Taboo

Ġrajjiet li seħħew dan l-aħħar tefgħu lura l-arloġġ tal-ħidma siewja kollha li saret matul iż-żmien.

Taboo huwa l-isem tal-kanzunetta rebbieħa għall-Eurovision ta’ din is-sena. Din ġiet kantata mill-brava Christabelle Borg. Din id-diska, lil hinn min-noti mużikali, kellha messaġġ profond u qawwi.

Taboo titkellem fuq is-saħħa mentali u l-bżonn li wieħed ma jibżax jitkellem fuq dan is-suġġett. Għalkemm is-saħħa mentali hija suġġett delikat ħafna u warajh hemm tbatija kbira, il-messaġġ ta’ din id-diska kien li ma għandniex nibżgħu nitkellmu dwar dan is-suġġett.

Għal diversi snin, persuni jew familjari li għandhom jew kellhom xi membru tal-familja li jbati jew bata minn nuqqas ta’ saħħa mentali kellhom stigma, timbru għal ħajjithom kollha. Persuna b’nuqqas ta’ saħħa mentali kienet meqjusa li hija miġnuna. Il-kelma ‘miġnun’ kienet u għadha tkexkex lil diversi għaliex meta wieħed ikollu dan it-timbru/stigma, ħafna drabi jispiċċa mwarrab u mneżża’ mid-dinjità umana.

Sfortunatament, fl-imgħoddi diversi għamlu esperjenza ta’ tbatija kbira waqt li oħrajn biex jevitaw il-kundanna soċjali spiċċaw magħluqa ġo darhom! Il-ħajja għal dawn il-persuni ma kienet faċli xejn.

Progress soċjali li ma sarx f’ħakka t’għajn

Imma matul dawn l-aħħar 30 sena saru passi żgħar u kbar biex dawn il-persuni jingħataw id-dinjità umana li jistħoqqilhom. Matul dan iż-żmien, il-mentalit. tal-poplu mhux biss tjiebet, imma nbidlet b’tali mod li minflok inwarrbuhom jew naqfluhom, issa ngħinuhom u nippruvaw nintegrawhom fis-soċjetà. Is-soċjetà donnha fetħitilna għajnejna għal din irrealtà. Is-soċjetà donnha rnexxielha tara li wara l-kundizzjoni ta’ nuqqas ta’ saħħa hemm persuna/persuni bħalna. U għaliex huma bħalna, bħalna għandhom bżonn min iħobbhom u min jirrispettahom. U għaliex huma bħalna, bħalna għandhom is-sabiħ u t-tajjeb f’ħajjithom.

Dan il-progress soċjali ma sarx f’ħakka t’għajn imma wara sensiela ta’ ġrajjiet, fosthom minħabba żewġ fatturi prinċipali. L-ewwel fattur huwa li x-xjenza medika għamlet passi kbar u wrietna li dan il-fattur jista’ jolqot lil persentaġġ qawwi tas-soċjetà.

Il-progress mediku tefa’ wkoll dawl ġdid fuq id-depressjoni, l-istress tal-ħajja u diversi kundizzjonijiet mentali oħrajn. Min-naħa l-oħra, ix-xjenza tatna tagħrif aħjar ta’ kif wieħed jista’ jgawdi u jibża’ għas-saħħa mentali.

It-tieni fattur li għen biex ikun hemm dan it-tibdil kien proprju politika soċjali li għarfet li toħloq inizjattivi biex tintroduċi servizzi u inizjattivi li jgħollu l-livell ta’ għajxien ta’ dawn il-persuni. Politika soċjali li verament poġġiet fiċ-ċentru tal-politika lill-persuna umana, hija min hija. Dan juri li meta l-politika titħaddem sew u b’għan nobbli, din tagħmel differenza.

Is-saħħa mentali ma għandha qatt tkun ballun politiku partiġjan

Għalkemm is-saħħa mentali ma għandha qatt tkun ballun politiku partiġjan, nistqarr mingħajr tlaqliq li hawnhekk il-Partit Nazzjonalista jista’ jħares b’wiċċu minn quddiem għaliex kien partit li daħħal diversi servizzi u għajnuniet f’dan il-qasam, kemm fuq livell nazzjonali u kemm fil-komunità.

Fi żmien li donnu qegħdin niftakru aktar fl-iżbalji li forsi stajna wettaqna matul iż-żminijiet, tajjeb li napprezzaw dak it-tajjeb kollu li ħdimna għalih! Nifhmu li f’dan il-qasam, bħal f’oqsma oħra, għalkemm kien hemm dejjem x’wieħed jista’ jagħmel aħjar, il-Partit Nazzjonalista kien forza qawwija ta’ politika soċjali sana u tajba.

Għaldaqstant, f’dan il-kuntest kollu ta’ passi ’l quddiem fil-mentalità soċjali u fil-politika soċjali, nistqarr li żewġ ġrajjiet li seħħew dan l-aħħar proprju donnhom tefgħu lura l-arloġġ tal-ħidma siewja kollha li saret matul iż-żmien!

Kien xokk għalija u għal ħafna li jaħdmu fil-qasam soċjali meta wieħed jara persuni li jemmnu li jistgħu jgħaddu kumment ta’ żuffjett. Sfortunatament, dan ġara fiċ-ċelebrazzjoni tal-Karnival. Jidher li xi żgħażagħ ħassew il-bżonn li biex jifirħu kellhom bżonn idaħħqu b’min proprju għandu nuqqas ta’ saħħa mentali! Wara snin ta’ edukazzjoni u tagħrif, xorta baqa’ persuni (u dawn huma żgħażagħ li suppost huma aktar b’moħħ miftuħ u tolleranti) li jemmnu li hemm gost li twaqqa’ għaż-żuffjett lil dawn il-persuni! Żgur li dan il-ġest ġab weġgħat lil diversi, fosthom ġenituri u qraba. U kien għajb akbar li politiku żagħżugħ ipprova jiġġustifika dak li sar minflok ċanfarhom, kif fil-fatt għamlet mhux biss kollega politika tiegħu, imma saħansitra l-istess President tal-pajjiż.

It-tieni ġrajja li ġabet preokkupazzjoni kienet proprju meta persuna ħarbet mill-Isptar Mount Carmel u spiċċat mejta.

Il-politika soċjali tal-Partit Laburista falliet bil-kbir

Din hija storja ta’ nieket u swied il-qalb imma din il-ġrajja ħarġet fid-deher li sfortunatament il-politika soċjali tal-Partit Laburista f’dan il-qasam falliet bil-kbir. Wara li issa l-Partit Laburista ilu għal kważi ħames snin fit-tmexxija, kontra kull wegħda li għamel matul iż-żmien li kien fl-Oppożizzjoni, ma wettaq xejn ta’ sustanza f’dan ir-rigward. L-unika ħaġa li wettaq kienet li neħħa nies li kienu kompetenti fit-tmexxija ta’ dan il-post biex poġġa persuni li ma għandhom l-ebda kwalifika jew esperjenza!

Mhux hekk biss, lil dawk in-nurses li kienu viċin tal- Partit wegħidhom li meta jitla’ fit-tmexxija jagħtihom

transfer biex ma jibqgħux jaħdmu f’dak l-ambjent! B’hekk, dan il-post spiċċa b’nuqqas kbir ta’ nurses ! Issa, dawk in-nurses li baqa’ huma aktar f’riskju li jesperjenzaw burn out . Dan biex wieħed ma jsemmix li

ma sar l-ebda investiment ta’ sugu fil-manutenzjoni ta’ dan il-post. Dan huwa ta’ għajb għal partit li jiftaħar li huwa viċin tal-batut.

Forsi dan għaliex dawn il-persuni ma għandhomx id-dritt tal-vot? Jidher ċar li l-Partit Laburista sar aktar viċin ta’ ċerti sinjuri milli ta’ dawk li huma vulnerabbli!

Il-Partit Nazzjonalista qiegħed jagħmilha ċara li dan is-settur jagħtih id-dinjità li donnu qiegħed jitlef!

Filwaqt li nawgura lil Christabelle bil-kanzunetta Taboo , jalla din id-diska tagħtina l-ħeġġa biex ma nibżgħux nitkellmu fuq dan is-suġġett u naħdmu favur dawn il-persuni ħutna.

(Dan l-artiklu ġie ippublikat fuq il-gazzetta Il-Mument – 25 ta' Frar, 2018)