Tagħlima mis-Slovakkja

Pajjiżna sejjer lura minflok miexi passi 'l qudiem fid-demokrazija u jagħti eżempji lil pajjiżi oħra.

Is-Slovakkja hija membru tal-Komunità Ewropea. Is-Slovakkja daħlet tagħmel parti minn din il-Komunità fl-istess data meta Malta għażlet li tkun parti mill-Komunità. Fl-1 ta’ Mejju, iż-żewġ pajjiżi se jiċċelebraw il-15-il sena minn dan id-dħul. Il-mixja demokratika ta’ dan il-pajjiż xejn ma kienet faċli. Għalkemm il-pajjiż tagħna kellu wkoll id-diffikultajiet demokratiċi tiegħu, żgur li ma kellniex l-istess problemi. Is-Slovakkja, mhux biss għal diversi snin kienet tagħmel parti minn pajjiż ieħor, iċ-Ċekoslovakkja, imma dawn iż-żewġ pajjiżi kienu għal diversi snin taħt il-madmad tal-Komuniżmu.

Huma pajjiżi fejn id-demokrazija ma kinitx teżisti. Pajjiżi fejn il-libertà tal-espressjoni mhux biss kienet limitata, imma ma kienet tollerata bl-ebda mod. Kienu diversi dawk li spiċċaw maqtula jew spiċċaw f’qiegħ ta’ ħabs. Min jaf ftit storja, jaf sew kemm dan il-poplu bata. Tassew il-mixja demokratika kienet waħda, mhux biss tqila, imma wkoll imdemmija.

Eżempju ta’ kif titħaddem id-demokrazija

Forsi xi wħud jistaqsu għaliex qiegħed nitkeb fuq dan il-pajjiż.

Qiegħed nikteb fuq dan il-pajjiż għax dan l-aħħar dan il-pajjiż mhux biss għadda minn esperjenza orribbli simili bħalma għaddejna minnha aħna, imma wkoll għax mingħajr ma wieħed jaf, dan il-pajjiż tana eżempju qawwi ta’ kif titħaddem id-demokrazija!

Minn pajjiż eks-Komunista li għadu proprju fl-ewwel snin tal-mixja demokratika tiegħu, is-Slovakkja offriet eżempju lilna l-Maltin li ngħixu f’pajjiż fejn id-demokrazija ilha fostna għal diversi snin.

Kif forsi wieħed seta’ jsegwi, ġurnalist żagħżugħ ta’ 27, flimkien mal-partner tiegħu, ġew maqtula kiesaħ u biered. Kien ġurnalist investigattiv. Kien ġurnalist xewka f’dahar diversi politiċi. Kien ġurnalist li kixef

diversi skandli politiċi u stejjer ta’ korruzzjoni. Kien ġurnalist fl-istess keffa ta’ Daphne Caruana Galizia. U

bħal Daphne nqatel. Bħal Daphne ġie msikket.

M’iniex se nikteb fuq Daphne għax mhux il-punt ta’ dan l-artiklu. Il-punt tiegħi huwa li meta dan iż-żagħżugħ inqatel, il-Ministru tal-Kultura, ċertu Marek Madaric, li l-ġurnalist kixef li kellu rabtiet mal-Majfa Taljana, irriżenja! Mhux hekk biss. Żewġ uffiċjali li kienu mikxufa wkoll minn dan iż-żagħżugħ spiċċaw irriżenjaw ukoll! L-istorja ma tiqafx hawn! Il-President ta’ dan il-pajjiż, Andrej Kiska, sejjaħ biex ikun hemm mhux biss bidla fil-kabinett tal-Gvern, imma saħansitra jkun hemm elezzjoni ġenerali! U l-istorja tkompli meta l-Prosekutur Ġenerali tas- Slovakkja ddikjara li pajjiżu ‘mhux Malta jew ir-Russja fejn wieħed joqtol ġurnalist u ma jiġri xejn’!

Din hija tagħlima u ċanfira demokratika lilna. U f’Malta? F’Malta jibqa’ kollox kif inhu. Qisu ma ġara xejn! Iż-żewġ uffiċjali li nkixfu fuq diversi stejjer ta’ korruzzjoni, fosthom li kellhom kontijiet il-Panama, jibqgħu mwaħħla mas-siġġu tal-poter.

Il-Prim Ministru jibqa’ jitbissem quddiem il-kamera u jgħid li f’Malta hawn is-saltna tal-liġi u jiġi jaqa’ u

jqum mill-kritika li saret fil-Parlament Ewropew. Il-Prosekutur Ġenerali u l-Kummissarju tal-Pulizija

jibqgħu friski daqs ħassa u ma jieħdu l-ebda pass. Il-President ta’ Malta tibqa’ siekta. Mhux hekk biss.

Għaliex il-poplu semma’ leħnu u waqqaf mafkar spontanju, xi wħud qegħdin jaraw kif ineħħuh. U

għalkemm tressqu xi persuni l-Qorti akkużati li allegatament qatlu lil Daphne, il-poplu qiegħed

jistenna li jkun jaf min huwa wara dan il-qtil. U għaliex il-poplu jrid ikun jaf, il-loudspeakers Laburisti

qegħdin jippruvaw isikktu u jmewtu dawn l-ilħna u jagħtu l-impressjoni li kollox ward u żahar.

Dan mhuwiex minnu!

Nistgħu ngħidu li pajjiżna minflok miexi passi ’l quddiem fid-demokrazija u jagħti eżempji lil pajjiżi

oħra, sejjer lura. Hija t-tama li ma mmorrux u ma nispiċċawx f’pajjiż maħkum kif is-Slovakkja kienet

maħkuma.

U hu proprju f’dan il-mument perikoluż li jidħol irrwol tal-Partit Nazzjonalista. Il-Partit Nazzjonalista

għandu diġà esperjenza li ‘jillibera’ lil pajjiżna mill-ħakma Soċjalista. Il-Partit Nazzjonalista għandu l-esperjenza li jiddefendi l-interessi tal-poplu. Il-Partit Nazzjonalista għandu l-esperjenza li kien verament tarka u bastun tad-demokrazija. Jidher li din lesperjenza jrid jerġa’ jużaha! Qed iberraq!

Il-PN jista’ jkun tarka ta’ pajjiżna

Imma biex verament il-Partit Nazzjonalista jista’ jkun tarka ta’ pajjiżna, l-ewwel għandu bżonn li

jissaħħaħ. Kulħadd jaf li l-Partit għadda u forsi għadu għaddej minn żminijiet diffiċli fuq diversi livelli.

Huwa proprju f’dan il-mument ta’ prova li hemm bżonn li ninsew id-differenzi li jista’ jkollna u niftakru

li l-Partit Nazzjonalista, bid-difetti kollha tiegħu, huwa biss jista’ jkun il-vuċi tar-raġuni. Għalkemm il-partiti

iżgħar minna għandhom rwol importanti wkoll, jibqa’ l-fatt li l-Partit Nazzjonalista huwa l-akbar forza

politika li tista’ tieqaf lill-Partit Laburista.

Adrian Delia u diversi oħra qegħdin jagħmlu ħilithom biex dan iseħħ. Imiss lilna biex nagħtu sehemna.

Għalkemm wieħed jista’ jkollu fehma differenti, dawn id-differenzi ta’ ħsieb ma għandhomx ikunu punt

li jifridna, imma għandhom jgħinuna nifhmu li dawnid-differenzi jistgħu jagħtuna stampa akbar u wiesgħa ta’ dak li nemmnu fih. Filwaqt li ma għandniex nibżgħu mill-kritika sinċiera, u filwaqt li mhux kull min jikkritika huwa traditur imma huwa persuna li trid il-ġid lill-istess partit, hemm bżonn li ningħaqdu aktar bejnietna. Fl-għaqda hemm is-saħħa.

U hija din is-saħħa li għandna bżonn biex niddefendu lil pajjiżna. Pajjiżna għandu bżonn Oppożizzjoni serja u b’saħħitha. Jekk nixtiequ nibqgħu ngħixu f’soċjetà libera u demokratika mhux biżżejjed li jkollna l-progress u l-flus fil-but. Mingħajr il-libertà u d-demokrazija, ma aħna xejn.

Staqsu lill-poplu Slovakk li minnu qegħdin nieħdu tagħlima kbira!

(Dan l-artiklu ġie ippublikat fuq il-gazzetta Il-Mument – 11 ta' Marzu, 2018)