Wiegħed mod u għamel fattih!
- manuelschembri
- Nov 20, 2016
- 3 min read
Dak li jgħaqqad lil Farage, Trump u lil Joseph Muscat huwa li lkoll kemm huma wiegħdu mod, imbagħad għamlu fattihom. Tista' tidħak b'dak li jkun darba, imma ma tistax tidħak bih darbtejn!
Iż-żamma tal-kelma hija sinjal ta’ rġulija u konsistenza. Persuna li tgħid mod u tagħmel mod ieħor ftit tgawdi fiduċja ta’ dak li jkun. Dan jikxef ħafna fuq il-karattru tal-persuna. Meta jiġri hekk, wieħed ftit jibqa’ jemmen f’dak li jkun. Ftit tista’ tibqa’ tafdah. Jidħak bik darbau ma jerġax!
Sfortunatament, fil-politka mhux l-ewwel darba li jkun hemm politiċi li jwiegħdu mod, imbagħad wara jagħmlu mod ieħor. Ħa nagħti ftit eżempji biex ninftiehem aħjar.
L-ewwel eżempju: Matul ir-referedum tal-‘Brexit’, Nigel Farage għamel kampanja sħiħa li jekk il-poplu jagħżel li joħroġ mill-UE, il-flus mogħtija bħala sehem mill-Ingilterra lill-UE jispiċċaw imorru fil-fond tal-NHS. L-NHS huwa l-fond tas-servizz mediku soċjali fl-Ingilterra. Il-poplu għażel li joħroġ mill-UE. L-għada ta’ dan ir-riżultat, dan il-politiku kellu l-wiċċ jistqarr li dawn il-flus mhumiex se jmorru fil-fond tal-NHS!
It-tieni eżempju: Donald Trump fl-Istati Uniti tal-Amerika għamel kampanja sħiħa li jekk jintgħażel bħala President, ineħħi l-ObamaCare kompletament. L-ObamaCare tinvolvi sservizzi tas-saħħa pubblika liċ-ċittadini Amerikani. Kif nafu, il-poplu Amerikan għażel bil-qawwi lil Donald Trump u wara l-ewwel laqgħa li kellu ma’ Barack Obama, iddikjara li mhuwiex se jneħħi din il-liġi imma forsi jagħmel xi ftit emendi fiha! Wiegħed mod u se jispiċċa jimxi mod ieħor.
It-tielet eżempju: Tliet snin ilu Joseph Muscat kien elett Prim Ministru ta’Malta. Kienet rebħa kbira u storika. Matul il-kampanja elettorali, għal diversi drabi stqarr li:
Malta se tkun tagħna lkoll u kulħadd se jingħata spazju. “Tista’ ma taqbilx magħna imma xorta taħdem magħna,” kienet l-għajta tiegħu;
Malta ma tistax tibqa’ b’żewġ kuluri kontra xulxin;
Wieħed ma jistax jimxi ’l quddiem skont lil min jaf imma skont kemm taf. Dan se jwassal għal meritokrazija sħiħa fil-pajjiż;
L-ambjent se jingħata l-importanza u mhux se jsiru żbalji bħall-passat;
Il-Gvern Laburista se jkollu ‘tolleranza żero’ għall-korruzzjoni;
F’Malta se jispiċċa l-faqar darba għal dejjem;
Il-Gvern se jisma’ lil kulħadd u mhu se jkun hemm l-ebda klikka li tmexxi;
Taħt it-tmexxija tiegħu se jkun hawn verament l-akkontabbiltà u t-trasparenza pubblika;
Fi żmien sentejn se jkollna power station ġdida taħdem.
Inkompli bil-lista?
Kull min jaħseb b’moħħu u ma għandux għamad politiku jaf sew li mhumiex biss Farage u Trump li daħku biċ-ċittadini. Anke l-Partit Laburista daħak bin-nies.
Wara tliet snin fit-tmexxija, Joseph Muscat irnexxielu ma jżommx kelma waħda minn dawn il-wegħdi. Dan qiegħed iwassal biex dawk li jirraġunaw jintebħu li Joseph Muscat għandu problema serja ta’ kredibbiltà.
Filwaqt li dan qiegħed jagħmel il-ħsara politikament lilu stess, fir-realt. din il-ħsara mhix qiegħda ssir lilu personalment biss u lill-Partit Laburista, imma qiegħda ssir lill-klassi politika kollha.
Sfortunatament, huma diversi dawk iċ-ċittadini, b’mod partikulari l-ġenerazzjoni żagħżugħa, li minħabba dan in-nuqqas ta’ rġulija u inkonsistenza politika ma baqgħux jafdaw lil ebda politiku.
Imma nagħmlu tajjeb ilkoll jekk ma npoġġux lil kulħadd flistess keffa.
Il-PN immexxi minn Simon Busuttil qiegħed jaħdem qatigħ biex jerġa’ jakkwista l-fiduċja tal-poplu. L-isfida hija kbira. Imma Simon Busuttil u l-PN kollu determinati. Fid-determinazzjoni tagħna lkoll, il-PN qiegħed joħroġ b’diversi proposti konkreti kif jista’ jkun gvern alternattiv. Ilkoll nafu li qabel laħħar Baġit, il-PN ħareġ dokument ieħor bit-tema ‘Nirnexxu lkoll flimkien’. F’dan id-dokument hemm madwar 91 proposta li xi wħud saħansitra daħlu fil-Baġit tal-Gvern Laburista.
Imma rridu noqogħdu attenti li dak li nwiegħdu, nagħmluh verament. Għaliex nemmen fil-politika onesta, nemmen bissħiħ li rridu nkunu onesti magħna nfusna u mal-Partit u nwieġbu dawn il-mistoqsijiet.
Dak li jgħaqqad lil Farage, Trump u lil Joseph Muscat huwa li lkoll kemm huma wiegħdu mod, imbagħad għamlu fattihom. Tista’ tidħak b’dak li jkun darba, imma ma tistax tidħak bih darbtejn!
(Dan l-artiklu ġie ippublikat fuq il-gazzetta Il-Mument – 20 ta' Novembru, 2016)