X'jimpurtani!

Għandu raġun Simon Busuttil meta għal diversi drabi jiġbed l-attenzjoni li dak li qiegħed iseħħ huwa ta' ħsara kbira għall-klassi politika kollha.

Dan l-aħħar, waqt żjara lil familja, iltqajt ma’ Anthony, żagħżugħ ta’ 24 sena. Anthony għadu kemm iggradwa u qed jaħdem f’post b’salarju tajjeb. M’ilux daħħal karozza ġdida u jinsab f’relazzjoni ma’ tfalja. Huwa fil-ħsieb tagħhom it-tnejn li jaħdmu biex ’il quddiem ikollhom post għalihom u jiżżewġu. Minħabba li ż-żjara tiegħi għand dik il-familja kienet żjara bħala kandidat politiku, id-diskussjoni daret fuq is-sitwazzjoni politika attwali. Kien proprju f’dan il-mument li Anthony, mingħajr tlaqliq, stqarr li l-politika ma tinteressahx aktar! “X’jimpurtani minn dak li jgħidu l-partiti politiċi,” stqarr miegħi.

Ikolli nammetti li din hija stqarrija li sfortunatament diversi żgħażagħ ta’ din l-età qegħdin jagħmlu. Għal diversi żgħażagħ (u anke diversi persuni adulti oħra), il-politika mhux biss ma tinteressahomx aktar, imma jħossu li dawk li daħlu fil-politika għamlu dan għall-gwadann personali tagħhom.

Dan mhuwiex ta’ ġid għal pajjiżna. Il-politika hija neċessarja jekk irid ikun hawn soċjet. ġusta u tajba. Jekk irridu ngħixu f’soċjetà b’livell għoli ta’ għajxien, irridu naħdmu qatigħ biex ikun hawn politika tassew ħajja. Tajjeb li nistaqsu mistoqsijiet diffiċli u ma nibżgħux minn risposti skomdi.

1. Iż-żgħażagħ tal-lum huma forsi magħluqa fid-‘dinja’ tagħhom? Diversi snin ilu kont naħdem fost iż-żgħażagħ. Iż-żgħażagħ ta’ dak iż-żmien (li mhux żmien imbiegħed) kienu jħobbu joħolmu bil-futur. Nafuhom bħala żgħażagħ li ma jibżgħux juru l-fehma tagħhom. Iż-żgħażagħ tal-lum donnhom jinsabu fid-‘dinja’ komda tagħhom. Huwa veru li d-dinja kollha saret individwalistika – fejn sfortunatament dak li jimpurtak huwa biss minnek – imma nħoss li ż-żgħażagħ tal-lum jgħixu medhija wisq f’dinja ta’ aljenazzjoni. X’jiġri lil ħaddieħor u x’jiġri madwarhom ma tantx għandhom ħin għalih. Dan qiegħed iwassal għal indifferenza soċjali. Il-mentalità hija li wieħed jimpurtah sakemm jimpurta lilu! Għaldaqstant, il-politika vera, li tieħu l-ħin biex twassal il-messaġġ, ma tħallix effett fuqhom. Dan wassal għal politika tal-buzz words u l-marketing . Imma politika tal-buzz words fir-realtà hija nieqsa minn ċerta profondità ta’ ħsieb. Min-naħa l-oħra, il-politika tal-marketing hija wkoll biss qoxra tal-apparenza. Dak li jidher ma jfissirx li huwa fir-realtà.

Dan rajnieh fl-aħħar elezzjoni, bil-Partit Laburista b’kampanja qawwija mibnija fuq il-marketing. Il-frott ta’ dan il-marketing qegħdin narawh issa li bejn il-kliem u l-fatti hemm baħar jikkumbatti. Għaldaqstant, il-politika tal-buzz words hija politika artifiċjali.

2. Jista’ jkun li ż-żgħażagħ ma jimpurtahomx mill-politika għax għejew minnha? Hekk stqarrAnthony miegħi. Huma diversi dawk iż-żgħażagħ u l-adulti li jistqarru li f’Malta l-politika tingħata wisq importanza. Xi wħud ma jafux jitkellmu jekk mhux fuq il-politika. Diversi drabi min huwa f’dan l-istat huwa persuna politikament fanatika. Għal min huwa politikament fanatiku, il-partit qatt ma jagħmel żball u kollox tajjeb jagħmel. Dan iwassal għal partiġjaniżmu aggressiv fejn il-politika ssir il-politika tal-kelb u l-qattus. Inħoss li mhux biss dan ma jagħmilx ġid, imma qiegħed ikun kawża ta’ diversi żgħażagħ li jitbiegħdu mill-politika. Għalkemm nemmen li l-politika hija importanti fit-tmexxija tas-soċjeta' tagħna, mhix l-aktar valur importanti u hemm affarijiet oħrajn minbarra l-politika.

3. Jista’ jkun li ż-żgħażagħ u oħrajn jinsabu f’dan l-istat għax il-politiċi waqqgħu l-ġebla fuq saqajhom? Hija mistoqsija li tajjeb li kull politiku jkollu l-kuraġġ u d-diċenza jwieġeb fil-kuxjenza tiegħu. Għalkemm f’Malta kellna diversi politiċi li għamlu unur lill-partit tagħhom u lil pajjiżhom, kellna u għad hawn politiċi li jużaw il-vot tan-nies biex ikunu jistgħu jimxu ’l quddiem fil-ħajja personali tagħhom u jmorru aħjar ħbiebhom. Kellna u għad hawn politiċi li ma għandhom l-ebda valur u etika, u tefgħu dell ikrah fuq kulħadd. Il-ġrajjiet li qegħdin ngħixu fl-aħħar xhur huma eżempju klassiku. Għandu raġun Simon Busuttil meta għal diversi drabi jiġbed l-attenzjoni li dak li qiegħed iseħħ huwa ta’ ħsara kbira għall-klassi politika kollha. Dan qiegħed iwassal biex persuni u żgħażagħ validi jibżgħu jersqu ’l quddiem għax jibżgħu ‘jimbelgħu’ mis-sistema.

Huma diversi dawk li jaħsbuha bħalAnthony u li ma jimpurtahomx. Ikun għaqli għalina jekk nersqu lejn Anthony u lejn min jaħsibha bħalu b’messaġġ sempliċi, oġġettiv u kalm. Irridu nfiehmu lil dawn iċ-ċittadini li ħadd ma jgħix għalih innifsu.

(Dan l-artiklu ġie ippublikat fuq il-gazzetta Il-Mument – 5 ta' Ġunju, 2016)