Ħobż u ċ-Ċirklu

Quddiem Gvern li b'mod sistematiku qiegħed isodd ħalq il-poplu b'diversi modi u li qiegħed joffri tant aljenazzjonijiet, il-PN għandu jkun il-vuċi ta' dawk li m'għandhomx!

Bil-Latin hemm espressjoni li tgħid: ‘Panem et Circenses’ . Din tfisser ħobż u ċirklu. Il-poeta bl-isem ta’ Juvenal kien ħareġ b’din l-espressjoni biex jikkritika lill-imperaturi Rumani li biex iżommu lill-poplu ferħan u aljenat mit-tmexxija tagħhom, kienu jipprovdhulu l-qamħ b’xejn.

Mal-medda taż-żminijiet, din l-espressjoni ħadet tifsira politika. Saret tintuża għal meta xi gvern jew inkella xi dittatur jipprova jsikket u jaljena lill-poplu billi jagħtih ‘ħobż’ u ‘ċirklu’, jiġifieri ġid u divertiment. B’hekk ilpoplu jibqa’ kwiet, kalm u kuntent.

Żgur u mhux forsi, li fl-aħħar erba’ snin, Joseph Muscat u l-Gvern tiegħu wettqu, b’mod fin għall-aħħar, din il-politika tal-‘ħobż’ u ‘ċirklu’. Diversi qegħdin ‘jieklu’ mhux minn ħalq wieħed, imma minn tnejn jew tlieta. Filwaqt li xi wħud, fosthom anzjani, qegħdin jingħataw il-loqom, oħrajn qegħdin jiffangaw waħda sew. Il-ħobż li qiegħed jagħti l-Gvern Laburista jieħu diversi forom, fosthom promozzjonijiet mgħaġġla: erba’ promozzjonijiet f’xahar, salarji m’għola s-sema, impiegi mal-Gvern, postijiet tal-Gvern, għoti ta’ permessi ta’ żviluppi enormi fuq art verġni, u kuntratti ta’ xogħol, fost oħrajn. B’hekk wieħed ma jista’ qatt jasal biex jigdem l-id li qiegħda titimgħu!

Min-naħa l-oħra, il-Gvern Laburista offra diversi mumenti ta’ ‘divertiment’ biex jaljena. Wieħed jista’ jsemmi l-konferenzi bombastiċi biex iħabbar xi proġetti privati jew tal-Gvern (tajjeb li wieħed isemmi li wara ħafna pompa, diversi proġetti mħabbra, bħall-Universita’ Amerikana, l-isptar ta’ Barths u oħrajn spiċċaw fix-xejn!) kif ukoll l-attivitajiet u l-infiq eseġerat fil-laqgħa tal-Commonwealth u tal-Presidenza Ewropea. Issa, li l-Belt Valletta se ssir il-Belt Kapitali Ewropea, nistennew aktar pompa. Tajjeb li wieħed isemmi il-ftuħ tal-pjazza ta’ quddiem id-dħul ta’ Bieb il-Belt. Ftit jiftakru kemm esponenti tal-Partit Laburista maqdru l-proġett meta kien imħabbar mill-Gvern ta’ Lawrence Gonzi! Issa, sar sabiħ!

Filwaqt li għaddej dan kollu, il-Gvern ikompli għaddej romblu minn fuq kulħadd. Il-Gvern għaddej b’governanza ħażina, bi stejjer ta’ korruzzjoni u ħasil ta’ flus, l-iffirmar ta’ kuntratti dubjużi u theddid lil min jipprova jikkritikah. Sfortunatament, il-politika tal-‘ħobż’ u ċ-‘ċirklu’ twassal biex il-poplu sakemm għandu l-flus fil-but, jaqa’ fis-silenzju. Għal xi wħud ftit jimpurtahom minn ħwejjeġ oħra.

Il-PN irid jibqa’ jkun il-vuċi tas-sewwa. Irid jibqa’ partit li l-abjad jibqa’ jsejjaħlu abjad, filwaqt li l-iswed jibqa’ jkollu l-kuraġġ li jgħidlu iswed. Il-PN jekk jagħżel li joqgħod fis-silenzju għaliex jibża’ li se jitlef il-popolarità, ikun qiegħed jirriskja li jispiċċa jitlef is-sens kollu għaliex jeżisti!

Għalkemm il-maġġoranza tal-poplu tat l-appoġġ lill-PL biex imexxi l-pajjiż, tajjeb li niftakru li ftit inqas min-nofs l-ieħor, ta l-fiduċja lill-PN. Nistgħu nirbħu l-fiduċja lura jekk verament nibqgħu nkunu punt ta’ riferenza. Jekk nitilfu dan, allura ma neħodhiex bi kbira li l-poplu mhux biss jibqa’ jagħżel lill-PL, imma jispiċċa jagħżel forzi politiċi oħrajn. Fina, il-poplu jrid jibqa’ jara s-sewwa u l-verità.

Nistqarr, li l-PN għandu mhux biss problema ta’ għaqda (li forsi din qiegħda tittaffa bil-mod il-mod) imma għandu problema ta’ identit.. X’inhuma l-fehmiet tiegħu f’dawn iż-żminijiet? X’inhuma l-valuri li jrid iħaddan? Kif se jkun fidil lejn il-valuri li sawruh? Għaliex il-poplu għandu jagħżel li jkollu fiduċja fih u mhux fil-PL? X’qed joffri differenti? Biex ikollna tweġibiet ġenwini ma nistgħux inkunu mdawra b’nies li jaħsbuha kollha l-istess! Jekk jiġri dan, allura se jkollna risposti kożmetiċi u mingħajr konvinzjoni.

Quddiem Gvern li b’mod sistematiku qiegħed isodd ħalq il-poplu b’diversi modi u li qiegħed joffri tant

aljenazzjonijiet, il-PN għandu bżonn ikun id-dawl fiddlam, is-sinjal f’salib it-toroq u l-vuċi ta’ dawk li

m’għandhomx!

Għalkemm l-imperaturi Rumani kienu joffru ‘ħobż’ u ‘ċirklu b’xejn, xorta l-poplu fl-aħħar qam kontra dan il-mod ta’ tmexxija. Dan għandu jiftħilna għajnejna u moħħna biex nagħrfu li xi darba jew oħra, il-PL se jinżel mit-tron tiegħu. Hemmhekk, il-PN irid ikun lest biex jitla’ fit-tmexxija! Imma biex il-Partit ikun lest, irid jgħix dak li jemmen fih.

(Dan l-artiklu ġie ippublikat fuq il-gazzetta Il-Mument – 14 ta' Jannar, 2018)