'Victory Sign'

Jekk illum forsi tinsab 'imkisser' u 'għajjien mill-ħajja' ftakar li għada jista' jkun l-Għid tiegħek.

Is-sinjal ta’ dawk li jistqarru li jsegwu t-tagħlim u l-ħajja ta’ Ġesù Kristu, u allura jissejħu Kristjani, huwa s-sinjal tas-salib. Is-simbolu tas-salib huwa simbolu qawwi mhux biss għaliex marbut mal-ġrajjiet storiċi ta’ Ġesù fl-aħħar sigħat tiegħu fostna imma wkoll għaliex huwa simbolu li matul is-sekli kien ta’ ispirazzjoni u kuraġġ għal ħafna.

Għal ħafna, is-sinjal tas-salib kien u għadu ispirazzjoni profonda fil-mumenti kollha tal-ħajja tagħhom, b’mod partikolari flmumenti iebsa li l-ħajja toffri minn żmien għal ieħor. Għal diversi oħrajn, is-simbolu tas-salib offra jew joffri identità u stil ta’ ħajja.

Għal xi whud, is-simbolu tas-salib kien ispirazzjoni fl-arti u fil-kitba tagħhom. Għal oħrajn, sfortunatament, is-simbolu tas-salib kien ifisser oppressjoni u ġlied għaliex ġie użat għal għanijiet ta’ kilba għal ħakma. Għalina, li għandha l-valur talfidi u ma għandha l-ebda kilba għall-ħakma, is-simbolu tas-salib huwa sinjal ta’ grazzja, tama u mħabba.

Imma kieku kelli nagħżel simbolu ieħor li jiddiskrivi ssinifikat profond tas-salib, nagħżel is-simbolu tal-Victory Sign. Naħseb li kulħadd jaf kif inhu u kif isir. Huwa sinjal li kien jintuża ħafna mis-suldati Alleati matul l-aħħar Gwerra Dinjija bħala sinjal ta’ rebħa.

Il-Victory Sign huwa wkoll marbut mal-famuż Prim Ministru Ingliż Winston Churchill li f’diversi ritratti storiċi jidher proprju jagħmel dan il-ġest. Imbagħad matul is-snin 60, is-simbolu tal- Victory Sign beda jintuża bħala sinjal mhux biss ta’ rebħa imma wkoll mill-movimenti favur il-paċi.

Nistqarr li s-simbolu tas-salib proprju jiġbor fil-qosor dan – Ir-rebħa u l-Paċi. Kristu rebbieħ. Kristu li jġib il-paċi.

Għadna kemm iċċelebrajna tifkira solenni tal-Għid il-Kbir bħala l-akbar ġrajja fil-kalendarju Kristjan. L-Għid ifakkar ġrajja unika. Wieħed biex jifhimha għandu bżonn l-għajnuna tal-fidi. Din hija l-ġrajja meta l-unika persuna li qatt mietet, terġa’ tqum mill-mewt! Ġesù, wara tliet snin jipprietka l-aħbar ta’ paċi u għaqda, ifejjaq il-morda, jitma’ lil min kien bil-ġuħ, jispiċċa huwa nnifsu msawwat, umiljat, imbiċċer u msallab fuq għuda fil-forma ta’ salib.

Imma l-ġrajja ma waqfetx hemm. Tlett ijiem wara dan l-istess Ġesù jqum minn bejn l-imwiet biex iġib fix-xejn il-pjanijiet tal-qarrieqa mewt. Ir-rebħa ta’ Ġesù tiġi wara t-tbatija u sofferenza. Għal min għaddej minn mumenti diffiċli f’ħajtu dan huwa messaġġ ta’ tama u kuraġġ. Ir-rebħa ta’ Ġesù ġiet wara tliet sigħat fuq is-salib. Għalkemm is-salib tal-ħajja – li jista’ jieħu diversi forom u għamliet – jista’ jsallbek bit-tbatija u s-sofferenza mhux biss għal tliet sigħat imma għal diversi xhur u forsi anke snin, imma wara dan is-salib hemm il-fidwa. Hemm ir-rebħa.

Wara l-maltemp jiġi l-bnazzi. Wara x-xita terġa’ tfeġġ ix-xemx. Għaldaqstant, is-simbolu tas-salib huwa simbolu ta’ kuraġġ u tama. Għalkemm illum forsi ‘imkisser’ u ‘għajjien mill-ħajja’ imma għada jkun l-Għid tiegħek. Ġesù huwa u tiela’ t-telgħa tal-Golgota waqa’ tliet darbiet taħt il-piż tal-għuda tas-salib. Ħafna drabi aħna nieqfu naħsbu fuq il-waqgħa ta’ Ġesù imma ftit naħsbu li għalkemm Ġesù waqa’ tliet darbiet, għal tliet darbiet reġa’ wkoll qam biex ikompli l-mixja tiegħu. Waqa’, imma reġa’ qam. Reġa’ qam għal tliet darbiet sakemm wasal fejn kellu jasal.

Nistgħu lkoll nogħtru u naqgħu taħt is-salib tal-ħajja tagħna, imma jalla jkollna l-kuraġġ li nerġgħu nqumu fuq riġlejna biex inkomplu bil-mixja tagħna. Il-ħażin, il-vizzju u l-mard iwaqqgħuna imma jalla nsibu lkuraġġ biex nerġgħu nqumu u nkomplu bil-ħajja tagħna.

Għalkemm fil-ġrajja ta’ Ġesù nafu li f’dawn il-waqgħat kollha kien hemm ukoll l-għajnuna ta’ wieħed imsejjaħ Xmum minn Ċirene li kien ta’ għajnuna lil Ġesù, hekk ukoll aħna lkoll imsejħin biex inkunu ‘Ċirinew’ għal oħrajn. Ilkoll imsejħin biex noffru l-id ta’ għajnuna lil dawk ta’ madwarna li jinsabu mal-art.

Ilkoll irridu naħdmu biex lil dawn in-nies inqajmuhom fuq riġlejhom. Mhux hekk biss. Anki s-sistemi politiċi tagħna għandhom ikun ‘politika ta’ Ċirinew’ – jiġifieri politika li toffri sostenn biex wieħed iqum verament fuq riġlejh u ma jibqax mal-art. B’hekk biss jista’ jkollna ‘rebħa’ fuq il-faqar u t-tbatija.

Ġesù fuq is-salib ħass il-għafsa ta’ dik il-ħruxija u nfexx jgħid ‘Alla tiegħi, Alla tiegħi, għaliex tlaqtni?’ Hija l-istess karba tagħna li aħna forsi nħossuna li Alla telaqna u mar jistaħba xi mkien. Kull qalb muġugħa tgħid ajma. Anki Ġesù kellu l-karba tal-ajma tiegħu. Imma ma waqafx hemm. Huwa jkompli u jistqarr ‘f’idejk Missier nerħi ruħi’. Jalla li bħal Ġesù fil-mumenti ta’ disperazzjoni nintelqu f’idejn dak li qatt ma jinsiena jew iħallina weħedna.

Jalla jkollna aktar fiduċja li nintelqu fi ħdan il-Mulej. Li nafdaw ruħna f’idejn fil-Mulej twassalna biex ikollna l-vera paċi interna. Bil-paċi interna jkollna aktar serenità magħna nfusna biex inħarsu ’l quddiem b’fiducja li r-rebħa finalment tagħna se tkun. Anki jekk nimxu f’wied mudlam ma nibżgħux mill-ħsara għaliex Huwa magħna sakemm nistqarru ‘Kollox mitmum’ – dak li kont imsejjaħ biex ngħid u nagħmel, għidtu u għamiltu!

Verament is-simbolu tas-salib huwa simbolu ta’ rebħa u fidwa. Huwa l-‘victory sign’ tagħna!

Jalla ngħixu ta’ nies rebbieħa!

(Dan l-artiklu ġie ippublikat fuq il-gazzetta In-Nazzjon – 07 ta' April, 2015)