal-exchanges, u jżid ukoll 325 mill-iskema kiri, in-numru totali jkun 2,660. Dan ifisser li wara 11 ’l sena u wara tant pompa, għandna fl-istess baħar!

Il-Ministru jħobb ukoll jgħid li matul l-amministrazzjonijiet Nazzjonalisti ma kienx hemm bini ta’ housing estates. Din hija ħrafa u spin oħra. Għalkemm id-direzzjoni dak iż-żmien kienet li jkun hemm lis-skema kiri minħabba numru sew ta’ proprjetajiet privati vojta fis-suq, l-Awtorità kellha programm sħiħ ta’ bini. Dan joħroġ mir-rapport annwali tal-Awtorità tal-2010, f’paġna 23.

L-istess irrid ngħid fuq maintenance tal-housing estates, l-faċċati u l-lifts. Skontu, il-Partit Nazzjonalista m’għamel xejn. Nistiednu jara’ r-rapport annwali tal-2010, paġna 20.

Għalkemm il-Partit Laburista jipprova jagħti l-impressjoni li x-xemx fil-housing telgħet wara l-2013 jew inkella meta l-Ministru Galdes laħaq Ministru, sejjer żballjat bil-kbir.

Fl-aħħarnett ma nistax ma nsemmix is-sentenza tal-Qorti maħruġa fuq il-kwistjoni tal-housing estate ġewwa s-Siġġiewi. Każ ta’ frodi oħra f’sensiela sħiħa ta’ frodi. Il-qorti kienet ċara u talbet lil pulizija tinvestiga dan il-frodi.

(Dan l-artiklu ġie ippublikat fuq il-gazzetta in-Nazzjon – 5 ta' Ġunju, 2024)